शिक्षा नीति परिवर्तन गराउँछु : नवनिर्वाचित इक्यान अध्यक्ष पाण्डे

A+ A A-

नेपाल शैक्षिक परामर्श संघ (इक्यान) को अध्यक्षमा प्रकाश पाण्डे सर्वसम्मत रूपमा चयन भएका छन् । इक्यानको १४औं साधारणसभाले उनलाई सर्वसम्मत रूपमा साे पदमा चयन गरेको हो ।

त्यसैगरी, महासचिवमा दीपकराज भुसाल, उपाध्यक्षमा देवीदास भट्टराई, शेषराज भट्टराई, कृष्णहरि केसी र सचिवमा वासुदेव दाहाल र बालकृष्ण (बिके) श्रेष्ठ चयन भएका छन् । त्यस्तै, कोषाध्यक्षमा प्रकाश श्रेष्ठ र सहकोषाध्यक्षमा कर्णबहादुर गुरुङ चयन भएका छन् ।

सदस्यहरूमा सुष्मा आचार्य, आशिक कार्की, रत्न भट्टराई, नवराज भट्टराई, पुष्पराज भट्टराई, विकल्पराज पोखरेल, आर्यन उप्रेती, भवनाथ हुमागाईँ, सुवास गौतम र शिवप्रसाद त्रिपाठी चयन गरेका छन् ।

इक्यानमा २१ सदस्यीय कार्यसमिति रहने व्यवस्था छ । १८ सदस्य निर्वाचनबाट, दुई जना मनोनीत र निवर्तमान अध्यक्ष स्वतः सदस्य हुने व्यवस्था छ ।

शिक्षा नीति परिवर्तन गराउँछु, अध्यक्ष पाण्डे

नवनिर्वाचित अध्यक्ष पाण्डेले इक्यानका असन्तुष्ट पक्षलाई पनि समेटेर शिक्षा नीति परिवर्तन गरिने बताए । उनले शिलापत्रसँग कुरा गर्दै भने, ‘नयाँ कार्यसमिति बनेको छ । धेरै साथीले रुचाएर नै निर्वाचित भएको हुँ । टेक्निकल कारणले केही साथी छुट्नुभएको होला, उहाँहरूलाई पनि समेटेर अगाडि बढ्छु ।’

सबै पक्षसँग सल्लाह सुझाव लिएर नै इक्यानलाई प्रभावकारी बनाउने उनकाे भनाइ थियाे । ‘समाज जस्तो हुन्छ । हाम्रो क्षेत्र पनि त्यस्तै हुन्छ । केही विसंगति छ । सुधार हुनुपर्छ । सुधारका काम पनि गरेका छौं । आगामी दिनमा पनि गछौं,’ उनले भने । शैक्षिक परामर्श क्षेत्रलाई व्यवस्थित बनाउने काम राज्यको रहेको उनले बताए ।

‘शैक्षिक परामर्शलाई व्यवस्थित बनाउन शिक्षा मन्त्रालयलाई भन्दै आएका छौं,’ अध्यक्ष पाण्डेले भने, कन्सल्टेन्सीलाई राज्यले हेर्ने दृष्टिकोणमा परिवर्तन ल्याउनुपर्छ । राज्यले शैक्षिक परामर्श क्षेत्रलाई राम्रोसँग बुझ्न नसकेको उनले गुनासो गरे ।

‘राज्यले पूर्ण रूपमा यस क्षेत्रलाई बुझेको छैन,’ उनले भने, ‘केही नीति बनाएको छ । तर, त्यसमा पनि कमी कमजोरी छ । केही बुझेर केही नबुझेर बनाइएको नीति छ । यसलाई परिवर्तन गर्नुपर्छ ।’

आफ्नो कार्यकालमा शिक्षा नीति परिवर्तन गराउन लाग्ने उनले बताए । ‘भर्खरै नयाँ शिक्षा नीति आएको छ । कन्सल्टेन्सीलाई नबुझी नीति बनाइएको छ । शिक्षा नीति परिवर्तन अहिलेको मुख्य एजेन्डा हो,’ उनले भने ।

प्रकाशित मिति: आइतबार, पुस २७, २०७६ १४:३५