भ्रमण वर्ष २०२०ः धनगढीका पर्यटकीय स्थल घुम्न निःशुल्क बस सेवा

A+ A A-

भ्रमण वर्ष २०२० लाई लक्षित गर्दै धनगढीका पर्यटकीय स्थल घुम्न निःशुल्क बस सेवा सुरु गरिने भएको छ । धनगढी उपमहानगरपालिकाले भ्रमण वर्ष सफल बनाउन सुरुका ५ दिन पर्यटकका लागि निःशुल्क बस सेवा उपलब्ध गराउने भएको हो ।

सोमबार धनगढीका सरोकारवालाहरुसँग छलफल गर्दै धनगढी उपमहानगरपालिकाले भ्रमण वर्ष २०२० को सुरुका दिनमा सकारात्मक सन्देश प्रवाह गर्ने योजना बनाएको हो । निःशुल्क बस सेवा त्रिनगर भन्सार नाकाबाट बेहडाबाबा, थारु होमस्टे गाउँ घुमेर पुनः त्रिनगर भन्सारसम्म सञ्चालन गरिने छ ।

धनगढी उपमहानगरपालिकाका प्रमुख नृपबहादुर वडले भ्रमण बर्ष सफल बनाउनका लागि सबै पक्ष तयार हुनुपर्नेमा एकमत रहेको बताए ।

‘धनगढी उपमहानगरपालिकाले पहिलो दिनबाटै नेपाल–भारत नाकामा पर्यटक सहायता कक्ष सञ्चालन गर्ने तयारी गरेको छ,’ उनले भने, ‘त्यस दिन नेपाल भित्रिने पर्यटकहरुलाई चिया तथा कफी खुवाएर फुलमाला र खादाले स्वागत गर्ने योजना छ ।’

त्यसैगरी, धनगढीका पर्यटकीय स्थल, त्यहाँसम्मको दुरी, त्यहाँका विशेषता, पर्यटकीय गतिविधी तथा महत्वलाई सामाजिक सञ्जालमा पेज बनाएर प्रचार गरिने उपमहानगरपालिकाका प्रमुख प्रशासकिय अधिकृत नारायणप्रसाद सापकोटाले बताए ।

साथै, ब्रोसर तयार गर्ने, नगरको सरसफाई गर्ने, धनगढी देखि भारतको पलिया बजारसम्म भ्रमण वर्ष २०२० को सन्देश दिनेगरी साईकल यात्रा गर्ने लगायतका कार्यक्रमहरु तय गरिएको पनि उनले जानकारी दिए ।

प्रदेश तथा संघीय सरकारले पर्यटक वर्ष २०२० सफल बनाउनका लागि गर्ने सबै गतिविधीमा पनि धनगढी उपमहानगरपालिकाले सहभागिता जनाउने सापकोटाले बताए ।

यस्तै, भ्रमण वर्षको अवसर पारेर होमस्टे गाउँ भादा थारु महोत्सवको पनि उद्घाटन गर्ने कार्यक्रम रहेको छ ।

प्रकाशित मिति: सोमबार, पुस १४, २०७६ १९:५९