देउवाको गृह जिल्लामा मन्त्री बाँस्कोटालाई १६ केजीको माला

A+ A A-

सूचना तथा सञ्चार मन्त्री गोकुलप्रसाद बाँस्कोटालाई डडेल्धुरामा १६ केजीको माला लगाएर सम्मान तथा स्वागत गरिएको छ । अमरगढी नगरपालिकाद्वारा आयोजित ‘घुम्न जाऔं अमरगढी’ अभियान अन्तर्गत भ्रमण वर्ष २०२० को उद्घाटन गर्न मन्त्री बाँस्कोटा प्रमुख प्रतिपक्षी दल नेपाली कांग्रेसका सभापति शेरबहादु्र देउवाको गृह जिल्ला डडेल्धुरा पुगेका थिए ।

डडेल्धुराको अमरगढी नगरपालिकाले बुधबारबाट ‘घुम्न जाऔं अमरगढी’ अभियानको शुरुवात गरेको छ । मन्त्री बाँस्कोटालाई १६ केजीको माला लगाइदिएर डडेल्धुरामा स्वागत गर्दै अमरगढी नगरपालिकाका प्रमुख विशेस्वरप्रसाद ओझाले १६ बुँदे मागपत्र पनि प्रस्तुत गरे ।

माग प्रस्तुत गर्ने क्रममा मेयर ओझाले अमरगढी नगरपालिका सुदूरपश्चिमका पहाडी जिल्लाको केन्द्रमा रहेको बताउँदै बजेट अभावले थुपै्र पूर्वाधार निर्माणका योजना अलपत्र परेको गुनासो पनि गरे ।

‘प्रशस्त सम्भावना बोकेको अमरगढी नगरपालिकाले बजेट अभावमा नागरिकको अपेक्षा अनुरुप काम गर्न सकेको छैन । गत वर्ष नयाँ सहर आयोजनाको सहयोगमा नगरपालिकाको दीर्घकालिन गुरुयोजना समेत बनाइसकेका छौं,’ उनले भने,‘तर, बजेट अभावमा सो योजना अगाडी बढ्न सकेको छैन । त्यसैले सूचना तथा सञ्चार मन्त्रीमार्फत् सरकार समक्ष पर्याप्त बजेट उपलब्ध गराइदिन अनुरोध गर्दछु ।’

माग पत्रमा बागबजार बसपार्क छेउमा तरकारी बजार तथा सपिङ कम्पलेक्स निर्माण, अमरगढीका ग्रामीण सडक कालोपत्रे, आईत–डकले–सल्लाघारी सडक निर्माण, फोहरमैला प्रशोधन केन्द्र निर्माण, अमरगढी स्मार्ट सहर अन्तर्गत बसपार्क सिटीहल, टुँडिखेल रिङरोड निर्माण, डडेल्धुरा अस्पतालको स्तरोन्नती तथा मेडिकल कलेजको रुपमा विकास, उग्रतारा रंगशाला निर्माणलगायतका माग समावेश छन् ।

यस्तै, नागरिक समाज डडेल्धुराले पनि मन्त्री बाँस्कोटालाई माग पत्र पेश गरेको छ । बहुचर्चित पश्चिम सेती जलविद्युत आयोजनाको काम अघि बढाउन आवश्यक पहल गर्न, यातायात व्यवस्था कार्यालय डडेल्धुराबाट चालक अनुमति पत्र वितरण, जिल्ला सदरमुकाम बागबजार क्षेत्र सडक चौडा बनाउने, महाभारत क्षेत्र र चुरे क्षेत्र संरक्षित क्षेत्र घोषणा गरी पर्यटन लक्षित कार्यक्रमका लागी आवश्यक पहल गर्न माग गर्दै नागरिक समाजका सदस्य गोविन्द खडायतले मन्त्री वाँस्कोटा लाई पत्र बुझाए ।

भ्रमण वर्ष उद्घाटन कार्यक्रममा डडेल्धुराबाट प्रतिनिधित्व गर्ने अधिकांश जनप्रतिनिधिको सहभागिता रहेको थियो । जिल्लाका सबै स्थानीय तहरूले आआफ्नो क्षेत्रमा भएका मौलिक कलासंस्कृतिको प्रचारप्रसार तथा प्रवद्र्धनलाई अभियानका रुपमा अघि बढाइने प्रतिबद्धता व्यक्त गरे ।

‘घुम्न जाऔं अमरगढी’ अभियान सफल पार्नका लागि नगरप्रमुख ओझाको संयोजकत्वमा ६ सय जनाको मूल समिति गठन गरिएको छ । समितिमा अमरगढी नगरपालिकाका जनप्रतिनिधि, कर्मचारी, अमरगढीभित्र अध्यापन गराइरहेका शिक्षक, स्वयंसेविका, उद्योगी–व्यवसायी लगायत समाविष्ट छन् ।

संस्कृतिको संरक्षण गर्नु पर्छ : मन्त्री बाँस्कोटा

भ्रमण वर्ष उद्घाटनपछि बोल्दै मन्त्री बाँस्कोटाले डडेल्धुराको सुन्दरताले मोहित बनाएको बताउँदै डडेल्धुरा वास्तवमै उत्कृष्ट पर्यटकीय गन्तव्य रहेको जिकिर गरे । राष्ट्र निर्माणको महान यात्रामा अंग्रेजहरुसँग लडेर नेपालको स्वाधीनता बचाउने वीर सपुत अमरसिंह थापाको किल्ला, उग्रतारा मन्दिर, घटाल थानलगायत थुप्रै पर्यटकीय स्थलले भरिपूर्ण डडेल्धुराको थप प्रचारप्रसारमा अझै जोड दिनुपर्ने पनि उनले बताए ।

विदेशी पर्यटकमात्र नभएर आन्तरिक पर्यटकलाई पनि उत्तिकै महत्व दिनुपर्ने बताउँदै मन्त्री बाँस्कोटाले सुदुरपश्चिमको आतिथ्यताबाट निकै प्रभावित भएको बताए । साथै, सुदुरपश्चिमको देउडा, हुड्केलीलगायत विभिन्न मौलिक कलासंस्कृतिको संरक्षण गर्नुपर्नेमा पनि जोड दिए ।

‘सुदूरपश्चिममा आएर जीवनमै पहिलो पटक ठूली रात अर्थात् पुस पन्ध्र मनाएँ । यहाँको स्थानीय परिकार बटक असाध्यै मिठो हुँदो रहेछ,’ उनले भने, ‘हामीले यस्ता मौलिक परिकार, चाडपर्व, कला, संस्कृतिको जगेर्ना गर्दै उपयुक्त प्रचारप्रसार गरे अपेक्षाभन्दा बढी पर्यटक भित्र्याउन सकिन्छ ।

छाउपडी मान्नेको वुद्ध भत्ता रोक्नुपर्छ

मन्त्री बाँस्कोटाले सुदूरपश्चिममा व्याप्त रहेको छाउपडी प्रथाको विरोध गर्दै त्यस्ता कुप्रथालाई निरन्तरता दिनेलाई कारबाही गर्नुपर्ने धारणा राखे ।

छाउपडी समाजको कलंक रहेको बताउँदै उनले सो प्रथा मान्नेहरुमा वृद्धहरुको संख्या बढी रहेको पनि बताए । अझै यस्ता कुप्रथालाई निरन्तरता दिएको पाएमा त्यस्ता व्यक्तिको वृद्ध भत्ता रोकिदिनु पर्नेमा उनले जोड दिए ।

अन्तर्राष्ट्रि मिडियामा छाउपडि प्रथाको समाचार आएर देशकै बेइज्जत भएको पनि उनले थपे । बीबीसी र सीएनएनलगायतका प्रतिष्ठित अन्तर्राष्ट्रिय मिडियाले गरेको समाचार सम्प्रेषण उल्लेख गर्दै मन्त्री बाँस्कोटाले कुरिती तथा कुप्रथाको खुलेर विरोध गरे ।

सागका पदक विजेता खेलाडी चुनारा सम्मानित

सो अवसरमा १३औं दक्षिण एसियाली खेलकुद (साग)मा पदक जित्न सफल खेलाडी शिवांगी देबेलाई पनि सम्मान गरिएको छ । देबेले सागअन्तर्गत कुस्ती खेलमा रजत पदक जितेकी थिइन् ।

अमरगढी नगरपालिका-५, खलंगाकी देबेलाई नगरपालिकाले नगद २१ हजारसहित दोसल्ला ओढाएर सम्मान गरेको हो । उनी ८औं राष्ट्रिय खेलकुद प्रतियाेगितामा कुस्तीकी स्वर्ण पदक विजेता पनि हुन् ।

प्रकाशित मिति: बुधबार, पुस १६, २०७६ २१:०८