अस्ट्रेलियनले नै लगाउँछन् जंगलमा आगो

A+ A A-

६ जनवरीमा गायिका रिहान्नाले एउटा ट्विट गरिन्, जसमा सिंगो अस्ट्रेलियालाई आगोले लपेटेको तस्वीर राख्दै लेखेकी छन्, ‘डिभास्टिङ’ अर्थात् विनाशकारी ।

यो एउटा उदाहरण मात्रै हो, अस्ट्रेलियामा भइरहेको भीषण आगलागीबारे सबैलाई सचेत गराउने उद्देश्यका साथ विश्वभरिबाट यसरी तस्वीरहरू शेयर भइरहेका छन् । गत सेप्टेम्बरदेखि अस्ट्रेलिया आगोको चपेटामा परेको छ ।

जुन आगो हालसम्मकै सबैभन्दा भयानक आगलागीमध्ये एक पनि हो । गत वर्षभरि नै ब्राजिलको अमेजन जंगलमा यस्तै भीषण आगलागी हुँदा लाखौं हेक्टर जमिनमा फैलिएको जंगल विनाश भएको थियो ।

अस्ट्रेलियामा भइरहेको आगलागीबाट हालसम्म दुई दर्जभन्दा बढीको मृत्यु भइरहेको छ भने लाखौं जनावर मारिएका छन्, सयौं मानिसहरू घरबारविहीन बनेका छन् ।

अस्ट्रेलियामा यस वर्ष इतिहासकै सबैभन्दा गर्मी बढेको छ । तर, सामाजिक सञ्जालमा भाइरल भएको जस्तो सिंगो अस्ट्रेलिया एकैपटक आगलागीको चपेटामा परेको होइन ।

बरु अस्ट्रेलियामा गत वर्षको सेप्टेम्बरदेखि भएको आगलागीका क्रममा एक महिनाको अवधिमा आगो लागेका क्षेत्रको तथ्यांक संकलन गरेर कलाकार एन्थोनी हियरजीले बनाएको तस्वीरको ‘भिजुअलाइजेसन’ को तस्वीर हो । यो तस्वीरले अस्ट्रेलियाभर एकैपटक आगो लागेको जस्तो भ्रम सिर्जना भएको छ ।

कसरी सुरु भयो आगलागी ?

अस्ट्रेलियामा हरेक वर्ष आगलागीका घटना हुन्छन् । त्यहाँ रहेको ठूला ठूला झाडीहरूमा बर्सेनि हुने आगलागीले सानो–ठूलो नोक्सानी गर्ने गरेको थियो । तर, यस वर्ष भने आगलागीको घटना निकै भीषण भयो ।

आगलागीका कारण राष्ट्रिय जनावर कंगारु मरेका, अंकमाल गर्दै गरेका, अगोमा रौं जलेर नांगो शरीर भएका हृदयविदारक तस्वीरहरू यतिबेला सामाजिक सञ्जालमा प्रशस्तै पाइन्छन् । अझै पनि अस्ट्रेलियाको आगो नियन्त्रणबाहिर छ ।

अस्ट्रेलियाका प्रधानमन्त्री स्कट मोरिसनले गत सातामात्रै आगो नियन्यणका लागि ३ हजार सैनिक परिचालन गर्ने घोषणा गरेका थिए ।

यस्ताे बेला अस्ट्रेलियामा सैनिकबाहेक नै १ हजार ५ सय अग्नि नियन्त्रकहरूले आगो निभाउने काम गरिरहेका छन् । हजारौं स्वयंसेवकहरू स्वतःस्फूर्त रूपमा आगो निभाउन खटिएका छन् । अस्ट्रेलियामा आगो निभाउनकै लागि यति ठूलो मात्रामा सेना परिचालन गर्नुपरेको यो पहिलो घटना हो ।

आगलागीका कारण अहिलेसम्म २५ जनाले ज्यान गुमाएका छन् भने २ हजारभन्दा बढी घर, लाखौं हेक्टर जमिनमा रहेका रुखहरू र पशुपक्षी खरानी बनेका छन् ।

आगलागीका कारण बिदा मनाउन विभिन्न स्थानमा पुगेकालाई तत्काल उद्धार गर्नुपरेको छ भने आगलागीबाट देशको बाँकी क्षेत्रसँग सम्बन्धविच्छेद भएका स्थानमा रहेकालाई पानी, खानेकुरा र आवश्यक इन्धन पुर्‍याउन सैनिक जहाज र विमानहरू प्रयोग गर्नुपरेको छ ।

अस्ट्रेलियामा लामो खडेरी, ठूलो हुरीबतास र अत्यधिक तापक्रम यो विध्वंसकारी आगलागीको मुख्य कारण हो । कतिपय स्थानमा भने स्थानीयवासीहरूले नै जंगलमा लगाएको आगाेले भीषण रूप लिएको समेत पाइएको छ ।

मुख्य शहर सिड्नी रहेको राज्य न्यू साउथ वेल्स र क्विन्सल्याण्डमा २०१७ देखि नै कम वर्षा भइरहेको थियो । अस्ट्रेलियाका ६ मध्ये चार राज्यमा अनियन्त्रित रूपमा आगो फैलिएको छ ।

आगो लगाउने सयौं पक्राउ

अस्ट्रेलियामा जानीजानी जंगलमा आगो लगाउने कार्यमा संलग्न सयौंलाई प्रहरीले पक्राउ गरिसकेको छ ।

यसरी आगो लगाउने व्यक्तिहरू सबैभन्दा प्रभावित न्यू साउथ वेल्स, क्विन्सल्यान्ड, भिक्टोरिया, दक्षिण अस्ट्रेलिया र तस्मानियाबाट पक्राउ परेका छन् ।

न्यू साउथ वेल्समा नोभेम्बरपछि मात्र १ सय ८३ जना विरुद्ध मुद्दा दर्ता गरिएको छ भने २४ जनालाई जानीजानी आगो लगाएको भन्दै पक्राउ गरिएको छ ।

भिक्टोरियामा ४३ जनामाथि मुद्दा चलाइएको छ भने क्विन्सल्यान्डमा १ सय १ जनालाई पक्राउ गरिएको छ । यसरी पक्राउ पर्नेमा ७० प्रतिशत नाबालिग थिए ।

अस्ट्रेलियामा अहिले जति क्षेत्रमा भीषण आगो फैलिएर संकट उत्पन्न भएको छ, त्यसमध्ये ५० प्रतिशत आगो जानीबुझीकन लगाएकाले फैलिएको स्वीनबर्न विश्वविद्यालयका फोरेन्सिक बिहेभियरल साइन्सका निर्देशक जेम्स ओग्लाफ बताउँछन् ।

मेलबर्न विश्वविद्यालयका एसोसिएट प्राध्यापक जेनेट स्टेनली भन्छन्, ‘आगो लगाउनेहरू आम रूपमा १२ देखि २४ वर्षका युवा र ६० वर्षभन्दा माथिका वृद्धहरू छन्, जो आगो हेर्न मन पराउँछन् ।’ एजेन्सीको सहयोगमा

प्रकाशित मिति: बुधबार, पुस २३, २०७६ १५:१४