नेकपाका उम्मेदवारः चुनाव हारेकादेखि समानुपातिक सूचीसम्मका

A+ A A-

सत्तारुढ दल नेपाल कम्युनिस्ट (नेकपा)ले राष्ट्रिय सभाका रिक्त १८ पदमध्ये १६ स्थानमा प्रतिस्पर्धा गर्ने उम्मेदवारको नामावली टुङग्याएको छ ।

दुई दिनसम्म चलेको सचिवालय बैठकले ९ माघमा हुने निर्वाचनमा प्रदेश २ मा राजपासँग सहकार्य गर्दै सो प्रदेशका दुई स्थानमा राजपाका उम्मेदवारका लागि छाडेको छ । नेकपाले सार्वजनिक गरेका उम्मेदवार भने प्रतिनिधि सभाको निर्वाचन हारेका देखि प्रतिनिधि सभाकै समानुपातिक सूचीमा नाम भएकासम्म छन् ।

नेकपाका प्रवक्ता समेत रहेका सचिवालय सदस्य नारायणकाजी श्रेष्ठ गोरखा २ मा तत्कालीन नयाँ शक्तिका संयोजक (समाजवादी पार्टीको संघीय परिषद अध्यक्ष) बाबुराम भट्राईसँग ६ हजार ८ सय ७४ मतले पराजित भएका थिए । उनी राष्ट्रिय सभाका उम्मेदवार भएका छन् ।

राष्ट्रिय सभाकी अर्की उम्मेदवार हुन् भगवती न्यौपाने । न्यौपाने पनि स्थानीय तहको निर्वाचनमा तनहुँको भानु नगरपालिका मेयरमा पराजित भएकी थिइन् । उनलाई नेपाली कांग्रेसका उदयराज गौलीले हराएका थिए । गौलीले ९ हजार ६ सय ३८ मत ल्याएका थिए भने न्यौपानेले ९ हजार ६६ मत ल्याएकी थिइन ।

प्रदेश ५ बाट अपाङता कोटामा राष्ट्रिय सभाका उम्मेदवार बनाइएका जगप्रसाद शर्मा प्रदेश सभाको सदस्यमा पराजित उम्मेदवार हुन् । उनी दाङ ३ (क) बाट प्रदेश सभा सदस्यमा पराजित भएका थिए ।

उनले प्रदेश सभाको सदस्यका लागि १४ हजार ७ सय मत ल्याएका थिए । विजयी भएका नेपाली कांग्रेसका डिल्ली बहादुर चौधरीले १७ हजार ३६ मत ल्याएका थिए ।

अर्का उम्मेदवार गोपी अछामी प्रतिनिधि सभा सदस्यको समानुपातिक सूचिमा छन् । उनी संविधान सभाको पहिलो निर्वाचनमा विजयी भएका थिए । २०७४ मंसिरको प्रतिनिधिसभा निर्वाचन उनको नाम समानुपातिक सूचीमा छ । तर सांसद भने हुन पाएनन् ।

कर्णाली प्रदेशबाट राष्ट्रिय सभाको उम्मेदवार बनेकी सुमित्रा बिसी पनि प्रतिनिधि सभाको सदस्यमा समानुपातिक सूचिकी उम्मेदवार हुन् । उनी पनि सांसद हुन पाइनन् ।

नेकपाले प्रदेश १, २ र सुदुरपश्चिममा भने नयाँ अनुहारलाई अघि सारेको छ । नेकपाले गण्डकी प्रदेशबाट उम्मेदवारी घोषणा गरेका श्रेष्ठ र न्यौपाने २०७४ सालमा भएको र प्रतिनिधिसभा र स्थानीय तह निर्वाचनका पराजित उम्मेदवार हुन् ।

प्रदेश ५ का तीनजना उम्मेदवार मध्ये जगप्रसाद प्रदेश सभाका पराजित उम्मेदवार हुन भने अन्य दुईजना (विमला घिमिरे र गोपाल भट्टराई) नयाँ अनुहार हुन् ।

कर्णाली प्रदेशका दुई उम्मेदवार मध्ये सुमित्रा बिसी प्रतिनिधिसभाको समानुपातिक सूचीमा छिन् भने मायाप्रसाद शर्मा कर्णाली प्रदेश कमिटी सचिव हुन् । प्रदेश ३ का वेदुराम भुसाल र गंगा वेलवासे भने नयाँ अनुहार हुन् ।

भुसाल स्थायी कमिटी सदस्य तथा स्कुल विभाग उपप्रमुख हुन् भने वेलवासे पूर्वमन्त्री स्वर्गीय धनिराम पौडेलकी धर्मपत्नी हुन् ।

नेकपाका १६ उम्मेदवारमध्ये ९ जना तत्कालीन नेकपा एमाले निकट र ७ जना तत्कालीन नेकपा माओवादी केन्द्र निकटका नेता हुन् । भुसाल र भट्ट नेकपाभित्र माधव नेपाल निकट हुन् भने तत्कालीन एमालेका अन्य सातजना पार्टी अध्यक्ष केपी ओली निकटका हुन् ।

तत्कालीन माओवादी केन्द्रका ७ जनामध्ये गंगा बेलवासे नारायणकाजी श्रेष्ठकै समुहका हुन् भने माया प्रसाद शर्मा राम बहादुर थापा (वादल) निकट मानिन्छन् । जगप्रसाद, तारामान र र गोपी भने अध्यक्ष पुष्पकमल दाहाल (प्रचण्ड)निकट मानिन्छन् ।

नेकपाले समानुपातिक सूचीका उम्मेदवारलाई राष्ट्रिय सभामा टिकट दिने बताएपनि निर्वाचन आयोगले भने बन्द सूचीबाट नाम फिर्ता नलिएसम्म उम्मेदवारी दर्ताका लागि योग्य नहुने बताएको छ ।

‘समानुपातिकको बन्द सूचीमा भएकाले अन्य निर्वाचनमा उम्मेदवार बन्न पाउँदैनन, कुनै दलले उम्मेदवार बनाउने निर्णय गरेछन् भने पहिला बन्द सूचीवाट नाम फिर्ता लिएर त्यसको प्रमाणपत्र सम्वन्धित दलले लिनुपर्छ,’ निर्वाचन आयोगका प्रवक्ता राजकुमार श्रेष्ठले शिलापत्रसँग भने ।

प्रकाशित मिति: शुक्रबार, पुस १८, २०७६ १६:४२