भ्रमण वर्ष सुरुः यसकारण घुम्ने बेलका नगरपालिका

A+ A A-

काठमाडौंमा ‘भ्रमण वर्ष २०२०’ को भव्य उद्घाटन गरियो । विभिन्न प्रदेश र स्थानीय तहले पनि भ्रमण वर्ष सुरुवात गरेका छन् ।

उदयपुरको बेलका नगरपालिकाले ‘सफा मन, आफ्नोपनः अवश्य गरौं बेलका भ्रमण’ भन्ने नाराका साथ भिजिट बेलका २०२० कार्यक्रम सुरु गरेको छ । नगरपालिकाको पर्यटन विकास समितिले बुधबार बेलका–८, सोमबारेमा भव्य कार्यक्रम गरी बेलका भ्रमण वर्षको आरम्भ गरेको हो ।झण्डै ३ हजार मान्छेका बीच नगरप्रमुख दुर्गाकुमार थापा ‘स्वस्तिक’ले रिबन काटेर भ्रमण वर्ष कार्यक्रमको उद्घाटन गरे ।

नगरप्रमुख थापाले आन्तरिकसँगै बाह्य पर्यटकको ध्यानाकर्षण गर्न कार्यक्रम सुरु गरिएको बताए । ‘बेलका एउटा सुन्दर पर्यटकीय नगरपालिका हो,’ थापाले भने, ‘यहाँका सुन्दर झरना, वनजंगल, चुरे क्षेत्र, अर्ना, दुर्लभ चराको प्रचारप्रसारमा यो कार्यक्रम लक्षित हुनेछ ।’

कार्यक्रमलाई प्रभावकारी बनाएर नेपाल भित्रिने बाह्य पर्यटकलाई पनि बेलका ल्याउने योजना उनले सुनाए । ‘हाम्रो नगरपालिकालाई सबैले चिनुन्, घुम्न आउन्, स्मरणमा राखुन् भनेर हामीले भिजिट बेलका कार्यक्रम सुरु गरेका हौं,’ नगरप्रमुख थापाले भने, ‘नेपाल भ्रमण गर्न आउने विदेशीलाई पनि हामी बेलका ल्याउन सक्छौं, हाम्रो यो योजना सफल हुँदा मुलुकको अर्थतन्त्रमै टेवा पुग्छ ।’

बेलका भ्रमण वर्ष ‘समृद्ध नेपाल, सुखी नेपाली’को राष्ट्रिय संकल्पमा सहयोग पुर्‍याउने तथा बेलका नगरपालिका र यहाँका नगरवासीलाई समुन्नत बनाउने आफ्नो अभियानकै एउटा पाटो रहेको उनको भनाइ थियो ।

प्रदेश सांसद विमल कार्कीले बेलका नगरपालिका पूर्वकै सुन्दर पर्यटकीय नगरी भएको दाबी गरे । ‘यो नगरपालिकाले पर्यटनमा ठूलो सम्भावना बोकेको छ,’ उनले भने, ‘पोखरामा धेरै ठूलो प्रयासपछि प्याराग्लाइडिङ सफल भयो, बेलकामा एकैपटकमा सफल भएको छ ।’ उनले सांस्कृतिकसँगै भाैगाेलिक र पर्यावरणीय रूपमा पनि बेलका नगरपालिका सुन्दर रहेकाे बताए ।

कार्यक्रम संयोजक तथा पर्यटन विकास समितिका सहसंयोजक रमण भट्टराईले खेल र कृषि पर्यटनमा बेलका नगरपालिका धेरै अगाडि रहेको बताए । बेलका घुम्न आउने पर्यटकले सुन्दर पर्यटकीय स्थलको अवलोकनसँगै प्याराग्लाइडिङ, सप्तकोशीमा क्याम्पफायर, र्‍याफ्टिङको मजा लिन पाउने उनको भनाइ छ । ‘अहिलेसम्म प्रचारको अभावले हाम्रो नगरपालिका बत्तीमुनिको अँध्यारोमा थियो,’ भट्टराईले भने, ‘आजको कार्यक्रमसँगै अब बेलकाको पर्यटनले एउटा गति लिनेछ, यो नगरपालिकालाई एउटा पर्यटकीय नगरको रूपमा हामी विकास गर्नेछौं ।’

नेपाल कम्युनिस्ट पार्टी (नेकपा) नगर कमिटीका अध्यक्ष मनोज तामाङले प्राकृतिक दृश्यावलोकनसँगै शास्त्रीय अनुसन्धानकर्ताका लागि बेलका नगरपालिका अध्ययनको एउटा केन्द्र भएको बताए । ‘बेलका नगरपालिका ऐतिहासिक विशेषता बोकेको नगरपालिका हो, सुनखानी, मुक्तिनाथ, कोशी टापुलगायतका क्षेत्र त अध्येताहरूका महत्त्वपूर्ण स्थान हुन्,’ अध्यक्ष तामाङले भने । उनले एक पटक बेलका भ्रमण गर्न सबैलाई आग्रह पनि गरे ।

कार्यक्रममा विभिन्न जातजातिको पहिचान झल्काउने झाँकी प्रस्तुत गरिएको थियो । कार्यक्रमस्थलमा बेलका नगरपालिकामा उत्पादित हस्तनिर्मित सामाग्री, खानेकुरालगायतका स्टल राखिएको थियो । यसैगरी प्याराग्लाइडिङ पनि सञ्चालन गरियो । औपचारिक कार्यक्रमपछि गायक यश कुमार, मोडल सारा श्रेष्ठ तथा स्थानीय कलाकारहरुले प्रस्तुति देखाएका थिए ।

बेलका उदयपुरको पूर्वीभेगमा अवस्थित जिल्लाकै कान्छो नगरपालिका हो । कोलोहाङ र वासिराङ झर्ना, वासिराङ दह, भूतिया तह, बालबाटिका बगैंचा, टंकेला गुफा, बेलका हाइट, महांकाल मन्दिर, कोशी टप्पु, सप्तकोशी नदी, ऐतिहासिक मैनाराजामैनारानी, बेलकाराजाबेलकारानी, सुनखानी आदि यो नगरपालिकाका पर्यटकीय स्थल हुन् ।

प्रकाशित मिति: बुधबार, पुस १६, २०७६ १८:०४