कृषिमा आत्मनिर्भर बन्न 'एक वडा, एक उत्पादन' कार्यक्रम

A+ A A-

कञ्चनपुरको कृष्णपुर नगरपालिकाले कृषिक्षेत्रको विकासका लागि ‘एक वडा, एक उत्पादन’ कार्यक्रम सञ्चालन गरेको छ ।

कृषि व्यवसायमार्फत् स्थानीयवासीलाई आत्मनिर्भर बनाउने गरी सो कार्यक्रम सञ्चालन गरिएको नगरपालिकाले जनाएको छ ।

कार्यक्रमका लागि चालू आर्थिक वर्षमा २७ लाख रुपैयाँ बजेट विनियोजन गरेको छ । विशेषगरी तरकारी खेतीमा आत्मनिर्भर बनाउनका लागि वडाको भौगोलिक विशिष्टताका आधारमा कार्यक्रम सञ्चालन गरिएको नगरपालिकाले जनाएको छ ।

प्रत्येक वडाका बासिन्दाले फाइदा लिन सक्नेगरी माटो सुहाउँदो तरकारी बाली र केराखेतीका लागि स्थान छनोट गरी कार्यक्रम सञ्चालन गरिएको नगरपालिकाका कृषि शाखाका कृषि प्रसार अधिकृत लालबहादुर धामीले बताए ।

कार्यक्रमअन्तर्गत नगरपालिकाका नौ वडामध्ये वडा १, २, ३, ६, ७, ८ लाई तरकारी खेती, वडा ४, ५ लाई केराखेती र वडा ९ लाई च्याउखेतीका लागि छनोट गरिएको छ ।

कृषि प्रसार अधिकृत धामीले कार्यक्रमको मुख्य उद्देश्य कृषिलाई व्यावसायिक बनाउनु नै हो भन्दै कार्यक्रमअन्तर्गत किसानलाई बजारीकरणमा पनि सहयोग गरिने योजना रहेको बताए ।

उनले सुरुमा किसानलाई मल, बिउ र अन्य कृषिजन्य सामग्री अनुदानमा उपलब्ध गराउने गरपालिकाको योजना रहेको जानकारी दिए ।

स्थानीयवासीलाई गाउँमै रोजगारी दिन यो कार्यक्रम लागू गरिएको नगरपालिकाका प्रमुख कर्णबहादुर हमालले बताए ।

केरा उत्पादनमा लागेका किसानलाई सहयोग पुर्‍याउन केरा पकाउने र्‍यापिङ च्याम्बरसमेत स्थापना गरी सञ्चालनमा ल्याइएको छ ।