होर्डिङ बोर्ड राख्ने होडबाजी, कुरूप बन्दै धनगढी

A+ A A-

सुदूरपश्चिम प्रदेशको अस्थायी राजधानी धनगढीमा राखिएका अव्यवस्थित होर्डिङ बोर्डका कारण धनगढी बजार कुरूप बन्दै गएको छ ।

विभिन्न स्थानमा राखिएका होर्डिङ बोर्डले दुर्घटनाको जोखिमसमेत बढाएको छ । धनगढीका अधिंकाश स्थानमा जनचेतनामूलकभन्दा विभिन्न व्यापारिक प्रचारमुखी होर्डिङ बोर्ड राखिएका छन् ।

तर यिनको व्यवस्थापनका लागि सम्बन्धित निकायले चासो दिएका छैनन् । सुदूरपश्चिम प्रदेशको प्रमुख व्यापारिक केन्द्र धनगढीमा कुनै पनि वस्तुको सबैभन्दा बढी व्यावसायिक कारोबार हुन्छ ।

व्यावसायिक कारोबारको प्रतिस्पर्धाका लागि विज्ञापनको होडबाजी चल्छ । कारोबार बढाउन हुने यो होडबाजीमा वस्तु व्यापारका विज्ञापनका होर्डिङ बोर्डले धनगढी दिनदिनै कुरूप हुँदै गएको छ ।

जसका कारण दुर्घटनाको जोखिम समेत बढ्दै गएको धनगढी हसनपुरका प्रताप सेरालाले बताए । यिनको व्यवस्थापनका लागि सरोकारवाला कसैको ध्यान नगएको उनको गुनासो छ ।

सार्वजनिक स्थानमा ठूला होर्डिङ बोर्ड राख्न पाइँदैन । तर, नियम विपरीत जथाभावी धनगढी चौराहा, पार्कमोड, हसनपुर, क्याम्पस चोकलगायतका मुख्य बजारमा होर्डिङ बोर्ड राखिएको छ ।

अव्यवस्थित होर्डिङ बोर्डका कारण सडकको सौन्दर्य गुमेको र सर्वसाधारणलाई आवतजावतमा समेत समस्या परिरहेको छ ।

धनगढी राजपुरका हरिश थापाले भने, ‘जानकार भएर पनि धनगढी उपमहानगरपालिकाले कारबाही अघि नबढाउँदा व्यापारिक कारोबारका होर्डिङ बोर्ड होटेल, किराना पसलदेखि मदिरा पसलसम्म सडक नै छोप्ने गरेर राखिएको छ ।’

नियम विपरीत राखिएका होर्डिङ बोर्डका कारण सर्वसाधारणले सडक पेटीमा समेत सहजै हिँडडुल गर्न कठिनाइ भोग्नु परेको छ । अव्यवस्थित होर्डिङ बोर्डका कारण सडक सौन्दर्य गुमेको र सर्वसाधारणलाई आवत जावतमा समेत समस्या पर्न थालेको स्थानीयवासी बताउँछन् ।

विभिन्न मदिरा कम्पनीका बोर्ड, शैक्षिक संस्थाका बोर्ड, विभिन्न व्यावसायिक प्रयोजनका होर्डिङ बोर्डहरू समेत मुख्य बजार क्षेत्रमै राखिएका छन् । प्रशासनकै आँखा अगाडि यस्ता होर्डिङ बोर्ड प्रशस्तै भेटिए पनि कानुनी कारबाहीका लागि चासो देखाएको पाइदैन ।

तर टा«फिक प्रहरी प्रमुख सरोज ठकुराठी भने होर्डिङ बोर्ड हटाउने विषयमा छलफल भइरहेको बताउँछन् । विज्ञापन प्रयोजनका लागि बनाइएको होर्डिङ बोर्ड सार्वजनिक स्थानमा राखिँदा सहर कुरूप भएसँगै दुर्घटनाको समेत उच्च जोखिम रहेको उनको भनाई छ ।

उनले भने, ‘सार्वजनिक स्थानमा होर्डिङ बोर्ड राख्न पाइँदैन, यसले सहरी सौन्दर्य बिगारेको छ, धनगढी उपमहानगरपालिकाले यस विषयमा अनुगमन गरेर सार्वजनिक स्थानमा राखेका होर्डिङ बोर्ड हटाउनु पर्छ ।’

होर्डिङ बोर्डले धनगढी कुरूप बनाएको विषयमा अनुगमन गर्ने निकाय धनगढी उप महानगरपालिका पनि जानकार छ ।

धनगढी उपमहानगरपालीका मेयर नृप वडले जथाभाबी राखिएको होर्डिङ बोर्ड हटाउन निर्देशन दिइसकेको दाबी गरे । अटेरी गरेको पाइएमा कारबाही गरिने उनले बताए ।

धनगढीका विभिन्न स्थानमा अब व्यापारिक होर्डिङ बोर्ड हटाएर चेतनामूलक राखिने उनले बताए । सडक पेटीदेखि, घर, विद्युतका पोल, रुखमा समेत होर्डिङ बोर्ड राखिएको छ ।

ठूल्ठूला होर्डिङ बोर्ड राखिएकै कारण हावाहुरीले झारेर दुर्घटना निम्त्याउने जोखिम बढेपनि सम्बन्धित निकायले ध्यान नदिएको स्थानीयको आरोप छ ।

सरकारी बाहेकका निजी जग्गामा बोर्ड राख्दा सडकतर्फ कम्तीमा १० फिट जमिन छोडेको हुनुपर्ने र उचाइको हकमा जमिन सतहबाट बढीमा ३० फिट मात्र हुनुपर्ने, अनिवार्य रूपमा बोर्डमा सोलार बत्ती जडान गरेको हुनुपर्ने विज्ञापन नीतिमा उल्लेख छ ।

प्रकाशित मिति: मंगलबार, पुस २२, २०७६ १५:३६