सुदूरपश्चिममा भ्रमण वर्षको यसरी हुँदै छ शुभारम्भ

A+ A A-

नेपाल भ्रमण वर्ष २०२० आजदेखि सुरु हुँदैछ । सुदूरपश्चिम प्रदेश पनि नेपाल भ्रमण वर्षको शुभारम्भका दिन विविध कार्यक्रम गर्दैछ ।

कैलालीको धनगढीमा सांस्कृतिक कार्यक्रमसहित मुख्यमन्त्री त्रिलोचन भट्टले नेपाल भ्रमण वर्षको शुभारम्भ गर्ने कार्यक्रम छ ।

कार्यक्रम धनगढीस्थित संघीय प्रहरीको खेल मैदानमा हुनेछ । उद्घाटनको दिन सुदूरपश्चिम प्रदेशका सांस्कृतिक नृत्य, पहिरन र पर्यटकीय क्षेत्र झल्किने झाँकी प्रदर्शन गरिने छ ।

यसैगरी, कञ्चनपुरकोे पश्चिमी सीमा नाका गड्डाचौकीमा बुधबार सबैभन्दा पहिले प्रवेश गर्ने पर्यटकलाई सीमा नाकाममा भीमदत्त नगरपालिकाका प्रमुख सुरेन्द्र विष्टले स्वागत गर्ने कार्यक्रम छ ।

स्वागतपछि महेन्द्रनगर बजारको मदनचोकमा औपचारिक कार्यक्रमको आयोजना गरी पर्यटकलाई बग्गीमा राखेर नगर परिक्रमा गराइने छ ।

नगरभित्रका पर्यटकीय क्षेत्रको प्रचारप्रसारका लागि तयार गरिएका प्रचार सामग्री समेत सोही क्रममा वितरण गरिने नगर प्रमुखका प्रेस सल्लाहकार रनी विवसले बताए ।

डडेल्धुराको अमरगढी नगरपालिकमा समेत नेपाल भ्रमण वर्षका अवसरमा भव्य कार्यक्रमको आयोजना गरिएको छ । ‘घुम्न जाऔं अमरगढी’ अभियानको बुधवार एक समारोहबीच सञ्चार तथा सूचना प्रविधि मन्त्री गोकुलप्रसाद बाँस्कोटाले सुभारम्भ गरेका छन् ।

कार्यक्रमका लागि मन्त्री बाँस्कोटा मंगलवार नै अमरगढी पुगिसकेका थिए । सुदूरपश्चिमका अन्य जिल्लामा समेत नेपाल भ्रमण वर्षका अवसरमा अन्तक्रिया, गोष्ठी, र्‍यालीलगायतका कार्यक्रम तय भएका छन् ।