भ्रमण वर्षः भारतीय पर्यटकलाई ‘बोर्डर’मै स्वागत

A+ A A-

भ्रमण वर्ष सुरुवातको अवसर पारेर नेपाल भारत मैत्री युवा संघले भारतबाट नेपाल आउने पर्यटकहरुलाई सीमामा स्वागत गरेको छ ।

अंग्रेजी नयाँ वर्ष र नेपाल सरकारले मनाइरहेको भ्रमण वर्ष २०२० को अवसर पारेर जोगवनी नाकामै पर्यटकहरुलाई स्वागत तथा सम्मान गरेको हो ।

नेपाल भारत मैत्री युवा संघले बुधबार बिहान सीमावर्ती क्षेत्रमै गएर नेपाल आउँदै गरेका भारतीय पर्यटकहरुलाई फुल र माला लगाएर स्वागत गरेको हो । भ्रमण बर्ष २०२० लाई सफल बनाउन युवाहरु बिहानैदेखि खटिएका छन् ।

युवाहरुले जोगबनी बजार हुँदै भारतबाट नेपाल आउने पर्यटकहरुलाई स्वागत गर्दै यस प्रदेशका प्रमुख पर्यटकीय गन्तव्य र आवश्यक जानकारीहरु समेत प्रदान गरेका छन् ।

सो अवसरमा नेपाल भारत मैत्री युवा संघ प्रदेश संयोजक मोहम्मद नशरुलले भारतीय पर्यटकहरु नेपाल भित्रिदा बोर्डरमा हुने विभिन्न समस्याहरुलाई न्युनीकरण गर्न र सहज बनाउन हरेक सीमा नाकामा सहायता कक्ष स्थापना गर्न सरकारलाई आग्रह गरे ।

यसैबीच जोगबनी नाका मात्र भएर २ सय भन्दा बढी पर्यटक बोकेका सवारीसाधनहरु नेपाल भित्रिसकेका छन् । दिउँसो १ बजे सम्म २ सय पर्यटक बोकेका भारतीय सवारी साधनहरु नेपाल भित्रिएका छन् ।

विराटनगर महानगरपालिका राजस्व संकलन पोष्ट रानीका कर्मचारी खेमराज तम्सिनाका अनुसार भ्रमण वर्षमा पर्यटकहरुको पर्याप्त भीडले होटल तथा लज नपाइने भन्दै मंगलबार नै धेरै सवारीसाधनहरु नेपाल भित्रिएको जानकारी दिए ।

प्रदेश सरकारले पनि आजदेखि भ्रमण बर्षको विराटनगर स्थित शहिद रंगशालाबाट शुभारम्भ गर्दैछ । प्रदेश सरकारले प्रदेश १ मा ५ लाख पर्यटक भित्र्याउने लक्ष्यसहित विभिन्न कार्यक्रम अघि सारेको छ ।

प्रकाशित मिति: बुधबार, पुस १६, २०७६ १५:४२