पूर्वाधार निर्माणको जस लिन होडबाजी

A+ A A-

‘गाउँगाउँमा सिंहदरबार’को सरकारी नाराप्रति आमसर्वसाधारण विश्वस्त बन्न नसकिरहेका बेला पूर्वाधार विकासको जस लिने होडमा जुटेका दलबीचको जुहारीले जनतामा नैराश्य बढाएको छ ।

प्रदेश १ सरकार मातहत रहेको भौतिक पूर्वाधार विकास मन्त्रालयको ३२ करोड ८६ लाख ६ हजार ९ सय १८ रुपैयाँको लागतमा सुनसरीको इनरुवा नगरपालिकामा ढल नालासहितको कालोपत्रे सडक निर्माणको काम थालिएको छ ।

सोही सडक खण्ड निर्माण यतिबेला सत्ता पक्ष र प्रतिपक्षी दलका नेताहरूका लागि जुुँगाको लडाइँ बन्न पुगेको छ । स्थानीय तह निर्वाचनमा एमालेबाट अध्यक्षसहितका जनप्रतिनिधि जितेकोे सो वडामा सञ्चालित उक्त योजना वडा कार्यालयले नितान्त आफूहरूको पहलमा ल्याएको नेकपा पक्षधरको दाबी छ ।

नेपाली कांग्रेसका नेताहरूले उक्त योजना पार्नमा आफूहरूको योगदान रहेको भन्दै निर्माणाधीन सडक शिलान्यास नै गरिदिएपछि नेकपा र कांग्रसबीच आरोप र प्रत्यारोपको अवस्था सिर्जना हुन पुगेको छ ।

प्रदेश सांसदसमेत रहेका प्रदेश १ का प्रमुख प्रतिपक्षी दलका नेता राजीव कोइरालाले इनरुवा– ६ मधेसा खण्डको शिलान्यास गरेसँगै ३२ करोड रुपैयाँको जस लिने विषय चरम उत्कर्षमा पुगेको छ ।

वडा कार्यालयले त पत्रकार सम्मेलन नै आयोजना गरी कांग्रेसको कदमप्रति खेद प्रकट गरेको छ । कांग्रेसले वडावासीमा भ्रम छर्ने काम गरेको भन्दै वडाका प्रतिनिधिहरूले झुटको खेती नगर्न सुझाएको छ ।

नेकपाबाट निर्वाचित वडाअध्यक्ष कोषराज अधिकारीले आफूहरूको पहलमा योजना आए पनि झुटको खेती गरेर नेपाली कांग्रेसले जस लिन खोजेको आरोप लगाए । ‘यो योजना हामीले नै ल्याएका हौँ । यसमा दुई मत नै छैन । वडाको विकासका लागि हामीले काम गरिरहेका छौँ’, उनले भने, ‘आफू काम नगर्ने अनि अरूले ल्याएको योजनालाई आफ्नो दाबी गर्ने ? यो कुन प्रवृत्ति हो ? एकलौटी ढंगले वडालाई समेत नसोधेर शिलान्यास गरिएको छ । यस कार्यप्रति हाम्रो आपत्ति छ ।’

त्यस्तै, नगर कार्यपालिका सदस्य मनु चापागाईंले प्रदेश सरकारलाई आफूहरूले नै पटक पटक आग्रह गरेपछि सो योजना परेको बताइन् । उनले नेपाली कांग्रेसले आफूखुसी गरेको शिलान्यास कार्यक्रममा वडासँग समेत कुनै समन्वय नगरेको प्रति आक्रोश पोखिन् ।

सडक शिलान्यास गरेका प्रदेश सांसद तथा प्रदेश १ का प्रमुख प्रतिपक्षी दलका नेता राजीव कोइरालाले वडाले लगाएको आरोपको खण्डन गरे । ‘यो योजना मेरो व्यक्तिगत पहलमा आएको हो । यसमा वडाले दाबी गर्ने कुनै ठाउँछैन’, उनले भने, ‘यसमा वडाका जनप्रतिनिधिहरूलाई राजनीतिक द्वन्द्वको अवस्था सिर्जना गर्नुहुँदैन । यो बखेडा बेतुकको राजनीति हो ।’

इनरुवाको वडा नम्बर ५, ६ हुँदै रामधुनीदेखि सैनिमैनी सडक नाम दिइएको आयोजना सुरुवाती अवस्थामै आफूले पारेको कोइरालाको दाबी छ ।

प्रकाशित मिति: सोमबार, पुस २१, २०७६ १३:११