फाइनलमा न्यू डायमन्डले फेरि एपीएफको सामना गर्ने

A+ A A-

होङ्वान्जी न्यू डायमण्ड राष्ट्रिय खुला महिला भलिबल प्रतियोगिताको उपाधिका लागि फेरि न्यू डायमण्ड क्लब र नेपाल एपीएफ क्लब भिँड्ने पक्का भएको छ । शनिबार भएको दोस्रो सेमिफाइनलमा नेपाल आर्मी क्लबलाई पराजित गर्दै न्यू डायमन्डले एपीएफसँगको भिडन्त पक्का गरेको हो ।

यस अघिका दुई संस्करणमा पनि यिनै दुई टोलीबीच फाइनल भिडन्त भएको थियो । पहिलो संस्करणमा आयोजक न्यू डायमन्डले उपाधी उचालेको थियो भने दोस्रो संस्करणमा एपीएफले बदला लिँदै च्याम्पियन बनेको थियो ।

न्यू डायमन्डले आर्मीलाई ३–० को सोझो सेटमा पराजित गर्दै फाइनलमा स्थान सुरक्षित गरेको हो । नयाँ बसपार्कस्थित ढोरपाटन क्लबको खेलमैदानमा न्यू डायमन्ड २५–१७, २५–१६ र २५–११ ले विजयी भएको थियो ।

राष्ट्रिय टोलीका तीन महत्वपूर्ण खेलाडी सम्मिलित न्यू डायमन्डले आइतबार एपीएफको सामना गर्नेछ । न्यू डायमन्डमा राष्ट्रिय टिमकी कप्तान अरुणा शाहीसहित प्रतिभा माली र लिबेरो सलिना श्रेष्ठ रहेका छन् ।

यसअघि शनिबार नै भएको पहिलो सेमिफाइनलमा एपीएफले पनि ३–० को सोझो सेटमा जित निकाल्दै फाइनलमा स्थान सुरक्षित गरेको थियो । नेपाल पुलिस क्लबविरुद्धको विधागीय डर्बीमा एपीएफले २५–१४, २५–१८ र २५–१७ को जित निकालेको थियो ।

एपिएफ र न्यू डायमण्डबीच आइतबार फाइनल दिउँसो १ः३० बजे सुरु हुने आयोजकले जनाएको छ । प्रतियोगिताका दुई अपराजित टिमबीचको फाइनल खेल अघि ११ः३० बजे पुलिस र आर्मीबीच तेस्रो स्थानका लागि प्रतिस्पर्धा हुनेछ ।

मुख्य प्रायोजक होङ्वान्जी बौद्ध समाज नेपाल रहेको प्रतियोगिताको विजेताले ४ लाख १ हजार १ रुपैयाँ प्राप्त गर्नेछ भने उपविजेतालाई ३ लाख १ हजार १ सय रुपैयाँ प्रदान गरिनेछ । यस्तै, तेस्रो हुने टिमले १ लाख ५१ हजार १ सय १ रुपैयाँ तथा चौथो हुनेले ५१ हजार १ सय १ रुपैयाँ प्राप्त गर्नेछन् ।

यसैगरी, प्रतियोगिताको सर्वोत्कृष्ट खेलाडीले २१ हजार १ सय १ रुपैयाँ प्राप्त गर्नेछन् । व्यक्तिगत विधातर्फ उत्कृष्ट स्पाइकर, ब्लकर, क्विकर, सेटर, सर्भर, डिफेन्डर र प्रशिक्षकले जनही ७ हजार १ सय १ रुपैयाँ प्राप्त गर्ने आयोजकले जनाएको छ ।

प्रकाशित मिति: शनिबार, पुस २६, २०७६ १७:५५