सुन किन्नेभन्दा बिक्री गर्ने बढे

A+ A A-

सुनको मूल्य लगातार उकालो लागेसँगै स्थानीय बजारमा सुनको खपत ह्वात्तै घटेको छ । नेपाल सुनचाँदी व्यवसायी महासंघका अनुसार पछिल्लो समय सुनको व्यापार ७५ प्रतिशतले घटेको छ ।

दैनिक करिब २५ देखि ३० किलो सुन खपत हुँदै आएको नेपाली बजारमा अहिले मुश्किलले १० किलो सुन पनि बिक्री हुन नसकेको महासंघका अध्यक्ष मोहनकुमार विश्वकर्माले जानकार दिए ।

लगातार सुनको मूल्य वृद्धि भएसँगै सुन खरिद गर्नेभन्दा गहना बिक्री गर्ने बढेका छन् । राजधानीका चलेका सुन पसलमा नयाँ गहना खरिद गर्नेको संख्या अत्यन्त न्यून छ ।

सुनको भाउ घटेको समयमा गहना बनाएका सर्वसाधारणले मूल्य बढेको भन्दै गहना बिक्री गर्न थालेका छन् । पछिल्लो समय विश्व बजारमा देखिएको व्यापार द्वन्द्वका कारण सुनको मूल्यमा भारी वृद्धि हुन थालेको हो ।

चीन र अमेरिकाबीच हुने भनिएको वाणिज्य वार्ता निष्कर्षमा पुग्न नसक्दा पनि सुनको मूल्य वृद्धिमा सघाउ पुगेको अध्यक्ष विश्वकर्माले बताए । इकोनोमिक्स टाइम्सले पनि पछिल्लो सात वर्षमा सुनको मूल्यमा अहिलेसम्मकै उच्च वृद्धि भएको जनाएको छ ।

मध्यपूर्वी क्षेत्रमा देखिएको तनावका कारण सुरक्षित लगानी ठानिएको सुनमा अत्यधिक आकर्षण बढेको छ । विश्वबजारमा आज सुनको मूल्य प्रतिऔँस १५७३.५० अमेरिकी डलर पुगेको छ । भारतीय बजारमा छापावाला सुनको मूल्य प्रति १० ग्राम ४० हजार १० भारु र तेजाबी सुन प्रति १० ग्राम ३८ हजार १ सय भारु तोकिएको छ ।

नेपाली बजारमा पनि आज सुनको मूल्य प्रतितोला ५ सय रुपैयाँले वृद्धि भएको छ । महासङ्घले सोमबारका लागि छापावाला सुनको मूल्य प्रतितोला ७६ हजार रुपैयाँ निर्धारण गरेको छ ।

यस्तै, तेजाबी सुनको मूल्य प्रतितोला ७५ हजार ७ सय रुपैयाँ कायम गरेको छ । यस्तै चाँदीमा पनि मूल्यवृद्धि भएको छ । आइतबार प्रतितोला ९ सय रुपैयाँमा कारोबार भएको चाँदी आज प्रतितोला २० रुपैयाँले वृद्धि भएको छ ।

पुस महिनामा मात्रै स्थानीय बजारमा प्रतितोला ४ हजार ५ सय रुपैयाँले मूल्य वृद्धि भएको छ । १ पुसमा छापावाल सुन प्रतितोला ७१ हजार ५ सय रुपैयाँमा कारोबार भएको थियो भने तेजाबी सुन प्रतितोला ७१ हजार २ सय रुपैयाँमा कारोबार भएको थियो ।

यस्तै, प्रतितोला ८ सय ५० मा कारोबार भएको चाँदी आजको दिनमा आइपुग्दा ७० रुपैयाँले वृद्धि भएको छ । रासस

प्रकाशित मिति: सोमबार, पुस २१, २०७६ १५:१४