मुक्तिनाथ विकास बैंकका एकैसाथ १८ वटा शाखा उद्घाटन

A+ A A-

मुक्तिनाथ विकास बैंकले एकैसाथ १८ वटा शाखाको केन्द्रीय कार्यालयबाटै उद्घाटन गरेको छ । बैंकले १४औं वर्षमा प्रवेश गरेको अवसरमा सो कार्यक्रम गरेको हो ।

काठमाडौंको बत्तिसपुतली, ललितपुरको भैंसेपाटी, नुवाकोटको बट्टार, कास्कीको नदीपुर र बेगनासताल, तनहुँको आँबुखैरेनी, लमजुङकाे बेंसीशहर, चितवनको टाँडी, नवलपुरको गैंडाकोट, पाल्पाको रामपुर, दाङको लमही, बाँकेको कोहलपुर, कैलालीको लम्की र धनगढी, झापाको काँकडभिट्टा, इलामको इलाम, धनकुटाको धनकुटा, सुनसरीको दुहवीमा खाेलिएका नयाँ शाखा कार्यालयकाे डिजिटल माध्यमबाट अध्यक्ष भरतराज ढकालले उद्घाटन गरेका हुन् ।

यस्तै, उद्घाटन समारोहमा अध्यक्ष ढकालले सदैव गुणस्तरीय सेवा प्रदान गर्दै अगाडि बढ्ने र विभिन्न वित्तीय तथा गैरवित्तीय सेवाको माध्यमद्वारा देशको अर्थतन्त्र र आवश्यकतामा बैंकले योगदान दिने प्रतिवद्धता व्यक्त गरे ।

बैंकले वार्षिकाेत्सवको अवसरमा देशका सातै प्रदेशका क्षेत्रीय तथा शाखाहरूमा विभिन्न सामाजिक उत्तरदायित्वअन्तर्गतका कार्यक्रमहरू गर्दै जेहेनदार विद्यार्थीहरूलाई छात्रवृत्ति वितरण, विद्यालयमा स्टेशनरी सामग्रीहरू तथा फर्निचर वितरण, विभिन्न अनाथालय तथा वृद्धाश्रममा खाद्यान्न तथा लत्ताकपडा वितरण, चेपाङ संरक्षण समितिलाई खाद्यान्न वितरण, विभिन्न ठाउँहरूमा डस्टबिन वितरण, तराईका शीतलहरबाट प्रभावित क्षेत्रहरूमा कम्बल वितरण, एम्बुलेन्सलाई आवश्यक मर्मतसम्भार, अस्पतालमा बिरामी कुरुवा बस्ने कुर्सी सहयोग, बागमती सरसफाइ, गोदावरी सरसफाइ तथा पोखरा उपत्यका सरसफाइ अभियानका लागि आवश्यक पर्ने सामग्रीहरु वितरण गरेको छ ।

यस्तै, काठमाडौंको कमलादी, काभ्रेको बनेपा, धादिङको धादिङबेंसी, रुपन्देहीको बुटवल, धनुषाको जनकपुर र कास्कीको नदीपुर शाखा कार्यालयहरूमा बृहत् रक्तदान कार्यक्रम गरेको बैंकका प्रमुख सूचना अधिकारी तीलबहादुर गुरुङले जानकारी दिए ।

बैंकले ४२ जिल्लामा १ सय ३४ शाखा कायार्लय, मोबाइल बैंकिङ, क्यूआर पेमेन्ट, एटीएम, अनलाइन बैंकिङमार्फत सेवा दिँदै आइरहेको छ ।

प्रकाशित मिति: आइतबार, पुस २०, २०७६ १०:४२