हिलाम्मे सडक सफा गर्न प्रमुख जिल्ला अधिकारी सडकमा

A+ A A-

डडेल्धुराको तुफाँनडाँडादेखि प्रशासन जाने सडक हिलाम्मे भएको महिनौं बितिसकेको छ । स्थानीय सरकारलाई पटक–पटक आग्रह गरे पनि स्थानीय सरकारको ध्यान जान सकेको छैन ।

सडक हिलाम्मे भएपछि स्थानीयहरूलाई आवतजावत गर्ने निकै समस्या भएको छ । सडकको किनारमा अस्तव्यस्त पाइपलाइन छन् भने अर्कोतिर सडक निर्माणका क्रममा खानेपानीका पाइपहरू काटिएका छन् ।

भ्रमण वर्षको सुरूवातमा अमरगढी सरकारले सडकको स्तरोन्नति गर्ने भनेको थियो । भ्रमण वर्ष २०२० को उद्घाटन गर्न सूचना तथा संचार प्रविधिमन्त्री गोकुलप्रसाद बाँस्कोटा डडेल्धुरा आउँदा अमरगढी नगरपालिकाले सडकमा रहेका खाल्टा–खुल्टीमा माटोले भरेर पुरेको थियो ।

तर, भ्रमण वर्षको उद्घाटन सकिएलगत्तै लगातार परेको पानी र हिमपातले झन् सडकको अवस्था झनै बिग्रिएको छ । सडकको अवस्था झनै बिग्रिएपछि स्थानीयहरूले अमरगढी नगरपालिका र जिल्ला प्रशासन कार्यालयको चर्को आलोचना गरेका थिए ।

जिल्ला प्रशासन कार्यालय डडेल्धुराले सडक मर्मतको कार्य आफ्नो नभएकाले स्थानीय सरकारले ध्यान दिनुपर्ने बताएको थियो । जिल्ला प्रशासन कार्यालय डडेल्धुराले पटक–पटक आग्रह गर्दासमेत अमरगढी नगरपालिकाले ध्यान नदिएपछि जिल्ला प्रशासन कार्यालय डडेल्धुराले आफ्नै पहलमा स्क्याइभेटर लगाएर सडकको हिलो सफा गरेको छ ।

हिलाम्मे सडक सफा गर्न प्रमुख जिल्ला अधिकारी सडकमा

तुफाँनडाँडादेखि जिल्ला प्रशासन कार्यालयसम्म जाने सडक हिलाम्मे भए पनि कसैको ध्यान नगएपछि स्थानीयले आक्रोश पोखेका थिए ।

स्थानीयले जिल्ला प्रशासनको आलोचना र अमरगढी नगरपालिकाले सडक सफा गर्नेमा ध्यान नदिएपछि प्रमुख जिल्ला अधिकारी राजुप्रसाद पौडेल आफैं अग्रसर भएर हिलो सोहोर्ने र ग्राभेल गर्ने काम गरेका छन् ।

सडकको हिलो सफा गर्न प्रमुख जिल्ला अधिकारी पौडेलसँगै प्रहरी नायव उपरीक्षक दधिराम न्यौपाने पनि दिनभर सडकमै ब्यस्त थिए । सडकको हिलो सफा गर्न सडक निर्माण कम्पनी, साना शहरी खानेपानी आयोजना र सम्बन्धित निकायसँग पटक–पटक आग्रह गरेको प्रमुख जिल्ला अधिकारी पौडेलले बताए ।

‘यो अमरगढी नगरपालिकाको क्षेत्राधिकारभित्रको कुरा हो । अमरगढी नगरपालिकाले ध्यान दिनुपर्छ,’ उनले भने, ‘हामीसँग न स्रोत साधन छ । न त स्क्याभेटर छ । त्यसैले स्रोत साधन र जिम्मेवारी लिएर बसेको अमरगढी नगरपालिकाले ध्यान दिन जरूरी छ ।’

प्रकाशित मिति: सोमबार, पुस २८, २०७६ ०८:५९