गुरुकुलमा गुन्द्रीमा बसेर ‘छिँडीभरिको आकाश’ हेर्दै दर्शक

A+ A A-

विराटनगरस्थित आरोहण गुरुकुलको सुशीला कोइराला नाटकघरमा मञ्चन भइरहेको ‘छिँडीभरिको आकाश’ नाटकमा हरेक दिन हाउसफूल हुने गरेको छ । नाटक हेर्नेको भीड अत्यधिक बढेपछि भुइँमा गुन्द्री ओछ्याएरसमेत हेराउनुपर्ने अवस्था सिर्जना भएको आयोजकले बताएका छन् ।

आयोजकका अनुसार २ सय २५ सिट क्षमतोको सो हलमा हाल हरेक शोमा २ सय ६० जनाभन्दा बढी दर्शकले नाटक हेरिरहेका छन् ।

वरिष्ठ साहित्यकार परशु प्रधानको कथामा आधारित ‘छिँडीभरिको आकाश’ २८ मंसिरदेखि मञ्चन भइरहेको छ । विद्यालय र क्याम्पसहरूले अग्रिम शो बुकिङ गरेर विद्यार्थीलाई नाटक देखाउन ल्याइरहेको आयोजक विराट आदर्श साहित्यिक मञ्चका अध्यक्ष कट्वाल दीपकले बताए ।

दुर्व्यसनले मानिसलाई कुन अवस्थासम्म पुर्‍याउँछ भन्ने सन्देशमूलक नाटकको नाट्य रूपान्तरण र निर्देशन कट्वालले गरेका छन् । ग्रामीण र शहरिया जीवनलाई सशक्त रूपमा उठान गरिएको सो नाटकले मानिसलाई सही मार्गमा लाग्न प्रेरित गर्ने भएकाले पनि दर्शकको चाप बढेको आयोजक संस्थाका प्रमुख सल्लाहकार मीनकुमार नवोदितले बताए । पत्रकारसमेत रहेका नवोदितले भने, ‘दुर्व्यसनका कारण एउटा परिवार कसरी ध्वस्त हुन्छ भन्ने विषय यस नाटकमा कारुणिक रूपमा प्रस्तुत गरिएको छ । त्यसैले पनि यसले दर्शकको मन जित्न सफल भएको छ ।’

गत मंसिर २८ गते विराटनगर महानगरपालिकाका मेयर भीम पराजुलीले नाटक मञ्चनको उद्घाटन गरेका थिए । विराटनगर मात्रै नभएर रंगेली, इटहरी, टंकीलगायतका विद्यालय र कलेजले समेत अग्रिम बुकिङ गरेर विद्यार्थीलाई नाटक देखाउन ल्याइरहेको आयोजकले बताएका छन् ।

हालसम्म ५० वटाभन्दा बढी विद्यालय र कलेजका विद्यार्थीले नाटक हेरिसकेका छन् । कतिपय विद्यालय र कलेजले तीनवटा शोसम्म बुकिङ गरेर नाटक देखाएका छन् । विद्यार्थीबाहेक अन्य दर्शकको समेत आकर्षण बढेको कट्लवाले बताए । दर्शकको चापकै कारण नाटक मञ्चनको समयावधि बढाइएको छ । ८ पुससम्म मञ्चनको योजना भए पनि १४ पुससम्म मञ्चन हुने भएको छ ।

नाटकमा अभिनय गर्ने सबै कलाकार विद्यार्थी हुन् । विराटनगर महानगरपालिका प्रवद्र्धकका रूपमा रहेको छ भने मुख्य प्रायोजकमा काबरा ग्रुपको बुलेट चाउचाउ, प्रायोजकमा नमस्कार होटल म्यानेजमेन्ट स्कुल र सहप्रायोजकमा सोम्स कलेज रहेका छन् ।

त्यस्तै यो नाटक मञ्चनका लागि समाजसेवी विश्वकान्त दाहालले सहयोगीको भूमिका निर्वाह गरेका छन् भने मोरङ हिसान र प्याब्सन विराटनगरसँग सहकार्य रहेको छ । नाटकमा सन्देश बाराकोटी, अनुशा कटवाल, रमेश तिमल्सिना, अनिल खत्री, एञ्जल बस्नेत, उमेश पौडेल, माजिद अन्सारी, पार्वती कटवाल र अनुशा भण्डारीको अभिनय रहेको छ ।

त्यस्तै, व्यवस्थापनमा प्रभा पन्त र विवेक आचार्य रहेका छन् । मञ्चले यो नाटक यसअघि पनि आरोहण गुरुकुलमा दुई पटक मञ्चन गरिसकेको छ । मञ्चले यसअघि महाकवि लक्ष्मीप्रसाद देवकोटाको कृतिमा आधारित ‘मुनामदन’ नाटकसमेत मञ्चन गरिसकेको छ ।

प्रकाशित मिति: मंगलबार, पुस ८, २०७६ २०:०४