गरिब ठग्ने भगवान

A+ A A-

हँसिलो अनुहारका उनी मीठो स्वरले आफ्नो होटलमा खाजा खान ग्राहकलाई बोलाउँछन् । उनको अनुरोध सुन्नेहरू प्रायः उनीसँगै आउँछन् अर्थात् उनी काम गर्ने होटलमै आउँछन् ।

सुरुसुरुमा होटलमा भाँडाकुँडा धुने काम गरेका भए पनि अहिले उनी कालीगड (खाना पकाउने काम) बनेका छन् । होटलमै खान्छन् । बस्ने व्यवस्था साहुजीले मिलाइदिएका छन् । होटलमा पुग्नेलाई मीठो कुरा गरेर खुसी बनाइदिन्छन् ।

बैतडीको दोगडाकेदारका प्रकाश गिरी बालश्रमिकबाट यहाँसम्म आइपुगेका हुन् । हँसिलो मुहारका र रमाइलो गरिरहने स्वभावका उनीभित्रको दुःख भने कमैलाई थाहा छ ।

विगत एक–डेढ वर्षदेखि डडेल्धुरा सदरमुकाममा रहेको एक होटलमा काम गर्ने उनी सानैदेखि पढाइमा अब्बल थिए । पारिवारिक आर्थिक समस्याका कारण बीचमै पढाइ छाड्न बाध्य भए प्रकाश । पढेर ठूलो मान्छे बन्ने रहर थियो उनको । डाक्टर, पाइलट, इन्जिनियर बन्ने वा कुनै ठूलो सरकारी संस्थामा काम गर्ने उनको सपना थियो । तर, उनको सपना सपनामै सीमित रह्यो।

उनका बुबाले रातदिन रक्सी मात्रै पिउँथे । पागलको जस्तै व्यवहार देखाउँथे । बुबाको व्यवहारका कारण घरमा सधैँ झगडा भइरहन्थ्यो । घरमा खान, लगाउन समस्या थियो । त्यसैले पेट पाल्न होटलमा काम गर्न थालेको उनले सुनाए ।

‘पढ्ने रहर त छ नि, खान त पाइँदैन कहाँबाट पढ्नु !’, उनी भन्छन् । पढ्ने मन छँदाछँदै कक्षा ९ बाट पढ्न छाडेका हुन् उनले । ‘पढेर ठूलो मान्छे बन्ने रहर कसको नहोला र ?’, उनी भन्छन्, ‘भगवानले पनि हामी जस्ता गरिबलाई ठग्ने रहेछ । भगवानले नै ठगेपछि कसको के नै लाग्दो रहेछ !’

कहिल्यै नसोचेको र कल्पना पनि नगरेको कुरा होटलमा काम गर्नुपर्‍यो उनले । स्कुलमा पढ्दा मिहिनेती भएकै कारण साथी र आफूलाई पढाउने शिक्षकले भनेको कुरा उनी बारम्बार सम्झिन्छन् । उनलाई सबैले भन्थे, ‘तिमी ठूलो मान्छे बन्छौ ।’

‘सँगैका साथीहरू विद्यालयमा पढ्छन् । म भने होटलमा काम गरिरहेको छु । कहिलेकाहीँ साथीको फोन आउँछ’, उनी भन्छन्, ‘साथीहरू फोनमा पढाइको कुरा गर्छन् । मलाई नरमाइलो लाग्छ । मेरो घर परिवार पनि आर्थिक रूपमा सुविधा सम्पन्न भएको भए पढ्ने उमेरमा काम गर्नुपर्दैनथ्यो ।’

७ जनाको परिवार छ उनको । ४ दिदीबहिनी र आफू अनि आमाबुबा छन् परिवारमा । उनकी अमाले घरायसी काम गर्छिन् । ‘आमाले मिहिनेत गरेर दिदी र आफूलाई त अलिकति भए पनि पढाउनुभयो तर बहिनीहरूले भने गरिबीका कारण पढ्न नपाउने हुन् कि ? भन्ने पीरले होटलमा काम गरिरहेको छु’, उनले भने ।

घरमा खान, लगाउन पनि समस्या रहेको उनको भनाइ छ । अहिले उनी काम गरेवापत आएको पैसा घरमा आमालाई पठाउँछन् । सोही पैसाबाट घरपरिवारको साँझ बिहानको छाक टर्छ ।

‘अरूले खाएका जुठा भाँडा माझ्ने कसको रहर होला र ? बस्नलाई घरसमेत छैन’, उनको दुखेसो छ ।

झुपडीमा बस्नुपरिरहेको छ उनले । होटलमा काम गरेर आएको पैसा घर परिवारको छाक टार्नमै सीमित हुने गरेको उनी बताउँछन् ।

प्रकाशित मिति: शनिबार, पुस २६, २०७६ ०८:००