मापदण्डविपरीत सञ्चालन हुँदै आएका क्रसर उद्योग बन्द गर्न निर्देशन

A+ A A-

क्रसर उद्योग बन्द गराउन गएका एक युवकलाई धनुषामा टिपरले किचेर हत्या गरेपछि मापदण्डविपरीत सञ्चालन हुँदै आएका क्रसर उद्योगहरू बन्द गर्न जिल्ला समन्वय समिति धनुषाले सम्बन्धित निकायलाई निर्देशन दिएको छ ।

मंगलबार जिसस धनुषाको नदीजन्य तथा ढुंगा, गिट्टी, बालुवा, खानीजन्य पदार्थको उत्खनन, सङ्कलन र बिक्रीसम्बन्धी अनुगमन तथा समन्वय समितिको बैठकले ७ बुँदे निर्णय गरेको हो ।

जिसस धनुषामा बसेको बैठकले विगतका मापदण्डअनुसार दर्ता भएका र राजस्वसमेत बुझाएका तर नवीकरण हुन बाँकी र हाल रीत नपुगेका क्रसर तथा प्रशोधन उद्योगलाई बन्द गर्न निर्देशन दिने निर्णय गरेको उपसभापति दीपक झाले जानकारी दिए ।

उनले विगतमा दर्ता भएका, आन्तरिक राजस्व कार्यालयमा नियमित कर बुझाउँदै आएका तर हालको मापदण्डअनुसार अन्यत्र सार्नुपर्ने अवस्थाका क्रसर एवम् प्रशोधन उद्योगलाई मापदण्ड पुग्ने स्थानमा तत्काल सार्न सूचित गरिने र त्यहाँको पदार्थको परिमाण र किसिम खुल्ने गरी लागत राख्न लगाउने निर्णय भएको जनाए ।

त्यस्तै, हालसम्म घरेलु तथा साना उद्योग कार्यालयले दर्ता गरेको नदीजन्य, खानीजन्य बालुवा प्रशोधन तथा क्रसर उद्योगको तथ्याङ्कसमेत यथाशीघ्र जिल्ला समन्वय समिति धनुषाको कार्यालयमा पेस गर्न निर्देशन दिएको उनले बताए ।

अब नयाँ क्रसर उद्योग दर्ता गर्नुपूर्व घरेलु तथा साना उद्योग कार्यालयले जिल्ला अनुगमन समितिको स्थलगत अनुगमनपश्चात मात्र दर्ता प्रक्रिया अगाडि बढाउन समन्वय समितिले आग्रह गरेको छ ।

गत शुक्रबार अवैध क्रसर उद्योग सञ्चालकहरूको मिलेमतोमा धनुषाको मिथिला नगरपालिका– ५ मा अवैध उत्खनन कार्यको विरोध गर्दै आएका २४ वर्षीय दिलीपकुमार महतोको हत्या भएको थियो । हत्यापछि सम्बन्धित निकायहरू अवैध क्रसर उद्योग नियन्त्रणमा सक्रिय भएका हुन् ।

प्रकाशित मिति: मंगलबार, पुस २९, २०७६ १९:५१