ब्याजदरमा हस्तक्षेप गर्दैनौं, ११ प्रतिशतमा सहमति गर्नुस्ः अर्थमन्त्री

A+ A A-

अर्थमन्त्री डा. युवराज खतिवडाले बैंक तथा वित्तीय संस्थाको ब्याजदरमा सरकारले हस्तक्षेप नगर्ने बताएका छन् । तर, उनले घुमाउरो ढंगले ११ प्रतिशतमा ब्याजदर कायम गर्न निर्देशन दिएका छन् ।

बैंक र उद्यामी व्यवसायी निजी क्षेत्रकै भएकोले एकापसमा झगडा नगर्न अर्थमन्त्रीले सुझाव पनि दिए । ब्याजदरका विषयमा बैंक र उद्योगी व्यवसायीबीचको ‘ पाखुरा सुर्कासुर्की’ आफूलाई पटक्कै मन नपरेको उनको भनाइ छ ।

‘बैंक पनि निजी क्षेत्रकै, उद्योगी ब्यवसायी पनि निजी क्षेत्रकै, तपाइहरुका बीचको यो पखुरा सुर्कासुर्की हामीलाई पटक्कै मन परेको छैन, उद्योग बाणिज्य क्षेत्रका छाता संगठनहरु हुनुहुन्छ, तपाइहरु बसेर छलफल गर्नुस्, साझा निष्कर्ष निकाल्नुस् र सरकारले कहाँनेर हस्तक्षेप गरिदिनुपर्ने हो त्यहाँनेर आएर हामीलाई भन्नुस्,’ अर्थमन्त्री डा. खतिवडाले भने ।

व्यजदरका विषयमा सरकारले ‘सुँढ पसारेर’ हस्तक्षेप गर्न नचाहेको अर्थमन्त्रीको भनाइ छ ।

‘हामी जथाभावी हात पसार्दै हिड्दैनौं, सुँढ पसारेर तपाइहरुको क्षेत्रमा प्रवेश गर्दैनौं, म स्पष्ट रुपमा भन्छु– हाम्रो त्यो अभिप्राय पनि होइन, तर तपाइहरुले झगडा गर्नुभयो भने हामीले झगडा मिलाउनु पर्छ, त्यो झगडा नगर्नुस्, अतिवादमा दुइटै नजाऔं,’ डा. खतिवडाले भने ।

११ प्रतिशतमा सहमति गर्नुस्

अर्थमन्त्री डा. खतिवडाले व्याजदरको विषयमा सरकारले हस्तक्षेप नगर्ने बताए पनि सार्बजनिक रुपमै ११ प्रतिशत ब्याजमा दुबै पक्ष सहमत हुन निर्देशन दिए । तर, डा. खतिवडाले सोझै ११ प्रतिशत व्याजमा सहमत हुन भनेका भने होइनन् ।

‘मैले हिजो पनि एउटा अंक भनेँ, ६ र १६ को ‘एक्स्ट्रिम’मा हामी जानु हुदैन, त्यसको औसतमा हामी जानुपर्छ, अंक गणितको हिसाब गर्नेलाई त्यो औसत थाहा भइहाल्छ, यो औसतमा बस्नेगरी हामीले काम गरौं,’ डा. खतिवडाले भने ।

उद्योगी ब्यवसायीले ६ प्रतिशत ब्याजमा ऋण खोजेको र बैंकले १६ प्रतिशत ब्याज लिइरहेको सन्दर्भमा अर्थमन्त्री डा. खतिवडाले यस्तो बताएका हुन् । डा. खतिवडाले प्रस्ताव गरेको ६ र १६ औसत अंक ११ हुन आउँछ । उनले सो विन्दु कायम गर्नेगरी सहमति गर्न बैंकर र व्यवसायीलाई निर्देशन दिएका हुन् ।