भ्रमण वर्ष उद्घाटन गर्न सञ्चारमन्त्री बाँस्कोटा डडेल्धुरामा

A+ A A-

अमरगढी नगरपालिकाले बुधबार ‘घुम्न जाऔं अमरगढी’ अभियानको एक भव्य कार्यक्रमकाबीच शुभारम्भ गर्दैछ ।

भ्रमण वर्ष २०२० लाई लक्षित गरी संचालन गरिने ‘घुम्न जाऔं अमरगढी’ अभियानको नेपाल सरकारका सञ्चार तथा सूचना प्रविधिमन्त्री गोकुल बाँस्कोटाले शुभारम्भ गर्ने भएका छन् ।

सरकारका प्रवक्ता समेत रहेका मन्त्री बाँस्कोटा अभियानको उद्घाटन गर्न डडेल्धुरा जिल्ला सदरमुकाम पुगेका छन् ।

उद्घाटन कार्यक्रममा डडेल्धुराबाट प्रतिनिधित्व गर्ने प्रतिनिधिसभा, राष्ट्रियसभा र प्रदेशसभाका सदस्यसहित सबै स्थानीय तहका प्रमुख–उपप्रमुखहरूलाई आमन्त्रण गरिएको नगरप्रमुख ओझाले जानकारी दिए। ‘घुम्न जाऔं अमरगढी’ अभियान सफल पार्नका लागि नगरप्रमुख ओझाको संयोजकत्वमा ६ सय जनाको मूल समिति निर्माण गरिएको छ ।

अमरगढी नगरपालिकाका जनप्रतिनिधि, कर्मचारी, अमरगढीभित्र अध्यापन गराइरहेका शिक्षक, स्वयमसेविका, व्यवसायीलगायतको सहभागितामा सो समिति गठन गरिएको हो ।

‘घुम्न जाऔं अमरगढी’ अभियानको शुभारम्भ कार्यक्रममा स्थानीय कला संस्कृति झल्कने झाँकी प्रदर्शनी, देउडा, हुड्केली, पञ्चेबाजा, सगुन प्रर्दशन गरिने नगरपालिकाले जनाएको छ । बुधबारको कार्यक्रमका लागि मंगलबार डडेल्धुरा सदरमुकाम संगारिएको छ ।

अन्य स्थानीय तहहरु पनि सक्रिय
डडेल्धुराको भित्री मधेसमा पर्ने आलिताल गाउँपलिकाले बुधबार दिउँसो १२ बजे गोदाम बजारमा बृहत ¥यालीको आयोजना गरी नेपाल भ्रमण वर्ष २०२० को शुभारम्भ गरिने गाउँपालिकाका अध्यक्ष बलबहादुर गुरुङले जानकारी दिए ।

गन्यापधुरा गाउँपालिकाले पनि आफ्नो क्षेत्रमा रहेका पर्यटकीय क्षेत्रहरुको प्रचार प्रसार गरि पर्चा–पम्पलेट बनाइरहेको जनाएको छ । सामाजिक संजालमार्फत गाउँपालिकामा रहेका पर्यटकीय स्थलहरुको प्रचार–प्रचार प्रसार गरिरहेको गाउँपालिकाका अध्यक्ष नवलबहादुर मल्ल बताए ।

गाउँपालिकाका हरेक क्षेत्रमा स्वागत गेट बनाएर रंग रोगनको कार्य जारी रहेको उनको भनाइ छ । नवदुर्गा गाउँपालिका र परशुराम नगरपालिकाले पनि आफ्नो क्षेत्रमा रहेका पर्यटकीय क्षेत्रहरुको खोजी तथा नाम चलेका पर्यटकीय क्षेत्रहरुको व्यापक रुपमा प्रचार–प्रसार गरिरहेका छन् ।

नेपाल भ्रमण वर्ष २०२० लाई लक्षित गर्दै अजयमेरु गाउँपालिकाले महिला–पुरूष खुला हाफ म्याराथन प्रतियोगिता आयोजना गर्दैछ । जगन्नाथ मन्दिरदेखि अजयमेरुकोटसम्म खुला हाफ म्याराथन प्रतियोगिता आयोजना गरिएको गाउँपालिकाका अध्यक्ष उमेशप्रसाद भट्टले जानकारी दिए ।

सो हाफ म्याराथन प्रतियोगिताको आयोजना गर्दै नेपाल भ्रमण वर्ष २०२० को शुभारम्भ गरिनेसमेत उनले जानकारी दिए ।

प्रतियोगितामा पहिलो, दोस्रो र तेस्रो हुने प्रतियोगीलाई पुरस्कारको समेत प्रदान गरिने गाउँपालिकाका प्रमुख प्रशासकीय अधिकृत खेमराज पौडेलले जानकारी दिए । उनका अनुसार पहिलो हुनेले १० हजार, दोस्रोले सात हजार र तेस्रो हुनेले पाँच हजार पाउनेछन् ।

अजयमेरू गाउँपालिकाले ऐतिहासिक अजयमेरुकोटबाट नेपाल भ्रमण वर्ष २०२० को शुभारम्भ गर्दैछ । बुधबार बिहान ११ बजे अजयमेरुकोटमा एक कार्यक्रमकाबीच भ्रमण वर्षको शुभारम्भ गरिने गाउँपालिकाका अध्यक्ष भट्टले जानकारी दिए ।

नेपाल भ्रमण वर्ष २०२० लाई लक्षित गरी भागेश्वर गाउँपालिकाले ‘घुम्न जाऔं भागेश्वर’ नारा दिएको छ । सो अभियानको बुधबार विधिवत रुपमा सुरु गरिने गाउँपालिका अध्यक्ष कौशिला भट्टले बताइन् ।

‘घुम्न जाऔ भागेश्वर’ पुस १६ गते ५ वटै वडाको केन्द्र विन्दुमा रहेको रहेको स्थान टपुवालेकमा तय गरिएको उनले बताइन् ।

भगेश्वर गाउँपालिकाको सबै भन्दा अग्लो क्षेत्र महाभारत पर्वत आफंैमा भ्यू टावर रहेको टप्पवा लेकको प्रचार—प्रसार गर्ने र वडाका सबै सम्भावित पर्यटकीय सम्भावना बोकेका क्षेत्रहरुको प्रचार–प्रसार गर्न ‘घुम्न जाऔँ भागेश्वर’ अभियानका रूपमा मनाउने वडा नम्बर ३ का वडा अध्यक्ष रामबहादुर शाहीले बताए ।

आज हुने ‘घुम्न जाऔं भागेश्वर’को उद्घाटन समारोहको सम्पूर्ण तयारी पूरा गरी भइ सकेको शाहीले जानकारी दिए ।

प्रकाशित मिति: बुधबार, पुस १६, २०७६ ०९:४९