खाद्य डिपोको ताला तोडेर शक्ति प्रदर्शनमा सहभागी कार्यकर्तालाई चामल वितरण

A+ A A-

हुम्लाका एक गाउँपालिका अध्यक्षले आफैं खाद्य संस्थान डिपोको ताला ताडेर आफूनिकटका कार्यकर्तालाई चामल बाँडेका छन् । खार्पुनाथ गाउँपालिका अध्यक्ष कर्णबहादुर रावलले नेपाल खाद्य संस्थान बिक्री केन्द्रको ताला तोडेर चामल बिक्री गरेका हुन् ।

अध्यक्ष रावलले खार्पुनाथ गाउँपालिका– ५ स्थित याङचुकुनामा रहेको बिक्री केन्द्रको ताला ताडेर ३६ क्वीन्टल चामल बिक्री गरेको बताइएको छ । अध्यक्ष आफैंले खाद्य डिपोको ताला तोडेर चामल बिक्री गरेको खार्पुनाथ गाउँपालिका–१ का स्थानीय लोकेन्द्र शाहीले जानकारी दिए । डिपोबाट चामल बिक्री गर्नुपर्दा संस्थानका कर्मचारी, प्रहरी–प्रशासनका प्रतिनिधि र स्थानीय तहको रोहबरमा मात्र बिक्री गर्न पाइने व्यवस्था छ ।

‘अध्यक्षले कसैसँग समन्वय नै नगरी आफैं ताला तोडेर आफूनिकटका कार्यकर्तालाई चामल बिक्री गरे,’ उनले भने । गाउँपालिका अध्यक्ष रावल कांग्रेसबाट निर्वाचित जनप्रतिनिधि हुन् । उनले कांग्रेसनिकट कार्यकर्तालाई मात्र चामल दिएको स्थानीयको आरोप छ । ‘चामल सबैलाई मिलाएर वितरण गर्न हामीले माग गरेका थियौं । तर, हाम्रो कुरै नसुनी आफैं ताला फोडेर आफूनिकट कार्यकर्तालाई मात्र दिएका छन्’ लोकेन्द्रले थपे ।

खाद्य डिपोको ताला तोड्न गाउँपालिका अध्यक्ष रावललाई वडा नम्बर ५ का वडाध्यक्ष भीमराज शाही र प्रभु बैंकका कर्मचारी रामजन शाहीलगायतले सघाएको स्थानीयले बताएका छन् । नियमविपरीत काम गरेको भन्दै अध्यक्ष रावललगायत यसमा संलग्न अन्यलाई पनि कारबाही गर्न स्थानीयले माग गरेका छन् ।

पार्टीको शक्ति प्रदर्शनमा सहभागी कार्यकर्तालाई दिइयो चामल

गाउँपालिका अध्यक्ष रावलले पार्टीको शक्ति प्रदर्शनमा आउनेलाई चामल दिएका छन् । अध्यक्ष रावल आफैंले पुस २ गते सदरमुकाममा आयोजना गरिएको सरकारविरुद्धको शक्ति प्रदर्शनमा सहभागी कार्यकर्तालाई चामल दिएको स्वीकारेका छन् । शक्ति प्रदर्शन गर्दा सहभागी कार्यकर्तालाई दिइएको कुपनको चामल आफूले वितरण गरेको अध्यक्ष रावलले बताए ।

‘सरकारविरुद्ध पार्टीले शक्ति प्रदर्शनमा सहभागी गराएका कार्यकर्तालाई पार्टीका केन्द्रीय सदस्य तथा प्रदेशसभा सदस्य जीवनबहादुर शाहीले चामलको कुपन दिनुभएको थियो,’ अध्यक्ष रावलले भने, ‘मैले सोही कुपन लिएका कार्यकर्तालाई चामल दिएको हुँ ।’ खाद्य संस्थानका प्रमुख र सहायक प्रमुख जिल्ला अधिकारीले बिक्री केन्द्रबाट चामल लिन भनेपछि आफूले ताला तोडेर चामल बिक्री गरेको अध्यक्ष रावलको भनाइ छ ।

यता सहायक प्रमुख जिल्ला अधिकारी दत्तराज हमालले अध्यक्ष रावलले कानुन हातमा लिएर चामल वितरण गरेको आरोप लगाए । ‘बिक्री केन्द्रमा लगाएको ताला प्रहरी, प्रशासन र स्थानीय तहका प्रतिनिधिको रोहवरमा मुचुल्का उठाएर मात्र काट्नुपर्ने हो,’ उनले भने, ‘तर अध्यक्ष आफैंले मनलाग्दी चामल बाँडे । मैले यहाँलाई त्यसरी चामल बाँड्न भनेकै थिइनँ । सर्वसाधारणका लागि बिक्री गर्न राखिएको चामल त्यसरी कार्यकर्तालाई बाँड्नु उचित होइन, यस विषयमा छानबिन हुन्छ ।’ यता बिक्री केन्द्रका प्रमुख रामबहादुर विष्टले भने ताला तोडेर चामल बिक्री गरेको विषयमा भने बोल्न चाहेनन् ।

प्रकाशित मिति: आइतबार, पुस ६, २०७६ ११:५५