बैंकका पूर्व सीईओः अध्यात्मदेखि अभियोगसम्म

A+ A A-

नेपालको श्रम बजारमा सबैभन्दा आकर्षक जागिर बैंकको उच्च व्यवस्थापन तहलाई लिने गरिन्छ । त्यसमा पनि प्रमुख कार्यकारी अधिकृत (सिइओ) को जागिर त धेरैका लागि सपनाको बिषय हो ।

तलब तथा सुविधा धेरै हुने भएकोले सरकारी अधिकारी पनि बैंकका सिइओको तलबभत्ताको बारेमा बेलाबेलमा चासो दिन्छन् । तर, सिइओको जिम्मेवारीबाट हटेपछि उनीहरुले के गरिरहेका छन् ? चासोको बिषय हुन सक्छ ।

कुनै बेलाका चर्चित सिइओहरु जिम्मेवारीबाट हटेपछि केहीलाई बैंकिङ कसुरको अभियोग लागेको छ । केही उद्यम ब्यवसायमा लागेका छन् । केही सिइओ भने अध्यात्मतिर लागेका छन् ।

पृथ्बीबहादुर पाँडे

नेपाल इन्भेष्टमेन्ट बैंकको कार्यकारी अध्यक्षको रुपमा लामो समय जिम्मेवारी वहन गरेका पाँडे अहिले बैंक संचालक समिति अध्यक्षको जिम्मेवारीमा छन् ।

उनले आफ्नी आमा छायादेवी पाँडेको नाममा ठमेलमा छाया सेन्टर बनाएका छन् । नगरकोटमा होटल ब्यवसाय पनि संचालन गरिरहेका छन्।

सशिन जोशी

एनआइसी एशिया, नविलजस्ता बैंकको प्रमुख कार्यकारी अधिकृतको जिम्मेवारी बहन गरिसकेका सशिन जोशी अहिले बैंकिङ क्षेत्रमा छैनन् । उनी जावलाखेल ग्रुप अफ इन्डष्ट्रिजको कार्यकारी निर्देशकको जिम्मेवारीमा छन् ।

उपेन्द्र पौडेल

एनएमबी बैंकको प्रमुख कार्यकारी अधिकृतबाट अवकाश पाएका उपेन्द्र पौडेल अहिले नविल बैंकको संचालक समिति सदस्य र एनबीआइको डाइरेक्टरको जिम्मेवारीमा छन् ।

राधेश पन्त

बैंक अफ काठमाडूको प्रबन्ध संचालक, कुमारी बैंकको प्रमुख कार्यकारी अधिकृत भइसकेका अर्का भेट्रान बैंकर राधेश पन्त सरकारी निकाय लगानी बोर्डको प्रमुख कार्यकारी अधिकृत भएर बैंकिङ क्षेत्रबाट बाहिरिएका हुन् ।

अहिले उनी बैंक अफ काठमाडूको संचालक समिति सदस्य छन् भने परामर्श सेवा प्रदान गरिरहेका छन् ।

लिलाप्रकाश सिटौला

नेपाल राष्ट्र बैंकको कार्यकारी निर्देशकबाट अवकाश पाएका सिटौला केही समय अगाडि मात्रै कृषि विकास बैंकको प्रमुख कार्यकारी अधिकृतबाट पदावधी समप्त भएर बाहिरिएका छन् । उनी अहिले बैंकिङ क्षेत्रमा प्रत्यक्ष जोडिएका छैनन् ।

बैंकको प्रमुख कार्यकारी अधिकृतबाट हटेको ६ महिनासम्म अर्काे बैंक तथा वित्तीय संस्थामा जान नपाउने नियामकीय ब्यवस्थाको कारण अझै केही महिना उनले वा उनलाई चाहेर अर्काे बैंकमा जान सक्ने अबस्था छैन ।

कृष्णप्रसाद शर्मा

राष्ट्रिय बाणिज्य बैंकको प्रमुख कार्यकारी अधिकृतको कार्यकाल सकिएपछि सो बैंकबाट बाहिरिएका कृष्णप्रसाद शर्मा अहिले ग्लोबल बैंकको संचालक समिति सदस्य छन् ।

राजनसिंह भण्डारी

नेपाल राष्ट्र बैंकको कार्यकारी निर्देशकको जिम्मेवारीबाट हटेपछि सिटिजन्स बैंक इन्टरनेसनलको प्रमुख कार्यकारी अधिकृत भएका राजनसिंह भण्डारी केही समय अगाडि मात्रै आफ्नो दुई कार्यकाल पूरा गरेर बाहिरिएका छन् । उनले ६ महिने कुलिङ अवधि पूरा गरेका छैनन् ।

नरेन्द्र भट्टराई

नेपाल बंगलादेश (एनबी) बैंकको प्रमुख कार्यकारी अधिकृतबाट बाहिरिएका नरेन्द्र भट्टराई त्यसपछि बैंकिङ क्षेत्रको ब्यवस्थापकीय जिम्मेवारीमा छैनन् । उनी सो बैंकबाट बाहिरिएको एक दशकभन्दा लामो समय भइसकेको छ । उनी अहिले सीए फर्म चलाएर बसेका छन् ।

सुधिरबाबु खत्री

तत्कालिन ग्राण्ड बैंकको प्रमुख कार्यकारी अधिकृतबाट बाहिरिएका सुधिरबाबु खत्री अहिले बैंकिङ क्षेत्रमा छैनन् । उनी विदेशतिर नै बसोबास गर्ने गरेका छन् ।

विजय पन्त

जनता बैंकको प्रमुख कार्यकारी अधिकृतबाट बाहिरिएका विजय पन्त पनि अहिले बैंकिङ क्षेत्रमा छैनन् । उनी अहिले मर्कन्टायर अफिस सिस्टममा कार्यरत छन् ।

रमेशकुमार भट्टराई

जनता बैंकको प्रमुख कार्यकारी अधिकृतबाट बाहिरिएका रमेश कुमार भट्टराई पनि अहिले बैंकिङ क्षेत्रको ब्यवस्थापकीय जिम्मेवारीमा छैनन् ।

सुदेश खालिङ

लक्ष्मी बैंकको प्रमुख कार्यकारी अधिकृतको कार्यकाल पूरा भएपछि सो बैंकबाट बाहिरिएका सुदेश खालिङ अहिले भेन्चर क्यापिटलको काम गरिरहेका छन् । उनको समुहले स्टार्टअप कम्पनीहरुलाई सहयोग गर्ने काम पनि गर्न लागेको छ । यस्तै उनी परामर्श सेवामा पनि संलग्न भएका छन् ।

गणेशकुमार श्रेष्ठ

सेन्चुरी बैंकको संस्थापक प्रमुख कार्यकारी अधिकृत गणेश कुमार श्रेष्ठ नेपाल राष्ट्र बैंकको कार्यकारी निर्देशक पदबाट अवकाश पाएका व्यक्ति हुन् । उनी अहिले बैंकिङ क्षेत्रमा सक्रिय छैनन् ।

कुमार लम्साल

सानिमा, प्रभु र जनता बैंकको प्रमुख कार्यकारी अधिकृतको जिम्मेवारी बहन गरिसकेका कुमार लम्साल अहिले बैंक तथा वित्तीय संस्थाहरुका कर्मचारीलाई तालिम दिने लगायतका कार्यमा संलग्न छन् ।

सुमन जोशी

लक्ष्मी बैंकको प्रमुख कार्यकारी अधिकृतको कार्यकाल पूरा भएपछि बैंकिङ क्षेत्रबाट बाहिरिएका सुमन जोशी अहिले भेन्चर क्यापिटल कम्पनी संचालन गरिरहेका छन् ।

अजय श्रेष्ठ

बैंक अफ काठमाडूको प्रमुख कार्यकारी अधिकृतबाट आफ्नो कार्यकाल पूरा गरेपछि बाहिरिएका अजय श्रेष्ठ अहिले कुनै पनि बैंक तथा वित्तीय संस्थाको ब्यवस्थापकीय जिम्मेवारीमा छैनन् । उनी अहिले अध्यापन तथा एनबीआइमा तालिम दिने कार्यमा संलग्न छन् ।

लक्ष्मण रिसाल

एनआइसी एशिया बैंकको प्रमुख कार्यकारी अधिकृतबाट बाहिरिएका लक्ष्मण रिसाल अहिलेसम्म बैंकको ब्यवस्थापकीय जिम्मेवारीमा छैनन् । उनी केही समय नेपाल र केही समय अमेरिका बस्ने गरेका छन् ।

अनलराज भट्टराई

कमर्ज एण्ड ट्रष्ट बैंकको सस्थापक प्रमुख कार्यकारी अधिकृत अनलराज भट्टराई अहिले अमेरिकी क्रेडिट रेटिङ एजेन्सी नेपालमा भित्र्याउने अन्तिम तयारीमा छन् । कमर्ज एण्ड ट्रष्ट बैंक ग्लोबल आइएमइ बैंकमा मर्ज भएपछि उनी बैंकिङ क्षेत्रबाट बाहिरिएका थिए ।

उनी अहिले निजी क्षेत्रको संस्था नेपाल उद्योग परिसंघ (सिएनआइ) मा संक्रिय छन् भने अन्य परामर्श सेवामा पनि लागेका छन् ।

सुरेन्द्र प्रधान

नेपाल राष्ट्र बैंकको कार्यकारी निर्देशकबाट अवकाश पाएका सुरेन्द्र प्रधान सेन्चुरी कमर्शियल बैंकको प्रमुख कार्यकारी अधिकृतको कार्यकाल पूरा गरेपछि बैंकिङ क्षेत्रबाट बाहिरिएका हुन् । उनी अहिले बैंकिङ क्षेत्रमा प्रत्येक्ष रुपमा जोडिएका छैनन् ।

किशोर महर्जन

सिभिल बैंकको प्रमुख कार्यकारी अधिकृतको कार्यकाल पूरा गरेर बाहिरिएका किशोर महर्जन अहिले प्रोग्रेसिभ फाइनान्स कम्पनीको संचालक समिति अध्यक्ष छन् । यस्तै उनले ललितपूरको क्रिकेट टीम ललितपुर प्याट्रियोट्सको पनि उनी अध्यक्ष हुन् । यस्तै उनले रेष्टुरेन्ट ब्यवसाय पनि संचालन गरिरहेका छन् ।

देवेन्द्रप्रताप शाह

नेपाल बैंकको प्रमुख कार्यकारी अधिकृतको कार्यकाल पूरा गरेर बाहिरिएका देवेन्द्र प्रताप शाह पनि अहिले ६ महिने कुलिङ अवधिमा छन् ।

जनक पौडेल

ग्लोबल आइएमइ बैंकको प्रमुख कार्यकारी अधिकृतबाट केही समय अगाडि मात्रै बाहिरिएका जनक पौडेल अहिले ६ महिने कुलिङ अवधिमा छन् ।

सुमन न्यौपाने

ग्लोबलको सिइओ र सनराइज बैंकको महाप्रबन्धकको जिम्मेवारी वहन गरिसकेका सुमन न्यौपाने अहिले बैंकिङ क्षेत्रमा प्रत्येक्ष जोडिएका छैनन् । न्यौपाने अहिले आफ्नै ब्यवसायमा लागेका छन् ।

निरज श्रेष्ठ

माछापुच्छ्रे बैंकको प्रमुख कार्यकारी अधिकृतबाट बाहिरिएका निरज श्रेष्ठ पनि अहिले बैंकिङ क्षेत्रमा सक्रिय छैनन् ।

उदयकृष्ण उपाध्याय

कुमारी बैंकको प्रमुख कार्यकारी अधिकृतको जिम्मेवारी बहन गरिसकेका उदयकृष्ण श्रेष्ठ अहिले युनाइटेड इन्स्योरेन्स कम्पनीको संचालक समिति अध्यक्षको जिम्मेवारीमा छन् ।

विएन घर्ती

तत्कालिन किष्ट बैंकको कार्यवाहक प्रमुख कार्यकारी अधिकृतको जिम्मेवारी वहन गरेका विएन घर्तीलाई बैंकिङ कसुरको अभियोग लागेको छ । उनको मुद्दा अदालतमा अझै विचाराधिन छ । घर्तीलाई तत्कालिन किस्ट बैंकका प्रबन्ध संचालक कमल ज्ञवालीको कारण बैंकिंग कसुरको अभियोग लागेको हो ।

उनी अहिले बैंकिङ एण्ड इन्स्योरेन्स म्यानेजमेन्ट (बीआइएन) को ब्यवस्थापन हेरिरहेका छन् । यस्तै उनले बैंक तथा वित्तीय संस्थाहरुलाई परामर्श सेवा र बैंकरलाई तालिम दिने कार्य गरिरहेका छन् ।

कमल ज्ञवाली

तत्कालिन किष्ट बैंकको प्रबन्ध संचालक कमल ज्ञवालीलाई पनि बैंकिङ कसुरको अभियोग लागेको छ । सोही अभियोगमा ज्ञवाली अहिले डिल्लीबजार जेलमा छन् ।

गोविन्दबाबु तिवारी

नेपाल बंगलादेश (एनबी) बैंकको कार्यवाहक प्रमुख कार्यकारी अधिकृतको जिम्मेवारी वहन गरिसकेका गोविन्दबाबु तिवारी अहिले फरक कार्यमा छन् । उनी धर्मगुरु बैष्णव कृष्णदास महाराजको सहयोगीको भूमिकामा छन् भने महायोग साधना पनि गरिरहेका छन् ।

प्रकाशित मिति: शुक्रबार, फागुन २४, २०७५ ०४:१३