सांसद खड्काले गरे स्वर्ण विजेता खेलाडीको सम्मान

A+ A A-

१३औं सागका स्वर्ण विजेता दुई खेलाडी सम्मानित भएका छन् । पूर्वशहरी विकासमन्त्री एवं प्रतिनिधिसभा सदस्य डा. नारायण खड्काले करातेको व्यक्तिगत विधातर्फ स्वर्ण जितेकी अनुपमा मगर र महिला टिम कातातर्फ स्वर्ण जित्न सफल संगीता मगरलाई नगदसहित सम्मान गरेका हुन् ।

गोल्फुटारस्थित आफ्नै निवासमा एक कार्यक्रम आयोजना गरी डा. खड्काले स्वर्णविजेता खेलाडीद्वयलाई दोसल्ला ओढाएर नगद पाँच/पाँच हजार प्रदान गरे । ‘तपाईंहरूले उदयपुरसँगै समग्र देशको शान बढाउनुभएको छ,’ डा. खड्काले भने, ‘खेलाडीको बर्हत्तर विकास र सहयोगका लागि नीतिगत व्यवस्थाको पहल म गर्नेछु ।’राज्यबाट पर्याप्त सुविधा नपाएको अवस्थामा पनि दक्षिण एसियामा उत्कृष्ट हुनु सामान्य कुरा नभएको सांसद खड्काले बताए । ‘खेलाडीहरूले राज्यलाई एउटा पाठ पनि सिकाएका छन्, राज्यले खेलाडीलाई अझै सुविधा प्रदान गर्ने हो भने नतिजा योभन्दा कैयौं गुणा राम्रो आउने रहेछ,’ उनले भने ।

कार्यक्रममा कराते प्रशिक्षक रामकुमार थारूले चानचुने मेहनतले यो नतिजा नआएको बताए । ‘खेलाडीको जति दुःख यो मुलुकमा कसको होला र ? अहिले जेजति नतिजा हामीले हात पारेका छौं, त्यसमा खेलाडीको संघर्ष र मेहनतको वर्णन गर्ने हो भने आँखाबाट आँशु आउँछ ।’ Image may contain: 2 people, people smiling, people standing उनले उदयपुरबाट मात्रै ११ खेलाडीले मेडल हात पारेकाे जानकारी पनि दिए ।

स्वर्ण पदक विजेता अनुपमा मगरले आफूलाई गरिएको सम्मानले अझै अगाडि बढ्न हौसला प्राप्त भएको बताइन् । ‘मैले थुप्रै मेडलहरू जितेकी छु, तर यसपटक मैले धेरै वाहवाही पाएँ, सम्मान पाएँ,’ उनले भनिन्, ‘मलाई अझै उत्साहका साथ अगाडि बढ्न हौसला मिलेको छ ।’

स्वर्ण विजेता संगीता मगरले खेलाडी भएर देशको शान बढाउन पाउँदा गर्व लागेको बताइन् । ‘एउटा गाउँको सामान्य परिवारकी मैले देशको शान बढाउन पाएँ, यो मेरा लागि गर्वको कुरा हो, आगामी दिनमा पनि यस्ता काम गर्नेछु, जसले नेपालको झण्डाको गरिमा बढाउनेछ ।’ Image may contain: 13 people, including Nawaraj Shamsher Kunwar and Narayan Khadka, people smiling, people standing, outdoor and nature