डेढ वर्षमै बिग्रिए लाखौंका सौर्यबत्ती

A+ A A-

सौर्य ऊर्जा प्रवर्द्धनका लागि धनगढीका विभिन्न क्षेत्रमा जडान गरिएका अधिकांश सडक सौर्यबत्ती बिग्रिएका छन् । स्थानीयसँगको साझेदारीमा २०७३ सालमा धनगढी उपमहानगरपालिकाले ७२ स्थानमा सौर्यबत्ती जडान गरेको थियो ।

तीन वर्षअघि मात्रै जडान भएका ती सौर्यबत्ती अहिले प्रयोगविहीनजस्तै छन् । गुणस्तरहीन सामग्रीको प्रयोगले जडान भएको केही समयमै सौर्यबत्ती बिग्रिएका थिए । पुनः सञ्चालनका लागि बिग्रिएका बत्ती मर्मत गर्न उपमहानगरपालिकाले चासो दिएको छैन ।

साैर्यबत्ती नबन्दा रात्रिकालीन यात्रा जोखिमपूर्ण बन्दै गएको स्थानीयको गुनासो छ । धनगढी–५, तारानगरकी तारा शर्माले सडक सौर्यबत्ती बिग्रिएको महिनौं बित्दा पनि मर्मतमा सम्बन्धित निकायको ध्यान नगएकाे बताए ।

अधिकांश बत्ती अहिले राति बल्दैनन् । शहरी सुरक्षाका लागि जडान भएका बत्ती नबल्दा रातिको समयमा हिँड्ने पैदलयात्रु असुरक्षित बनेका छन् । स्थानीय सीमा जोशी भन्छिन्, ‘कि त बिग्रिएका बनाउनु, नत्र नयाँ जडान गरे पनि हुन्थ्यो । दुवैतर्फ स्थानीय सरकारको ध्यान छैन । बत्ती नहुँदा अँध्यारो रातमा खुला सडकमा निस्कन पछि डर लाग्छ ।’

सडक बत्ती जडान गरे पनि ती बत्ती सञ्चालित छन् वा छैनन् भन्ने निरीक्षण पनि उपमहानगरले गरेको छैन । यस्तै, स्थानीयले पटक–पटक मर्मतका लागि अनुरोध गरे पनि बत्तीको अवस्था बुझ्न नगरपालिकाले कुनै कर्मचारी खटाएको देखिँदैन । संघीय सरकारको अनुदान र स्थानीयको साझेदारीमा उपमहानगरपालिकाले ५२ स्थानमा सौर्यबत्ती जडान गरेको थियो ।

४० लाख २३ हजारमै सेन्टर फर रिसर्च कन्जरभेसनले जडान सम्पन्न गरेपछि थप २० स्थानमा पनि सौर्यबत्ती राखिएको थियो । जडान भएपछि करिब एक वर्षसम्म निरन्तर बलेका बत्ती त्यसपछि एकाएक बिग्रिन थाले । बिग्रिएपछि नगरपालिका र जडान गर्ने कम्पनी कुनैले पनि अनुगमन गरेका छैनन् । उपमहानगरपालिकाका इन्जिनियर दीजराज भट्टले बिग्रिएका सौर्य बत्ती मर्मत र थप नयाँ जडानको तयारी भइरहको बताए ।

पुरानो भन्सारदेखि, उत्तरबेहडी, तारानगर र आसपासका सडकका अधिकांश सौर्य बत्तीमा समस्या आएको छ । बिग्रेको पाँच महिना बितिसक्दासमेत सरोकारवाला निकायले बेवास्ता गर्दा नगरवासीले आक्रोश पोखेका छन् ।

प्रकाशित मिति: आइतबार, पुस ६, २०७६ १३:५४