एपीएफ र न्यु डायमन्ड समूह विजेता बन्दै सेमिफाइनलमा

A+ A A-

डिफेन्डिङ च्याम्पियन एपीएफ क्लब र आयोजक न्यू डायमण्ड स्पोर्ट्स क्लब तेस्रो संस्करणको होङ्ग्वान्जी न्यू डायमण्ड खुला राष्ट्रिय महिला भलिबल प्रतियोगिताको सेमिफाइनलमा प्रवेश गरेका छन् ।

नयाँ बसपार्कस्थित ढोरपाटन क्लबको खेल मैदानमा शुक्रबार भएको समूह ‘ए’ अन्तर्गतको खेलमा एपीएफले पारामाउन्ट इंग्लिस स्कुल तथा त्रिभुवन आर्मी क्लब दुवैलाई सोझो सेटमा पराजित गर्दै समूह विजेता बनेको हो । पारामाउन्टको चुनौती २५–१८, २५–५ र २५–९ ले पाखा लगाएको एपीएफले विभागीय डर्बीमा आर्मीलाई २५–२१, २५–१२ र २५–२१ ले पराजित गरेको थियो ।

यस्तै, साविक उपविजेता न्यू डायमन्ड निकै प्रतिस्पर्धात्मक खेलमा विभागीय टिम नेपाल पुलिस क्लबलाई ३–२ को सेटमा पराजित गरेको हो । सुरुवाती दुई सेट २५–१९ र २५–२३ ले जितेको न्यू डायमन्डविरुद्ध कमब्याक गर्ने क्रममा पुलिसले त्यसपछिका दुई सेट २५–१७ र २५–१६ ले जितेको थियो । तर, अन्तिम तथा निर्णायक सेटमा १५–६ को जित निकाल्दै न्यू डायमन्ड समूह ‘बी’को विजेता बन्न सफल भयो ।

पराजित भएका पुलिस र आर्मीले समूहको उपविजेताका रुपमा अन्तिम चारमा स्थान पक्का गरेसँगै प्रतियोगिताको सेमिफाइनल समिकरण पूरा भएको छ । शनिबार एपीएफ र पुलिस तथा न्यु डायमन्ड र आर्मीबीच फाइनल प्रवेशका लागि प्रतिस्पर्धा हुनेछ ।

होङ्ग्वान्जी बौद्ध समाज नेपालको मुख्य प्रायोजनमा आयोजित प्रतियोगिताको विजेताले ४ लाख १ हजार १ सय रुपैयाँ नगद पुरस्कार प्राप्त गर्नेछ भने उपविजेताले ३ लाख १ हजार १ सय रुपैयाँ हात पार्नेछ । यस्तै, तेस्रो हुनेले टिमले १ लाख ५१ हजार १ सय १ रुपैयाँ तथा चौथो हुनेले ५१ हजार १ सय १ रुपैयाँ प्राप्न गर्नेछ ।

प्रतियोगिताको सर्वोत्कृष्ट खेलाडीलाई २१ हजार १ सय १ रुपैयाँ प्रदान गरिने पनि आयोजकले जनाएको छ । विभिन्न पोजिसनमा व्यक्तिगत रुपमा उत्कृष्ट प्रदर्शन गर्ने स्पाइकर, ब्लकर, क्विकर, सेटर, सर्भर, डिफेन्डर र प्रशिक्षकले पनि जनही ७ हजार १ सय १ रुपैयाँ प्राप्त गर्नेछन् ।

प्रकाशित मिति: शुक्रबार, पुस २५, २०७६ २१:३९