आठ महिनामा दुई पटक भत्कियो

A+ A A-

धनगढी उपमहानगरपालिकामा सघन शहरी विकास कार्यक्रमअन्तर्गत ४२ किलोमिटर चक्रपथ निर्माण भएको छ । त्यहीमध्येको धनगढी उपमहानगरपालिका–३ मा पर्ने भन्सारदेखि राजपुरसम्मको ८ दशमलव ९ किलोमिटर सडक निर्माण सम्पन्न भएको ८ महिनामै दुई पटक भत्किएको छ ।

पहिलो पटक निर्माण सम्पन्न भएको एक महिनामै भत्किएको सडक स्तरोन्नति गरिएको थियो । अहिले फेरि त्यही सडक भत्किएको छ । गुणस्तरहीन सामग्री प्रयोग गरिएका कारण सडक पटक–पटक भत्किन थालेको धनगढी बोराडाडीका स्थानीय लक्ष्मण भट्टले बताए ।

उनले भने, ‘बजेट सक्न टाल्ने काम भइरहेको छ । छिटो र कम लागतमा काम सक्न कमसल सामग्रीको प्रयोग भएको छ । अनुगमनमा आउनेले पनि वास्ता नगर्दा प्रयोगमा नआउँदै सडक भत्किएको हो ।’ अधिकांश ठाउँमा कालोपत्रे उप्किएको छ । केही ठाउँमा सडकको तह नै दबिएको छ । अहिलेसम्म यो सडकमा कुनै सवारी गुडेका छैनन् ।

रिङरोडअन्तर्गत चटकपुर सडकको अधिकांश क्षेत्रको दायाँ र बायाँ भागमा कालोपत्रे भत्किएको अर्का स्थानीय प्रकाश चौधरीले बताए । उनले भने, ‘काममा लापरबाही गर्दा पटक–पटक सडक भत्किने गरेको छ । भत्किएको ठाउँमा टालो टालेर गल्ती लुकाउने काम भएको छ । भर्खर बनेको सडकको अवस्था कुरुप बन्दा पनि नियमनकारी निकायले कुनै चासो दिएका छैनन् ।’

निर्माण कम्पनी र सरोकारवालाकै मिलेमतोमा सडक गुणस्तरहीन बनेको स्थानीय सुनिता ओलीको आरोप छ । ‘हामीले राम्रो काम गर्न पटक–पटक दबाब दियौं । तर, विरोधका बीच पनि कम्पनीले आफूखुशी कालोपत्र गरेको थियो’, उनले आक्रोश पोखिन् ।

असारे झरीमा गरिएकाले एक महिनामै नयाँ सडक चिरा परेको थियो । उनले अघि भनिन्, ‘निर्माण कम्पनीले गल्ती लुकाउन बीचमा केही टालटुल गरेको थियो । त्यो पनि लामो समयसम्म टिक्न सकेन ।’ यता शहरी विकास तथा भवन निर्माण विभाग संघीय आयोजना कार्यान्वयन एकाइ धनगढीका सूचना अधिकारी श्यामचन्द्र बुढाथोकीले सडकले ठूला गाडीको भार थेक्न नसकेर भत्किएको बताए ।

‘सडकको भार क्षमता १० टन मात्र हो । त्योभन्दा माथिको भारसहित सवारी गुड्दा सडकमा समस्या आएको हो,’ उनले भने, ‘अनुगमन गरेर कम्पनीलाई मर्मत गर्न निर्देशन दिनेछौं ।’ चक्रपथ सडकमा निर्माण कम्पनीको चरम लापरबाही देखिएको धनगढी उपमहानगरपालिकाले जनाएको छ ।

भत्किएको सडक तत्काल मर्मत गर्न सडक विभागलाई ताकेता गरिरहेको उपमहानगरपालिकाका प्रवक्ता सन्तोष मुडभरीले बताए । उनले भने, ‘सडकमा कमसल सामग्रीको प्रयोग भएको देखिएको छ । त्यसकारण पनि सडक पटक–पटक भत्किन्छ । तत्काल मर्मतका लागि निर्देशन दिइसकेका छौं, अब सडकमा समस्या आउँदैन होला ।’

करिब १० करोड रुपैयाँकाे लगानीमा भन्सारदेखि राजपुरसम्मको ८ दशमलव ९ किलोमिटर खण्ड निर्माण भएको थियो । केएस कन्स्ट्रक्सन, लुम्बिनी कन्स्ट्रक्सन र जेभी राजेन्द्र निर्माण सेवाले २०७४ असार मसान्तमा दुई वर्षभित्र सडक निर्माण सम्पन्न गर्ने गरी संयुक्त रूपमा ठेक्का लिएका थिए । समय अवधिमै निर्माण सम्पन्न गरे पनि त्यसको एक महिनामै सडक भत्किन सुरु भएको थियो ।

प्रकाशित मिति: आइतबार, पुस २७, २०७६ १२:५६