काश्मिरी माटोमा टुटेको लाहुरे सपना

A+ A A-

गाेरखा नगरपालिका–५ रिप गाउँका अर्जुन थापा मगरको लाहुरे बन्ने सपना थियो । प्लस टु पढ्दापढ्दै उनी ४ वर्षअघि भारतीय सेनामा भर्ती भए । उनको लाहुरे बन्ने सपना पूरा भयो ।

उनको अर्को सपना थियो, लाहुरे भएर परिवारलाई खुसी दिने । एक्लो छोरो अर्जुनले बुबालाई बारम्बार हाम्रो दुःखका दिन सकियो भनेर सम्झाउँथे । बिडम्बरना उनको खुसी धेरै समय टिक्न सकेन ।

मंगलबार अंग्रेजी वर्षको अन्तिम दिन । सारा विश्व नयाँ वर्षको स्वागतमा जुटेको थियो । भारतीय सेनामा कार्यरत अर्जुन गोरखामा रहेकी श्रीमती सरिता थापा मगरसँग म्यासेन्जरमा कुरा गर्दै थिए ।

अर्जुनले श्रीमतीलाई भने, ‘फोन राख–राख’ दुश्मन आए जस्तो छ । त्यसपछि सरिता आत्तिइन् । पटक–पटक फोन गरिन् । तर, अर्जुन सम्पर्कमा आएनन् । रातभर उनी श्रीमानको पर्खाइमा बसिन् ।

नयाँ वर्षको स्वागत गर्न जब विश्वभर अतिसबाजी हुँदै थियाे भारतको जम्मू–काश्मिरमा भने गोला र बारुदको वर्षा भयो । जम्मू–काश्मीर रणभूमी बन्यो । भर्खरै पलाउँदै गरेको अर्जुनको खुसीको पालुवा चुँडियो । ‘आतंकवादी’सँगको भिडन्तमा उनले काश्मिरी माटोमा अन्तिम सास फेरे ।

भोलिपल्ट नयाँ वर्षको दिन साथीको माध्यमबाट सरितालाई खबर आयो, ‘अर्जुनको खबर राम्रो छैन ।’ सरिताका आँखाबाट आँसु झर्न थाले ।

नयाँ वर्षको पहिलो दिन सरिताले श्रीमान गुमाइन् ।

एक महिना विदामा आएका अर्जुन ५ पुसमा काममा फर्किएका थिए । सरितासँग ६ महिनाअघि अर्जुनको विवाह भएको थियो ।

विदामा आउँदा अर्जुनले आफ्नो भर नभएको पनि बताएका थिए । ‘मामा पुसमा आउँदा मेरो क्षेत्रमा लडाई चलिरहेको छ । के हुने हो भर छैन भन्नु भएको थियो,’ अर्जुनका भान्जा सुजित थापा मगरले भने, ‘गएको १० दिनमै यस्ताे दुःखद खबर आयो ।

अर्जुनका बुबा र श्रीमती उनकाे शव लिन काँकडभिट्टा पुगेका छन् । ‘माइजु र हजुरबुबा मामाको शव लिन काँकडभिट्टा जानु भएको छ,’ उनले भने, ‘मौसम खराब भएकाले भोलीमात्र शव आइपुग्छ ।’

शोकमा गाउँ

‘अर्जुनको दुःखद खबरले गाउँ शोकमा डुबेको छ,’ नगरप्रमुख राजनराज पन्तले भने, ‘उहाँको परिवारका लागि हामीले सहजिकरण गरेका छौं ।’

प्रकाशित मिति: बिहीबार, पुस १७, २०७६ १७:२०