शिवमायाले राजीनामा नदिएपछि कानुनी बाटो खोज्दै प्रचण्ड

A+ A A-

सत्तारुढ नेपाल कम्युनिस्ट पार्टी (नेकपा) भित्र अहिले सबैभन्दा चर्चा हुने पात्र हुन् उपसभामुख डा. शिवमाया तुम्बाहाम्फे । तुम्बाहाम्फेलाई नेकपाको शनिबार बसेको सचिवालय बैठकले राजीनामा गराउने निर्णय गर्‍यो ।

तर तुम्बाहाम्फेले आफूले राजीनामा नदिने बताएपछि नेकपामा उपसभामुखको राजीनामा पेचिलो बन्दै गएको छ । शनिबार बसेको सचिवालय बैठकको अध्यक्षता पुष्पकमल दाहाल (प्रचण्ड) ले गरेका थिए । उनको अध्यक्षतामा बसेको बैठकको निर्णय कार्यान्वयन नहुने अवस्था सिर्जना भएको छ ।

आइतबार प्रचण्ड र माधवकुमार नेपालले बानेश्वरको अर्याल होटलमा केही आफूनिकट कानुन व्यवसायीसँग उपसभामुखले राजीनामा नदिँदा अथवा अन्य बाटो अपानउँदा आइपर्ने कानुनी बाधा अड्चनलाई कसरी हल गर्ने भन्ने विषयमा छलफल गरेको प्रचण्डनिकट एक नेताले शिलापत्रलाई बताए ।

ती नेताले भने, ‘उपसभामुखको विषय पेचिलो बन्दै गएको छ । यदि उहाँले पार्टीले भनेको मान्नु भएन र राजीनामा गर्नु भएन भने कानुनी रूपमा कसरी जान सकिन्छ भनेर छलफल गर्नु स्वाभाविक नै हो । त्यही सरसल्लाह गर्नु भएको होला ।’

प्रचण्डको अध्यक्षतामा बसेको बैठकको निर्णयको विपक्षमा प्रधानमन्त्री नै उभिएपछि यो निर्णय कार्यान्वयन हुने/नहुने अन्याेलता छ । यही अन्याेलताबीच प्रचण्ड र माधवकुमार नेपालले आफूनिकट कानुन व्यवसायी र विज्ञहरूसँग छलफल चलाएका छन् ।

प्रधानमन्त्री पनि सचिवालयको निर्णयप्रति असन्तुष्ट रहेकाले अहिले सचिवालयको निर्णय नै धरापमा परेको छ । बालुवाटार त्यो निर्णय कार्यान्वयन हुन्छ कि हुँदैन भनेर हेरिरहेको छ ।

प्रधानमन्त्री सचिवालयको निर्णय कार्यान्वयन गराउन लागेमा मात्र त्यो कार्यान्वयन हुने देखिन्छ । होइन भने उपसभामुखको पक्षमा बालुवाटार र शीतल निवास रहेको चर्चा नेकपामा चल्न थालेको छ ।

बालुवाटारमा सचिवालयको बैठक बोलाएर प्रधानमन्त्री भने अस्पताल गएका थिए । उनी आफ्नै सरकारी निवासमा बैठक बोलाएर अस्पताल जानुले पनि प्रचण्ड–नेपाल झस्किएका छन् ।

बालुवाटार स्रोत भन्छ, ‘उपसभामुखलाई राजीनामा गराउने निर्णय भएको बैठकमा प्रधानमन्त्री हुनुहुन्नथ्यो । जसले निर्णय गराउनुभएको थियो उहाँहरूले नै कार्यान्वयन गराउनुहुन्छ होला नि ।’

ओलीनिकट नेताहरू पनि प्रचण्डको कार्यकारी ताकत कति छ त हेरौं भनेर रमिते बनेजस्तो देखिन्छ । ४ मंसिरमा बसेको सचिवालय बैठकबाट कार्यकारी अधिकार पाएका प्रचण्डले केही सचिवालय र एक स्थायी कमिटीको बैठकको अध्यक्षता गरेका छन् ।

तर पछिल्लो बैठकको निर्णय भने विवादमा परेको छ । राजीनामा दिन लगाउने निर्णय कार्यान्वयन नगर्ने उपसभामुखले नै दुवै अध्यक्षलाई जानकारी गराएकी छन् । यस्तो अवस्थामा नेकपामा उपसभामुख प्रकरण पेचिलो बनेको छ ।

प्रकाशित मिति: मंगलबार, पुस २९, २०७६ १३:५४