गहना लुट्न बुहारीहरूले गरे सासूको वीभत्स हत्या

A+ A A-

१७ पुसको साँझ करिब साढे ५ बजेको समय । इस्मा गाउँपालिका–३, दर्लामचौरकी ४० वर्षीया मसुरा नेपालीले कसैले चिच्याएको सुनिन्– मलाई नमार, गुहार ! गुहार !

मसुरा दोडिँदै आवाज भएतिर दगुरिन् । छिमेकीको घर रक्ताम्य थियो । छिमेकी ७६ वर्षीया कौशिला विकको अनुहार र टाउकोमा चोटैचोट थियो । रक्ताम्य थिइन् उनी ।

मसुराले हत्तपत्त घरभित्र रहेकी बुहारीलाई बोलाइन् । बिस्तारै गाँउले भेला भए । विकलाई तत्काल उपचारका लागि तम्घासहुँदै पाल्पा लगियो । तर, उपचार सम्भव भएन । बुटवल अस्पताल लैजान चिकित्सकले सुझाव दिए ।

बुटवल लैजाने रकम अभाव भयो । रकम नभएपछि पुनः घर फर्काइयो । छिमेकीहरू मिलेर जासोतसो रकम जोहो गरे । दुर्भाग्य ! कौशिलाले त्यस बेलासम्ममा संसार छाडिसकेकी थिइन् ।

यसरी भयो हत्या

मृतक कौशिलाकी कान्छी बुहारी देवी र जेठाजुकी कान्छी बुहारी लक्ष्मीले सासू कौशिलाको हत्या गर्ने र गहना लुट्ने योजना बनाउँछन् ।

योजनाअनुसार लक्ष्मीले गोरु फुकाइन् र दाउरो लिएर लुकेर बसिन् । देवीले गोरु फुकेको जानकारी सासूलाई गराइन् । फुकेको गोरु समाउन कौशिला गोठमा पुग्नैलाग्दा बुहारीले दाउराले हानेर भुइँमा ढालिन् ।

भुइँमा ढलेकी कौशिलाको दुई जना मिलेर बुलाकी, माडवारीलगायतका गहना फुकालेर लिए । कौशिलाको ज्यान गएको ठहर गर्दै लक्ष्मी आफ्नै घरतिर लागिन् भने देवी थाहा नपाएझैं गरी घरभित्रै बसिरहिन् ।

यो सत्य त्यसबेला उद्घाटित भयो, जब देवीले छिमेकी मसुरा नेपालीले खबर गरेपछि मात्र सासू लडेको देखेको नाटक गरेको प्रहरीसमक्ष बयान दिइन् ।

कौशिलाले गहनाको रूपमा नाकमा बुलाकी र कानमा माडवारी लगाएकी थिइन् । आफ्नै बुहारी लक्ष्मीसँग पनि उनको बेलाबेलामा झगडा परिरहन्थ्यो ।

सात वर्षपहिले पनि देवीले सासू–ससुरालाई खानामा विष राखेर दिई मार्ने प्रयास गरेकी थिइन् । संयोगले बिरामी परे पनि त्यतिबेला उनीहरू बाँचे ।

त्यो बेलादेखि नै देवी सासू–ससुरासँग एउटै घरमा छुट्टिएर बसेकी थिइन् । केही महिनापहिले पनि देवीले सासूलाई कुटेको प्रत्यक्षदर्शी छिमेकीहरूको भनाइ छ ।

झगडा भइरहने मुख्य कारण भने मदिरा भएको छिमेकीहरू बताउँछन् । इस्मा गाउँपालिका जिल्लाकै अत्यधिक घरेलु मदिरा उत्पादन र विक्री हुने क्षेत्रका रूपमा चिनिन्छ ।

मृतक कौशिलाकी जेठाजुकी बुहारी लक्ष्मी पनि मदिराको लतमा रहेको स्थानीयको भनाइ छ । लक्ष्मी मात्र होइन, उनका श्रीमान् र ससुरासमेत मदिराका पारखी हुन् ।

मदिरा खाने रकम अभावकै कारण सासूको गहना लुट्ने योजना बनाएको अभियुक्तद्वयले प्रहरीसमक्ष स्वीकार गरेका छन् ।

घटना भएको एक साता पुग्न लाग्दा प्रहरीले दुवै बुहारीलाई प्रक्राउ गर्‍यो । तर, अझै केही तथ्यहरू भने रहस्यमय नै रहेको प्रहरीको भनाइ छ ।

अभियुक्तले सुरुमा मृतकको गहना हराएको बताए । तर, दुई दिनपछि गोवरभित्र लुकाइएको अवस्थामा गहना फेला पर्‍यो ।

उता घटना भएकोे केही दिनपछि गोरुको सिङको फेदमा रगतको नमुनाको रूपमा रातो रङ लगाइएको भेटिएको प्रहरीको भनाइ छ । सिङमा देखिएकोे रङ रगत नभई नङपोलिस भएको प्रहरीको भनाइ छ ।

प्रहरीका अनुसार हत्यापछि गोरुले हानेर सासूको मृत्यु भएको देखाउन यो नाटक गरिएको हो । अभियुक्तद्वयले हत्या गरेको स्वीकार गरे पनि गोरुको सिङमा रङ नदलेको बताएको प्रहरीको भनाइ छ । यतिबेला हत्यामा दुई जना बुहारीको मात्र संलग्नता होइन कि भन्ने शंकासहित प्रहरी थप अनुसन्धानमा जुटेको छ ।

मृतक कौशिलाका श्रीमान् शेरबहादुरले ‘घटनाको सत्यतथ्य छानबिन गरी पाऊँ’ भन्दै जिल्ला प्रहरी कार्यालय, गुल्मीमा उजुरी दिएपछि प्रहरी यतिबेला थप अनुसन्धानमा जुटेको जिल्ला प्रहरी कार्यालय गुल्मीका सूचना अधिकारी मीनबहादुर घलेले जानकारी दिए ।

प्रकाशित मिति: शुक्रबार, पुस २५, २०७६ १८:३०