खानेपानी अभाव भएपछि धरानवासी आन्दोलित

A+ A A-

सुक्खायाम सुरू नभई धरानमा खानेपानीको अभाव हुन थालेपछि उपभोक्ताहरू खानेपानीको माग गर्दै आन्दोलनमा उत्रिएका छन् । खानेपानी संस्थानले धरानमा पानीको कृत्रिम अभाव सिर्जना गरेको भन्दै वडाध्यक्ष नै आन्दोलनको नेतृत्व गरिरहेका छन् ।

धरानमा खानेपानीको चरम अभाव भएपछि स्थानीयले विरोध जुलुस नै निकालेका छन् । लामो समयदेखि खानेपानीको समस्या भोग्दै आएका धरान– ९ का बासिन्दाले सोमबार भने हातमा रित्तो गाग्री, ड्रम, भाँडा कुँडा लिएर धरान–१३ स्थित नेपाल खानेपानी संस्थानको धरान शाखा कार्यालयमा पुगेर धर्ना बसे ।

वडा नम्बर ९ का वडाध्यक्ष रत्नबहादुर कटवालको नेतृत्वमा संस्थानको कार्यालय पुगेका स्थानीयवासीले कर्मचारीलाई कार्यालयमा जानै नदिई मुख्य प्रवेशद्वारमा ताला लगाइदिए । बिहान १० बजे कार्यालय पुगेका संस्थानका शाखा प्रमुख वरिष्ठ इन्जिनियर रामकुमार श्रेष्ठमाथि आक्रोशित उपभोक्ता जाइलाग्दा स्थिति तनावपूर्ण बनेको थियो । स्थिति नियन्त्रणमा लिन सुरक्षाकर्मीलाई हम्मेहम्मे परेको थियो ।

उनीहरूले संस्थानका कर्मचारीविरुद्ध चर्को नाराबाजी लगाए । उनीहरूले पानीको कृत्रिम अभाव बन्द गर, पानी जीवन हो खेलवाड नगरजस्ता नाराबाजी लगाए । खानेपानी संर्घष समितिका संयोजक एवं वडाध्यक्ष कटवालले संस्थानका कर्मचारीले कमिसन खानका लागि पानीको कृत्रिम अभाव सिर्जना गरेको आरोप लगाए । ‘ट्याङ्करवाला र खानेपानी उत्पादक कम्पनीसँग मिलेर धरानमा पानीको कृत्रिम अभाव सिर्जना गरिएको छ,’ उनले भने, ‘अभावबारे पटक–पटक संस्थानलाई ध्यानाकर्षण गराए पनि बेवास्ता गरेका कारण बाध्य भएर आन्दोलनमा उत्रनुपरेको हो ।’

सञ्चारकर्मी महेश श्रेष्ठले धरान पानीको मुहानै मुहानले घेरिए पनि धरानवासी भने काकाकुल अवस्थामा बाँच्नुपरिरहेको भन्दै आक्रोश पोखे । ‘पानीको अभाव हुँदा विद्यार्थीहरूलाई समयमा विद्यालय पठाउन पनि समस्या परेको छ,’ उनले भने, ‘दैनिकीमा समेत समस्या भइरहेको छ ।’

यता संस्थानका धरान शाखा प्रमुख श्रेष्ठले प्राविधिक समस्याका कारण वडा नम्बर ९ मा पानी वितरणमा समस्या भइरहेको स्वीकार गरे । ‘पानी अभाव हुनुमा अलिकति टेक्निकल समस्या छ । धरानमा खानेपानीका लागि दिर्घकालीन व्यवस्था गर्न आईयूडीपी आयोजना सम्पन्न हुने क्रममा भएको हुँदा कुनै पनि योजना अघि नबढाएका हौं,’ उनले भने, ‘योजना उपमहानगरपालिकाअन्तर्गतको धरान खानेपानी बोर्डमा हस्तान्तरण गर्ने प्रक्रिया अगाडि बढेको छ । यो हुनासाथ समस्या टर्छ ।’

धरानमा खाने पानीको समस्या दिर्घकालीन रूपमा समाधान गर्नका निम्ति सन् २०१२ को मेमा एसियाली विकास बंैक (एडीबी) बाट २२.०७ मिलियन डलर ऋण र नेपाल सरकारको अनुदान सहयोग ५१ करोड ५८ लाख तथा धरान उपमहानगरपालिकाको ३२ करोड ४० लाख गरी कुल ३ अर्ब २९ लाख रुपैयाँको लागतमा आईयूडीपी आयोजना निर्माण भइरहेको छ । हाल यो आयोजना सम्पन्न हुने तर्खरमा रहेको संस्थानले जनाएको छ ।

प्रकाशित मिति: मंगलबार, पुस २९, २०७६ १८:४१