कराते च्याम्पियनसिपमा सहभागी हुन नेपाली टोली भारत प्रस्थान

A+ A A-

नेपाली कराते खेलाडीको टोली मंगलबार बिहान भारत प्रस्थान गरेको छ । कलकत्ताको उलबरियास्थित रवीन्द्र भवनमा हुने नवौं अन्तर्राष्ट्रिय कराते च्याम्पियनसिप तथा अन्तर्राष्ट्रिय स्पाेर्ट्स एक्सेलेन्स अवार्ड २०२० मा भाग लिन उक्त टाेली भारत प्रस्थान गरेकाे हाे ।

पुस २४, २५ र २६ गते तीन दिनसम्म चल्ने प्रतियोगितामा भाग लिन करातेका मुख्य प्रशिक्षक तथा जापान गोजुरियाे डो मिसनका संस्थापक केबी राना (काजी) को नेतृत्वमा २० जना खेलाडी र ७ अफिसियलसहित २७ जनाको टोली त्यसतर्फ लागेको हो ।

टोलीलाई एक कार्यक्रमका बीच नेपाल–भारतको दसगजा क्षेत्र बेलहियामा तिलोत्तमा नगरका प्रमुख वासुदेव घिमिरेलगायत सरकारी अधिकारीले बिदाइ गरे । खेलाडीहरूको बिदाइ कार्यक्रममा बोल्दै नगर प्रमुख घिमिरेले नेपाली खेलाडीले देशको नाम उचो राख्ने गरी विजय हासिल गर्ने विश्वास व्यक्त गरे ।

सो अवसरमा नेपाली टोलीका प्रमुख प्रशिक्षक काजी रानाले विगतमा झैं कलकत्ताको खेल मैदानमा नेपालको झन्डा फहराएर आउने बताए । नगर प्रमुख घिमिरेले नेपालको राष्ट्रिय झन्डा हस्तान्तरण गर्दै खेलाडी तथा अफिसियललाई बिदाइ गरे ।

जापान गोजुरियोको नेतृत्वमा यसअघि पनि अन्तर्राष्ट्रिय प्रतियोगितामा भाग लिएकामध्ये तीनवटा प्रतियोगितामा काजीको नेतृत्वको कराते टोली टिम च्याम्पियनसिप भइसकेको छ ।

पूर्व मेदीनीपुर हल्दिया कराते गेम्स एन्ड स्पाेर्ट्स एसाेसिएसन एन्ड सितेरियो कराते अफ इन्डियाको आयोजनामा हुने नवौं अन्तर्राष्ट्रिय कराते च्याम्पियनसिप २०२० प्रतियोगितामा पनि नेपाली टिमले उत्कृष्ट प्रदर्शन गर्दै टिम च्याम्पियन बन्ने विश्वास कराते महासंघ पश्चिमाञ्चलका पूर्वअध्यक्ष भरतबहादुर केसीले गरे ।

टोलीमा यसअघिको प्रतियोगितामा स्वर्ण पदक विजेता खेलाडीहरू रूपा राना, सन्तु थारू, विपिन गुरुङ, सुमन परियार, साहिल गुरुङलगायत खेलाडीको सहभागिता छ ।

प्रकाशित मिति: मंगलबार, पुस २२, २०७६ १६:२६