विराटनगरमा १० रुपैयाँमै खाना, २० रुपयाँमै बासमतीको भात

A+ A A-

विराटनगरका समाजसेवीहरुले सस्तो, सुलभ भोजनालय सञ्चालनमा ल्याएका छन् । भोजनालयमा १० रुपैयाँमा पेटभरी खाना खान पाइनेछ भने २० रुपैयाँमा बासमती चामलको भातसहितको होमप्याक खाना उपलब्ध गराईन्छ ।

१० रुपैयाँमै दालभात तरकारी र २० रुपैंयामा होमप्याक समेत गरी लान पाईन्छ भन्दा जो कोहीलाई अचम्म लाग्न सक्छ । त्यसमाथि पनि बासमती चामलको भात तथा राज्मा, पनीर र काउली जस्ता महँगो मूल्यको तरकारी ।

महँगी चुलिएर सर्वसाधारणको ढाड सेकाईरहँदा विराटनगरमा भने यस्तै एउटा घुम्ती भोजनालय सञ्चालनमा ल्याइएको छ ।

नगरक्षेत्रको मेनरोडस्थित कालीमन्दिरकै अगाडि सञ्चालनमा ल्याइएको भोजनालयमा १० रुपैंयामा बासमति चामलको भात सहित पौष्टिक र ताजा तरकारी खान पाईन्छ ।

भोजनालयबाट खाना खरीदगरि खाईरहेका भीमबहादुर अधिकारीले १० रुपैयाँमै बासमती चामलको भात र पौष्टिक तरकारी खान पाउदा आफूलाई अचम्म लागेको बताए ।

उनले भने, ‘सुरुमा पत्याउनै गाह्रो भयो । तर यहाँ आएर आफै खाएपछि भने बल्ल विश्वास लाग्यो ।’ दिनदिनै सबै खानेकुराको मूल्य बढिरहेका बेला यति सस्तोमा खान पाउनु अचम्मको कुरा हो ।

बजारमा १० रुपैयाँको कुनै मुल्य छैन, तर यहाँ भरपेट खान पाईन्छ । सेवामुलक भावनाले सुरु गरिएको यो काम सराहनीय छ ।’

नगरक्षेत्रका केहि समाजसेवीहरुको समुहले घुम्ती भोजनालय सञ्चालनमा ल्याएका हुन् । समाजसेवी दिलीप धाडेवासहित चार जनाको समूहले आफ्नै निजी लगानीमा पुस ९ गतेबाट सस्तो, सुलभ भोजनालय सञ्चालनमा ल्याएका हुन् ।

निम्न आय भएका तथा काम विशेषले विराटनगर आएका सर्वसाधारणलाई लक्षित गरी भोजनालय सञ्चालनमा ल्याइएपनि जोसुकैले पनि तोकिएको मूल्य तिरेर खाना खान सक्ने भोजनालय संयोजक दिलीप धाडेवाले बताए ।

‘मान्छेहरुले जाडोमा राम्रो क्यालिटिको खाना खान पाईरहेका छैनन् । होटलमा अत्यधिक महंगो पर्छ । यहि कुरालाई ध्यानमा राखेर हामीले यो सञ्चालनमा ल्याएका हौं,’ उनले भने, ‘१० रुपैयाँमा भरपेट खान र २० रुपैयाँमा घर लाने सुविधा दिएका छौं ।’

धाडेबाले जो कोहीका लागि पनि यो सुविधालाई निरन्तरता दिने बताएका छन् । ‘भर्खर हामीले यो सुरु गरेका हौं । यसलाई निरन्तर अघि बढाउँछौं । हामीले कुनै संस्थाबाट चन्दा लिएर सुरु गरेका होइनौं । व्यक्तिगत चार जनाबाट सुरु गरेका हौं,’ उनले भने, ‘यो अभियानमा जो सुकै जोडिन सक्नुहुन्छ ।’

समाजसेवीहरुको समूहमध्येका एक व्यक्तिको कालीमन्दिर सामुन्ने रहेको घरलाई तत्कालका लागि खाना पकाउने स्थानका रुपमा प्रयोग गरिएको छ । दैनिक खाना पकाउनका लागि केहि भान्सेहरु समेत नियुक्त गरिएका छन् ।

सस्तो मुल्यमा खाना किन्न पाइनेभएपछि स्थानीय कालीमन्दिरमा दर्शन गर्न आउने भक्तजनहरुले भोजनालयबाट खाना किनेर असहायहरुलाई समेत वितरण गर्ने गरेका छन् ।

सस्तो भोजनालयलाई आगामी दिनमा थप व्यवस्थित गर्दै स्थानिय अस्पताल, बसपार्क र सर्वसाधारणको बढी भीड हुने कार्यालय लगायतका क्षेत्रमा समेत विस्तार गर्ने योजना रहेको सञ्चालकहरुले बताएका छन् ।

प्रकाशित मिति: बिहीबार, पुस १७, २०७६ ०९:१६