प्रिन्स प्रेसिडेन्ट कपको सेमिफाइनलमा

A+ A A-

ब्याडमिन्टनका उदीयमान खेलाडी प्रिन्स दाहाल काठमाडौंमा जारी ‘प्रेसिडेन्ट कप नेपाल इन्टरनेसनल सिरिज २०२०’ को पुरुष एकल तर्फ अन्तिम चारमा स्थान बनाउन सफल भएका छन् । उनले भारतका खेलाडी आयन रसिदलाई २१–१० र २१–९ ले पराजित गर्दै सेमिफाइनलमा आफ्नो स्थान पक्का गरेका हुन् ।

तर, उनी मिक्स डबल्समा भने पराजित हुन पुगे । रसिला महर्जनलाई जोडी बनाएका प्रिन्स भारतका आयन रसिद र तस्निम मिरको जोडीसँग २४–२६, २१–१४ र २१–८ ले पराजित हुन पुगे ।

नेपाल ब्याडमिन्टन संघको आयोजनामा भएको प्रतियोगिताको महिला एकल तर्फ निता लम्साल नेपालकै निलिमा महरालाई २१–१२ र २१–६ ले पराजित गर्दै अन्तिम चारमा स्थान बनाउन सफल भइन् । यस्तै, निताले दोहोरो जित निकाल्ने क्रममा गोकुल जोरासँग मिलेर मिक्स डबल्समा नेपालकै नरेन्द्र बम र निलिमा महराको जोडीलाई २१–१६ र २१–१३ ले पराजित गर्दै सेमिफाइनलमा स्थान सुरक्षित गरिन् ।

पुरुष एकल तर्फको अर्को खेलमा नेपालका नरेन्द्र बम श्रीलंकाका दुमिन्दु अवेविक्रमासँग २१–७ र २१–९ को सोझो सेटमा पराजित हुन पुगे । पुरुष एकलतर्फ भारतका अभिन वशिष्ठले श्रीलंकाका दिगायु कहातापितियालाई २१–१५ र २१–८ ले तथा भारतका मिरब लुवाङले आफ्नै देशका शिभम कुमार मिश्रलाई २१–१२ र २१–१६ ले पराजित गर्दै सेमिफाइनलमा स्थान पक्का गरे ।

दशरथ रङ्गशालाको कभर्डहलमा भएको प्रतियोगितामा रशिला महर्जन एकल प्रतिस्पर्धामा पनि पराजित भइन् । महर्जन मलेसियाकी करुपथेभन लेत्शानासँग २१–१४ र २१–१२ को सेटमा पराजित भएकी हुन् ।

यस्तै, सीमा राजवंशी भारतकी अनुपमा उपाध्यायसँग २१–९, २१–७ ले पराजित भइन् भने भारतकी तस्निमा मिरले मलेसियाकी सरन्या कविलानलाई २१–९ र २१–३ को सेटमा पराजित गरिन् ।

पुरुष युगलतर्फ नेपालका अमृत चौधरी र जे.बी. साउदको जोडी नेपालकै डेभिड थापा मगर र युनिश राईको जोडीलाई २१–१६ र २१–१२ ले पराजित गर्दै सेमिफाइनल प्रवेश गरे । अन्य खेलमा भने नेपाली खेलाडीले पराजय भोगे ।

श्रीलंकाका दुमिन्दु अवेविक्रमा र दिगायु कहातापितियाको जोडीले नेपालका योगेश खड्का र सत्यम सुब्बाको जोडीलाई २१–१० र २१–१० ले तथा भारतका आर. विकास प्रभु र अरुण कार्थिकको जोडीले नेपालका गोकुल जोरा र प्रियान्शु सिंह क्षेत्रीको जोडीलाई २१–१० र २१–१८ ले पराजित गर्दै सेमिफाइनल प्रवेश गरे ।

मिक्स डबल्सतर्फ नेपालका पेम्बा शेर्पा र सीमा राजवंशीको जोडीले अमृत चौधरी र विष्णा बिष्टको जोडीलाई २१–१४ र २१–१० को सेटमा पराजित गर्दै सेमिफाइनल प्रवेश गरे भने जे.बी. साउद र प्रसुना खत्रीको जोडी भारतका मुरुगप्पा के.एस. र सानिया सिकन्दरको जोडीसँग २१–२, २१–७ ले पराजित हुन पुगे ।

प्रकाशित मिति: बिहीबार, पुस २४, २०७६ २१:०७