व्यस्त ठमेलः तार काटियो, होर्डिङ बोर्ड कहिले ?

A+ A A-

पोल पोलमा असरल्ल छ बिजुलीका तार । एकैठाउँ गाँठो पारिएका छन् तार ।

सेता कपाल, राता अनुहार, अग्ला शरिर भएका, अंग्रेजी र अरु नै नवुझिने भाषामा वोल्ने मान्छे ओहोर दोहोर गरिरन्छन् ।

र घरिघरि टाउको ठाडो पारेर माथि हेर्छन । घाँटीमा झुण्डाएको क्यामेरा उँभो फर्काएर खिचिक्क पार्छन ।

काठमाडौंको व्यस्त बजार अझ भनौं पर्यटकीय शहर ठमेलको दैनिकी हो यो । हजारौं पर्यटकको रोजाइ ठमेल अव्यवस्थित तारका कारण असरल्ल बनेपछि स्थानीय नै बिरोधमा उत्रिए । बल्ल जाग्यो महानगरपालिका ।

अहिले ठमेलमा असरल्ल बिजुलीका तार हटेका छन् । टेलिफोन, इन्टरनेट सेवा प्रदायक र केवल टिभी प्रदायकका तारका कारण कुरुप बनेको ठमेल तारबिहीन चिटिक्क देखिदै छ ।

ठमेलमा यतिवेला बिजुली, टेलिफोन र इन्टरनेटको समस्या छ । स्थानीय भन्छन्, बरु दुईचार दिन सहन्छौ तर यस्ता असरल्ल ठमेल हामीलाई पचेन ।’

तार नपचेका स्थानीयले ध्यान नै नदिएको अर्को समस्या पनि छ ठमेलमा ।

साघुँरा गल्लीबाट छिर्दै हिड्दा पोलमा देखिने दिक्कलाग्दा तारभन्दा बिकराल समस्या छ ठमेलमा, होर्डिङ वोर्डका ।

सहकारी, पसलका नाम, स्कुलका बिज्ञापनलगायतका होर्डिङवोर्ड घरैपिछे छन् । अझ एउटा घरमा टक्क अडिएर गन्ने हो भने कम्तीमा ५ वोर्ड भटिन्छन् ।

पोलका तार खिचिक्क पार्ने पर्यटक तार छोडेर बोर्डका फोटो खिच्छन् । तार हटाउने अभियान थालेको महानगर बोर्ड हटाउन भने अहिलेसम्म अग्रसर बनेको छैन ।

मापदण्डअनुसारको सडक छैन । सडकको क्षमताभन्दा धेरै सवारी साधन छन् । यो ठमेलको मात्र होइन, काठमाडौंका अधिकांश भित्री भागको समस्या हो ।

महानगरपालिकाले ठमेलका पोलमा असरल्ल पारिएका तार हटाएपनि होर्डिङ वोर्ड र साँघुरा गल्लीको स्थायी समाधान नखोजेसम्म ठमेल चिटिक्क पर्ने नसक्ने स्थानीयवासी बताउँछन् ।

त्यसो त ठमेलको सौन्दर्य बाहिरी मान्छेले विगारेका भने होइनन् । वाटोको बीचसम्म नै नाक पोल्नेगरी होटल रेष्टुरेन्टवाट आएका मासु र खोर्सानी पोलेका गन्ध, सडकमै जोडिएको ढोकाको ठेलामा राखिएका बासीभातको पोकाले ठमेल रोज गन्हाइरहन्छ ।

महानगरपालिकाले हरेक दिन फोहोरका गाडी पठाउँछ तैपनि सकिदैन ठमेलको फोहोर ।

भाडाका सवैजसो घरमा कम्तीमा तीनवटा अफिस छन् । ती सवैले होर्डिङ बोर्ड राखेकै छन् ।

व्यवसायिक प्रयोजनका लागि राखिने यी होर्डिङ बोर्ड कति साइजसम्म राख्न पाइने हो भन्ने मापदण्ड कार्यान्वयन नहुँदा ठमेललगायत उपत्यकाका अधिकांश शहरी भाग कुरुप बन्दै गएका छन् ।

भ्रमण वर्ष २०२० लाई लक्षित गरेर काठमाडौं महानगरपालिका, नेपाल टेलिकम, विद्युत प्रधिकरण र महानगरीय प्रहरी कार्यालयको समन्वयमा ठमेलको तार काट्ने निर्णय गरिएको हो ।

प्रकाशित मिति: बिहीबार, पुस १०, २०७६ १४:३०