सुदूरपश्चिम प्रदेशको हिउँदे अधिवेशन ६ माघबाट

A+ A A-

सुदूरपश्चिम प्रदेशको हिउँदे अधिवेशन ६ माघबाट हुने भएको छ । सोमबार बसेको सुदूरपश्चिम प्रदेशको मन्त्री परिषद् बैठकले ६ माघ दिउँसो २ बजे बैठक आह्वान गर्न प्रदेश प्रमुखलाई सिफारिस गर्ने निर्णय गरेको हो ।

मन्त्रिपरिषद्को बैठकले निर्णय गरेपछि प्रदेश प्रमुखले अधिवेशन आह्वान गर्ने संवैधानिक व्यवस्था छ ।

सोमबार मुख्यमन्त्री तथा मन्त्रिपरिषद्को कार्यालयमा बसेको मन्त्रिपरिषद्को बैठकले छाउपडी प्रथा उन्मूलन नीति, २०७६ पनि स्वीकृत गरेको छ । सुदूरपश्चिम प्रदेशका पहाडी जिल्लामा व्याप्त छाउपडी प्रथा अन्त्यका लागि सरकारले पारित गरेको नीति महत्त्वपूर्ण हुने अपेक्षा गरिएको छ ।

यस्तै, सुदूरपश्चिम प्रदेशको अस्पताल व्यवस्थापन समिति गठन आदेश, २०७६ संशोधन गर्ने विषय पनि पारित भएको छ । सुदूरपश्चिम प्रदेश अनुसन्धान तथा प्रशिक्षण प्रतिष्ठानका सम्बन्धमा व्यवस्था गर्न बनेको विधेयकको मस्यौदा प्रदेशसभामा पेश गर्ने प्रस्तावमा पनि स्वीकृति प्रदान भएको छ ।

त्यस्तै, मुख्य न्यायाधिवक्ताको काम, कर्तव्य र अधिकार तथा सेवाका सर्तसम्बन्धी ऐन, २०७५ को दफा ११ बमोजिम सुदूरपश्चिम प्रदेशका मुख्य न्यायाधिवक्ता प्रदेश प्रमुखसमक्ष पेश गर्न भएको वार्षिक प्रतिवेदन मुख्यमन्त्रीको तर्फबाट आन्तरिक मामिला तथा कानुन मन्त्रालयका मन्त्रीमार्फत प्रदेश सभामा पेश गर्ने विषय स्वीकृत भएको छ ।

साझेदारी व्यवसाय दर्ता गर्ने सम्बन्धमा व्यवस्था गर्न बनेको विधेयक, २०६७ को मस्यौदा पनि पेश भएको छ भने निजी व्यवसाय दर्ता गर्ने सम्बन्धमा व्यवस्था गर्न बनेको विधेयक २०७६ को मस्यौदा स्वीकृत भएको छ ।

यसैगरी, कोल्ड स्टोर च्याम्बर र राइपेनिङ च्याम्बर स्थापना तथा सञ्चालन कार्यविधि, २०७६ स्वीकृत भएको छ । प्राकृतिक विपतबाट कृषि एवं पशुपन्छी व्यवसायको क्षेत्रमा पुर्‍याएको क्षतिमा राहत प्रदानसम्बन्धी मापदण्ड, २०७६ पनि स्वीकृत भएको छ ।

सुदूरपश्चिम प्रदेश स्वयंसेवक परिचालन कार्यविधिको मस्यौदा २०७६ पनि स्वीकृत गरिएको छ ।

प्रकाशित मिति: सोमबार, पुस २१, २०७६ १८:३१