२३ करोड २४ लाखको लागतमा बुटवलमा ढुवानीग्राम बन्दै

A+ A A-

बुटवलमा रुपन्देही परिवहन कम्पनीले ढुवानीग्राम निर्माण गर्ने भएको छ । २३ करोड २४ लाख रुपैयाँको लागतमा बुटवल– १२ मा ढुवानीग्राम निर्माण हुने भएको हो ।

ढुवानीग्राम निर्माणका लागि बुटवल उपमहानगरपालिकाले निर्माण कम्पनीसँग सम्झौतासमेत गरिसकेको छ । बीओटी मोडलमा (बिल्ट, अपरेट र ट्रान्सफर मोडल) निर्माण हुने उक्त ढुवानीग्राम निर्माणका लागि २५ माघ २०७५ मा कार्यपालिकाले निर्णय गरेको थियो ।

ढुवानी ग्राम निर्माणका लागि २०७६ पुष ७ मा बुटवल उपमहानगरपालिका र रुपन्देही परिवहन प्रालिबीच सम्झौता भइसकेको छ । २०७६ असोज १८ मा मनशायपत्र आव्हान गरिएकोमा बुटवल– ४ स्थित रुपन्देही परिवहन प्रालि र रामपुर ढुवानी सेवा सूचीकरणमा पर्न सफल भएका थिए । पछि प्रस्ताव मूल्यांकनका आधारमा परिवहन प्रालिसँग निर्माणका लागि सम्झौता गरिएको हो । ढुवानीग्राममा जम्मा ४९ सेडहरू निर्माण हुनेछन् ।

ढुवानीग्राम निर्माणपछि बुटवलका ब्यस्त बजारमा हुने ढुवानी सोही क्षेत्रमा स्थानान्तरण हुनेछन्, जसले बुटवलको भीडभाडसमेत कम हुने बुटवल उपमहानगरपालिकाका नगरप्रमुख शिवराज सुवेदीले बताए ।

रुपन्देही परिवहन कम्पनीले एक वर्ष अवधिभित्र सेडहरू निर्माण गर्नेछ । १५ वर्षपछि उक्त ढुवानीग्राम उपमहानगरपालिकालाई हस्तान्तरण गर्ने बताइएको छ । ढुवानीग्रामको गुरुयोजना बुटवल उपमहानगरपालिकाले निर्माण गरिसकेको छ ।

गुरुयोजनाअनुसार यस ढुवानीग्रामको कुल अनुमानित लागत २३ करोड २४ लाख ७९ हजार ६ सय ७४ रुपैयाँ रहेको छ । सेड निर्माणको अनुमानित लागत प्रतिसेड रु २६ लाख ३२ हजार ३ सय २० का दरले ४९ सेडको १२ करोड ८९ लाख ८३ हजार ६ सय ८० रुपैयाँ रहेको छ ।

निर्माण हुने एउटा सेड १ हजार ५ सय ५० वर्गफुट क्षेत्रफलको हुनेछ । प्रतिसेडको मासिक बहाल प्रतिवर्गफुट २ रुपैयाँका दरले ३ हजार १ सय रुपैयाँ हुने र बहाल रकम प्रत्येक २ वर्षमा १० प्रतिशतका दरले वृद्धि हुनेछ ।

सो क्षेत्रमा पहुँचमार्ग, ढल तथा नाली, बिजुली र खानेपानी, शौचालय, तारबारलगायत संरचनाहरू बुटवल उपमहानगरपालिकाले निर्माण गर्ने बताइएको छ । त्यति मात्र नभई पार्किङ स्थल, व्यावसायिक भवनसहितका दुईवटा होटल, मन्दिर, हेल्थपोष्ट, टायर मर्मत सम्भार पसल, प्रतीक्षालय, नुहाउने, युरिनलसहितका शौचालयहरू, अफिस, पुलिस चौकी पनि रहने बताइएको छ ।

प्रकाशित मिति: आइतबार, पुस १३, २०७६ १७:३७