अदालतपरिसरमा निषेधाज्ञा जारी गरेर सिद्धाबाबाको मुद्दा सुनुवाइ

A+ A A-

अनुयायी बलात्कारको अभियोग लागेका कृष्णबहादुर गिरी (सिद्धबाबा) को थुनछेक बहसलाई मध्यनजर गर्दै सुनसरी जिल्ला अदालत परिसरबाहिर निषेधाज्ञा जारी गरिएको छ ।

पक्ष र विपक्षमा सर्मथकहरूको नारा जुलुस गरेपछि भीडलाई मध्यनजर गर्दै अदालत परिसरबाहिरको करिब २० मिटरवरिपरिको क्षेत्रमा प्रवेश निषेध गरिएको प्रहरीले जनाएको छ ।

सो क्षेत्रमा नाराबाजी र प्रदर्शनलाई बन्देज गरिएको छ । प्रहरीको निषेधाज्ञापश्चात अदालतबाहिरको क्षेत्रमा समर्थन र विरोधमा नाराबाजी थालिएको छ ।

यसैबीच, प्रहरीले सिद्धबाबालाई अदालतमा उपस्थित गराएको छ । प्रहरीले उनलाई विराट नर्सिङ होमबाट एम्बुलेन्समा राखी अदालतमा उपस्थित गराएको हो । अदालतले थुनछेकको प्रक्रिया सुरु भएको जनाएको छ ।

सुनसरी जिल्ला अदालतका अनुसार थुनछेकका लागि ११ जनाको वकालतनामा परेको छ । पीडित महिलाको तर्फबाट सरकारी वकिलकाे कार्यालय सुनसरीका जिल्ला न्यायाधिवक्ता गोकुलबहादुर निरौला सहित छ जनाले बहस गर्दै छन् ।

वादीतर्फका न्यायाधिवक्ताहरूमा अनिल रेग्मी, अनन्त न्यौपाने, नवराज विष्ट, रेणुका राई र रेवती सुवेदी छन् ।

त्यसैगरी प्रतिवादी तर्फबाट डा. दिनेशराज सत्यालसहित सरोज गिरी, मोहन कोइराला, रमेश पराजुली र रुपेश कोइरालाले गिरीको बचाउमा वकालत गर्दैछन् ।

थुनछेक बहस बेलैमा सकिए अदालतले आजै साँझसम्म आदेश गर्न सक्ने सम्भावना रहेको कानुन व्यवसायीहरूको भनाइ छ । बहस लम्बिएको खण्डमा भने अदालती प्रक्रिया अर्को दिनलाई सर्न सक्ने सम्भावना छ ।

भोलि सोमबार अदालत छेउमै हटिया लाग्ने र भीडभाड बढी हुने सम्भावनालाई मध्यनजर गर्दै आज कार्यालय समयभित्रै बहस सकिए साँझ अबेरसम्ममा आदेश आउन सक्नेसमेत अड्कलबाजी भइरहेका छन् ।

शुक्रबार अदालतभित्र गिरीको बयान लिइँदै गर्दा परिसरबाहिर समर्थन र विरोधमा भएका नाराबाजी र भीडलाई मध्यनजर गर्दै आज प्रहरीले कडाइ गरेको छ ।

सरकारी वकिलमार्फत अदालतमा पेश भएको अभियोग पत्रमा कृष्णबहादुर गिरीले मुलुकी अपराध संहिता, २०७४ को दफा २१९ को १,२ र ३(ङ) बमोजिम कसुर गरेकोेले सिद्धबाबा, रामकृष्णाचार्य, श्री वैष्णव कृष्ण दास भन्ने कृष्णबहादुर गिरीलाई सजाय गर्न माग गरिएको छ ।

अभियोग प्रमाणित भए गिरीलाई ७ देखि १० वर्ष सजाय हुन सक्नेछ । गिरीले शुक्रबार अदालतसमक्ष आफूमाथि लगाइएको अभियोग अस्वीकार गर्दै बयान दिएका छन् ।

प्रकाशित मिति: आइतबार, पुस १३, २०७६ १६:०९