प्रहारसँग जुध्न पार्टी एक ढिक्का हुन जरुरी छ : शेखर कोइराला

A+ A A-

नेपाली कांगेसका केन्द्रीय सदस्य डा. शेखर कोइरालाले प्रदेश १ का जनप्रतिनिधिसँग कोइराला निवास विराटनगरमा छलफल गरेका छन् ।

प्रदेश १ का विभिन्न स्थानीय तहमा कांग्रेसका तर्फबाट विजयी प्रमुख, उपप्रमुख, अध्यक्ष तथा उपाध्यक्षहरूसँग निवासमा समसामयिक राजनीतिको विषयमा छलफल गरेएका हुन् ।

छलफलमा महानगर, उपमहानगर, नगरपालिका र गाउँपालिकाका प्रमुख तथा उपप्रमुखहरू सहभागी थिए । त्यस अवसरमा कोइरालाले कांग्रेस अहिलेजति अप्ठ्यारो अवस्थामा कहिल्यै नपुगेको बताउँदै भने, ‘हामी विपक्षी भएदेखि नै विभिन्न ढंगले प्रहार भइरहेको छ । योसँग जुध्नका लागि पनि पार्टी एक ढिक्का हुन जरुरी छ ।’

कोइरालाले सरकारको गतिविधि अधिनायमवादतर्फ उन्मुख रहेको र यसले जनताका अधिकारलाई कुण्ठित बनाउने षड्यन्त्र गरिरहेको बताए ।

प्रमुख, उपप्रमुखहरू कांग्रेसको टिकट पाएर विजयी भएका र अहिलेको पार्टीको समस्यालाई पार लगाउन महत्त्वपूर्ण भूमिका निर्वाह गर्नुपर्ने सुझाव दिए । भने, ‘तपाईंहरूले गरेको कामले सिंगो पार्टी र जनतामाझ पनि सन्देश जान्छ ।’

उनले निष्पक्ष भएर विकासमा ध्यान दिएर जनमुखी काम गर्न प्रमुख, उपप्रमुखहरूलाई सुझाव दिए ।

छलफलमा भेला भएका जनप्रतिनिधिहरूले पार्टीमा देखिएका समस्यालाई शीघ्र समाधान गर्नुपर्ने सुझाव दिए । उनीहरूले कांग्रेस विजयी भएका पालिकाहरूमा समेत काम गर्न कठिनाइ भएको दृष्टान्त प्रस्तुत गरेका थिए ।

निवासमा गरिएको छलफलमा प्रदेश १ मा विजयी भएका पहाडी तथा मधेसका विभिन्न तहका प्रमुखहरूको सहभागिता थियो । प्रदेश समन्वय परिषद्को बैठकमा सहभागी हुन आएका प्रमुख, उपप्रमुखहरूलाई कोइराला निवासमा निमन्त्रणा गरी समसामयिक विषयमा छलफल र अन्तरसंवाद गरिएको कोइरालाले बताए ।

विराटनगर महानगरपालिकाका मेयर भीम पराजुलीले छलफलले आफूहरूबीचका अनुभव आदानप्रदान गर्नसमेत सहयोग मिलेको सुनाए । भने, ‘यस्ता सन्दर्भले काम गर्दाका समस्या र अनुभव आदानप्रदान गर्नसमेत सहयोग हुने गरेको छ ।’

छलफलमा प्रदेश १ मा राष्ट्रियसभामा कांग्रेसमा उम्मेदवार पनि सहभागी थिए ।

प्रकाशित मिति: मंगलबार, पुस २९, २०७६ १७:३७