अजोड इन्स्योरेन्सको आईपीओ निष्कासन गर्ने प्रस्ताव पारित

A+ A A-

अजोड इन्स्योरेन्सले सर्वसाधारण सेयर (आईपीओ) निष्कासन गर्ने भएको छ । कम्पनीको यही पुस ११ मा सम्पन्न दोस्रो साधारणसभाले आईपीओ निष्कासन गर्ने प्रस्ताव पारित गरेको हो ।

सभाले सञ्चालक समितिको तर्फवाट अध्यक्षले प्रस्तुत गरेको आर्थिक वर्ष २०७५/०७६ को वार्षिक प्रतिवेदन पारित गर्नुका साथै लेखापरीक्षकको प्रतिवेदनसहितको आव २०७५।०७६ को वासलात, नाफा नोक्सान हिसाब, आय ब्यय हिसाब तथा नगद प्रवाह विवरण र सोसँग सम्बन्धित अनुसूचीहरूसहितको वित्तीय विवरणउपर छलफल गरी पारित पनि गरेको छ ।

त्यस्तै, सभाले कम्पनी ऐन, २०६३ को दफा १११ बमोजिम आ.व. २०७६।०७७ को लेखा परीक्षण गर्न सञ्चालक समितिको सिफारिशमुताविक लेखापरीक्षक श्री मदन निरौला एण्ड कम्पनी, चार्टर्ड एकाउन्टेन्ट्सलाई नियुक्त गर्ने र निजलाई दिइने पारिश्रमिकसमेत निर्धारण गरेको छ ।

त्यस्तै, कम्पनीको प्रवन्धपत्र तथा नियमावलीको दफा तथा नियम संशोधन गर्ने प्रस्ताव पनि पारित गरेको छ ।

अजोड इन्स्योरेन्सले कारोबार सञ्चालन गरेको छोटो अवधिमा नै देशभर सातवटा प्रादेशिक कार्यालय, १६ वटा शाखा कार्यालय १५ वटा उपशाखा कार्यालय, १८ वटा तेस्रो पक्ष बीमा काउण्टरहरू र एउटा ग्राहक सेवा केन्द्रमार्फत आफ्ना सेवाग्राहीहरूलाई आफ्नो सेवा प्रदान गरिरहेको छ ।

३६५ दिन नै बीमा सेवा प्रदान गर्दै आएको यस कम्पनीले फास्ट ट्रयाक दाबी भुक्तानी नीति अवलम्वन गरी २ लाख रुपैयाँसम्मको दाबी तत्कालै भुक्तानी गर्ने व्यवस्थासमेत गरेको छ । साथै, कम्पनीले डिजिटल बीमाका लागि ‘च्याट बोर्ड’समेत परीक्षणमा ल्याइसकेको छ ।

कम्पनीले चालू आवको हालसम्म ४८ हजार ७१ वटा बीमालेख जारी गरी ३५ करोड ९२ लाख रुपैयाँ बीमा शुल्कबापत आर्जन गर्नुका साथै हालसम्म ८ सय ६६ वटा दाबीबापत १० करोड १२ लाख रुपैयाँ दाबी भुक्तानी गरिसकेको छ । हाल कम्पनीको संस्थापक सदस्यहरूबाट कायम चुक्ता पुँजी ७० करोड रुपैयाँ छ भने लगानीतर्फ ९५ करोड ९७ लाख रुपैयाँ रहेको छ ।

प्रकाशित मिति: आइतबार, पुस १३, २०७६ १९:०८