महानगर कप भलिबलः ललितपुर र चौतारा क्वार्टरफाइनलमा

A+ A A-

ललितपुर महानगरपालिका र चौतारा नगरपालिका यहाँ जारी महानगर कप पुरुष तथा महिला भलिबलअन्तर्गत पुरुषतर्फको क्वार्टरफाइनलमा प्रवेश गरेका छन् ।

ललितपुरको जाउलाखेलस्थित जाउलाखेल भलिबल प्रशिक्षण केन्द्रमा सोमबार भएको खेलमा चौतारा नगरपालिकाले भक्तपुर नगरपालिकालाई ३–० सेटले पराजित गर्‍यो । चौताराले भक्तपुरलाई २५–१४, २५–२१ र २५–२१ अङ्कले हराएको हो ।

समूह ‘ए’ मा रहेको चौतारा पहिलो भई छ अङ्कसहित क्वार्टरफाइनलमा प्रवेश गरेको छ । यस्तै समूह ‘ए’बाट चार अङ्कसहित दोस्रो भएको ललितपुरसमेत क्वार्टरफाइनलमा पुगेको छ । सो समूहमा रहेको भक्तपुर नगरपालिका प्रतियोगिताबाट बाहिरिएको प्रतियोगिता प्रचारप्रसार उपसमितिकी संयोजक निलम बज्राचार्यले जानकारी दिइन् ।

यस्तै समूह ‘सी’बाट महालक्ष्मी तथा पनौती नगरपालिका पुरुषतर्फको खेलमा क्वार्टरफाइनलमा पुगेका छन् । उक्त समूहबाट टोखा नगरपालिका बाहिरिएको छ । समूह ‘डी’अन्तर्गतको खेलमा पुरुषतर्फ गोकर्णेश्वर तथा कमलामाई नगरपालिका आ–आफ्नो खेलमा विजयी भएका छन् । गोकर्णेश्वरले धुलिखेल नगरपालिकालाई २५–२३, २५–१४ र २५–१९ अङ्कले हरायो । यस्तै कमलामाईले गोदावरी नगरपालिकालाई २५–१३, २५–१८ र २५–१८ अङ्कले पराजित गर्‍यो ।

यसैगरी महिलातर्फको खेलमा विदुर, गोकर्णेश्वर र चन्द्रागिरि नगरपालिका विजयी भएका छन् । विदुरले टोखा नगरपालिकालाई २५–२२, २५–५, २३–२५ र २५–९ अङ्कले हरायो । गोकर्णेश्वरले हेटौंडालाई २५–१६, २५–११ र २५–२२ अङ्कले तथा चन्द्रागिरिले बनेपा नगरपालिकालाई २५–७, २५–९ र २५–५ अङ्कले पराजित गर्‍यो ।

ललितपुर महानगरपालिकाले आफ्नो १०१औँ स्थापना दिवसका अवसरमा उक्त प्रतियोगिता आयोजना गरेको हो । प्रतियोगितामा पुरुषतर्फ १३ तथा महिलातर्फ आठ नगरपालिका सहभागी रहेको संयोजक बज्राचार्यले बताए ।

पुरुष तथा महिला भलिबलका विजेताले दुई लाख, उपविजेताले एक लाख, तेस्रो हुनेले ५० हजार र चौथो हुनेले २५ हजार रुपैयाँ पुरस्कार प्राप्त गर्नेछन् । रासस

प्रकाशित मिति: मंगलबार, पुस २२, २०७६ ०८:१६