नेपालगञ्जमा म्याद नाघेका ग्यास सिलिन्डर छ्यापछ्याप्ती

A+ A A-

बाँकेको नेपालगञ्जमा म्याद नाघेका ग्यास सिलिन्डर छ्यापछ्याप्ती भेटिने गरेका छन् । ग्यास बिक्रेताले पुराना ग्यास सिलिन्डरमा रङरोगन गरी नयाँ देखाउँदै ग्यास भरेर बिक्री गर्दै आएका छन् । यसले ग्यास उपभोक्ता आमनागरिक उच्च जोखिममा परेका छन् ।

उद्योगीका अनुसार बाँकेमा भेरी ग्यास उद्योगको २ सय ९६, मनकामना ग्यास उद्योगका ३ सय ८४ र राप्तीको १ सय २४ वटा सिलिन्डर खराब भएका छन् ।

उपभोक्ता अधिकारकर्मी प्रभात ठकुरीका अनुसार उद्योगीले पुराना सिलिन्डरमा ग्यास भरेर बजारमा पठाउँदा कुनै पनि समय दुर्घटना भई धनजनको क्षति हुने खतरा बढेको छ ।

भेरी ग्यास उद्योगमा अहिलेसम्म म्याद गुज्रेका मात्र २ सय ९६ थान सिलिन्डर छन् । यस उद्योगको क्षमता ५ सय ५० मेट्रिक टन छ । त्यस्तै, २ सय २० अधिकृत बिक्रेता रहेको मनकामना ग्यास उद्योगमा ३ लाख ३५ हजार सिलिन्डर बजारमा छन् ।

राप्ती ग्यास उद्योगका १ सय ३४ अधिकृत बिक्रेता छन् भने १ लाख ८४ हजार सिलिन्डर बजारमा छन् । यसको क्षमता १ सय मेट्रिक टन छ ।

यस्ता कामको नियमन गर्ने निकाय स्थानीय प्रशासन र उपभोक्ता हकहित संरक्षण मञ्चलगायतका निकायहरू मौन देखिएका छन् । उपभोक्ताको ज्यानै जोखिममा हुँदासमेत उनीहरूले बजार अनुगमनसमेत गर्न चासो देखाएका छैनन् ।

बजार अनुगमनका लागि नेपालगञ्ज उपमहानगरपालिकामा गठित नगर उपभोक्ता हकहित मञ्चसमेत मौन छ । कामै नगरी ठूलो उपलब्धिको अपेक्षा गर्ने उपभोक्ता हकहित संरक्षण मञ्च निष्क्रियजस्तै भएकाले बजार अनुगमन हुन नसकेको उपभोक्ताहरूको गुनासो छ ।

बजार अनुगमन नहुँदा उपभोक्ता जोखिममा परेको नेपालगञ्ज–४ का स्थानीय प्रेमबहादुर शाहीको भनाइ छ । एउटा सिलिन्डर उत्पादन भएको १० वर्षसम्म मात्र प्रयोग गर्न पाउने कानुनी व्यवस्था छ ।

बाँकेका ग्यास उद्योगीले १० वर्षभन्दा पुराना सिलिन्डरमा ग्यास बिक्री गर्दै आएका छन् । त्यहाँका तीनवटा ग्यास उद्योगले ६ सय ९५ थोक बिक्रेतामार्फत खाना पकाउने ग्यास बिक्री गर्दै आएका छन् ।

नियमनकारी निकायले ग्यास सिलिन्डरको वास्तविक अवस्था बुझ्न नसक्दा ग्यास उद्योगले मनोमानी तरिकाले ग्यास सिलिन्डर बजारमा पठाउने गरेका छन् ।

ग्यास सिलिन्डरमा तौल, उत्पादन मिति र म्याद जाने मिति स्पष्ट देखिने गरी लेख्नुपर्ने नियम भए पनि अधिकांश ग्यास सिलिन्डरमा कुनै चिह्न नदेखिएको उपभोक्ताको भनाइ छ ।

नियमनकारी निकायले अनुगमन नगरेका कारण बाँकेमा रहेका तीनवटै ग्यास उद्योगले आफूखुशी सिलिन्डर खराब भएको प्रमाणित गर्दै आएका छन् । सोही अनुसार नियमनकारी निकायलाई सिलिन्डरको अवस्थाका बारेमा जानकारी गराउँदै आएका छन् । रासस

प्रकाशित मिति: आइतबार, पुस २०, २०७६ १५:०९