प्रसाद हावी, नाइँ न भन्नु ल– ५ लाई पाँच अवार्ड

A+ A A-

यो वर्षको कामना फिल्म अवार्डमा प्रसाद फिल्म हावी भएको छ । सर्वाेत्कृष्ट निर्देशकमा दिनेश राउत, अभिनेता विपिन कार्की, अभिनेत्री नम्रता श्रेष्ठ, पटककथामा सुशील पौडेलले अवार्ड हात पारे । यस्तै, नाइँ न भन्नु ल–५ ले पनि पाँच अवार्ड हात पारेको छ । यसबाट सह–अभिनेत्री प्रियंका कार्की, बालकलाकार सेड्रिना शर्मा, गीतकार दिनेश थापा, संगीतकार वसन्त सापकोटा र छायाँकारमा पुरुषोतम प्रधानले अवार्ड हात पारे ।

छक्कापन्जा–३ ले पनि उत्कृष्ट ३ अवार्ड चुम्न सफल भयो । साे चलचित्रले हास्य कलाकार, नृत्य निर्देशक र संवाद तथा ध्वनि मिश्रणमा अवार्ड हात पार्‍यो । हास्यकलाकारमा केदार घिमिरे र नृत्य निर्देशकको अवार्ड कविराज गहतराजले अवार्ड हात पारे । यो उनको लगातार पाँचाैं अवार्ड हो ।

समारोहमा चलचित्र साइँली बाट अभिनेता दयाहाङ राईले सह–अभिनेताको अवार्ड पाए भने, चलचित्रले पार्श्व गायनको अवार्ड पनि जित्यो । उमेश थापाले चलचित्र बोबी बाट नवअभिनेता र सुहान थापाले चलचित्र ए मेरो हजुर–३ बाट नवअभिनेत्री, प्रमोद अग्रहरिले कथा काठमाडौं बाट सर्वाेत्कृष्ट खलपात्रकाे अवार्ड चुम्न सफल भए ।

डमरुको डण्डिवियोले सर्वाेत्कृष्ट नवनिर्देशकसहित गरी चार विधामा अवार्ड पायो । चलचित्र भिलेनले सर्वाेत्कृष्ट द्वन्द्व निर्देशक, चलचित्र बाँध मायाले पार्श्व गायिका र चलचित्र चक्करले शृंगार विधाको अवार्ड पाएँ । डमरुको डण्डी वियोले उत्कृष्ट सम्पादन र पार्श्व संगीत गरी २ अवार्ड पायो । गोदरेज नम्बर वान पपुलर च्वाइस अवार्ड स्वस्तिमा खड्काले चुमिन् ।

दुई अवार्ड थप

यस वर्ष कामना फिल्म अवार्डमा २ अवार्ड थपिएका छन् । कामना न्यूज पब्लिकेसनका संस्थापक अध्यक्ष, पहिलो नेपाली फिल्म अवार्डका प्रणेता तथा समाजसेवी स्व. भरतलाल श्रेष्ठको नाममा भरतलाल ह्युम्यानिटेरियन अवार्ड तथा कामना न्यूज पब्लिकेसनका प्रधान सम्पादक स्व. पुष्करलाल श्रेष्ठको नाममा पुष्कर मिडिया अवार्ड २ व्यक्तिलाई प्रदान गरिएको छ ।

समाजसेवामा योगदान पुर्‍याउनेलाई प्रदान गरिने भरतलाल ह्युम्यानिटेरियन अवार्ड–२०७६ नगद १ लाख रुपैयाँसहित प्रमाणपत्र पोखराका सोनम साङ्पोलाई प्रदान गरिएको छ । पुष्कर मिडिया अवार्ड–२०७६ नगद १ लाख रुपैयाँसहित इमेज ग्रुप अफ कम्पनीका अध्यक्ष तथा प्रबन्ध निर्देशक राधाकृष्ण मानन्धरलाई प्रदान गरिएको छ ।

त्यस्तै, नेपाली फिल्म क्षेत्रमा योगदान पुर्‍याउने कलाकर्मीलाई लाइफटाइम अचिभमेन्ट अवार्ड प्रदान गरिएको छ । अभिनेता, निर्माता तथा निर्देशक नीर शाहलाई नगद १ लाखसहित कलातर्फको लाइफटाइम अचिभमेन्ट अवार्ड प्रदान गरिएको हो । मेक–अप आर्टिस्ट सन्तु तामाङलाई नगद १ लाखसहित पर्दापछाडिको कलाकारका तर्फबाट अवार्ड प्रदान गरिएको छ । शनिबार सम्पन्न पाँचौं संस्करणको सीजी गोदरेज नम्बर वान कामना फिल्म अवार्ड २०७६ मा विभिन्न विधाका कलाकारको सहभागिता थियो ।