अपहरणमा परेकी गाउँपालिका अध्यक्षकी पत्नी कालिकोटमा भेटिइन्, अध्यक्षको अवस्था अज्ञात

अपहरणमा परेकी गाउँपालिका अध्यक्षकी पत्नी कालिकोटमा भेटिइन्, अध्यक्षको अवस्था अज्ञात

A+ A A-

शनिबार मध्यराति ठाँटीकाँध गाउँपालिका अध्यक्ष धीरबहादुर शाहीसँगै घरबाटै अपहरणमा परेकी शाहीकी पत्नी इलामल्ल शाही फेला परेकी छन् । गाउँपालिकोको उत्तरतर्फ कालिकोटको सिमाना सुकानेको जंगलमा उनी भेटिएकी हुन् । जंगल आसपासमा फेला परेको ठाँटीकाँध गाउँपालिका–१ का वडाध्यक्ष नर्तमबहादुर बुढाले जानकारी दिए ।

विप्लव समूहका कार्यकर्ताले अपहरण गरेको आशंका गरिएको छ । वडा नम्बर २ का अध्यक्ष रूपलाल विकले अध्यक्ष शाहीलाई अपहरण गरेर कालिकोटतर्फ लगिएको हुन सक्ने बताए ।

सोधपुछका लागि भन्दै अज्ञात समूहले शनिबार राति १२ बजे अध्यक्ष शाही दम्पत्ती, अध्यक्ष शाहीका भाइ हस्तबहादुर शाहीलाई घरबाटै अपहरण गरेका थिए । भाई हस्तलाई भने केही बेरमै आधा बाटोबाट फर्काइएको थियो । अध्यक्ष शाहीको अवस्था अज्ञात छ ।

स्थानीय नागरिक, जनप्रतिनिनिध र कालिकोट तथा दैलेखकको प्रहरीको संयुक्त टोलीलले अपहरणमा परेका अध्यक्ष शाहीको खोजी गरिरहेको छ । २ नम्बर वडाध्यक्ष विकका अनुसार अज्ञात व्यक्तिले गाउँपालिका अध्यक्ष शाहीलाई मात्र अपहरण गर्न खोजे पनि पत्नी इन्द्रामल्ल भने पतिलाई एक्लै छाड्न नसकेर सँगै हिडेको बताए ।

‘अध्यक्षज्यूकी पत्नीलाई अपहरण गर्न खोजेको जस्तो देखिँदैन । परिवारका सदस्यले भनेअनुसार मध्यराति श्रीमानलाई मात्रै लैजान लागेको देखेर केही गरिहाल्छन् कि भन्ने त्रासले उहाँ पनि सँगै जानुभएको रहेछ,’ वडाध्यक्ष विकले भने, ‘हामीले दुई समूहमा खोजी गरिहेका छौं । म्याडम चाहिँ कालिकोटको सिमानामा फेला पर्नुभएछ । अर्को टोलीले भेट्टाएको खबर गरेको छ । उहाँलाई लिन नचाहेपछि बाटैमा छाडिएको बुझिएको छ । अब अध्यक्षज्यूलाई किन अपहरण गरेको भन्ने कुरा म्याडमलाई भेटेपछि थाहा हुन्छ ।’

प्रहरी, स्थानीय र जनप्रतिनिधि गरी ५० भन्दा बढीले अध्यक्ष शाहीको खोजी गरिरहेका छन् । अध्यक्ष शाहीको मोबाइल फोन स्वीच अफ गरिएको छ । नेपाल कम्युनिस्ट पार्टी (नेकपा) प्रदेश कमिटी सुर्खेतले विज्ञप्ति जारी गर्दै अपहरणप्रति आपत्ति जनाएको छ ।

मध्यरात २५ जनाभन्दा बढीको समूहमा आएका अज्ञात व्यक्तिहरूले गाउँपालिका अध्यक्ष शाही दम्पतीलाई अपहरण गरेको जनाएको छ । एकपछि अर्को गर्दै जनप्रतिनिधि आक्रमण र अपहरणमा पर्दै आएको भन्दै सरकारसँग जनप्रतिनिधिको सुरक्षाको माग गरिएको छ ।

प्रकाशित मिति: आइतबार, पुस ६, २०७६ १०:५२