मध्यरातमा गाउँपालिका अध्यक्ष दम्पत्तीको अपहरण

शनिबार राति अपहरणमा परेका अध्यक्ष धिरबहादुर शाही

A+ A A-

दैलेखको ठाटीकाँध गाउँपालिकाका अध्यक्ष धिरबहादुर शाहीलाई अपहरणमा परेका छन् । शनिबार राति अध्यक्ष राहीलाई अज्ञात समूहले अपरहण गरेका हुन् । नकापमा आएका केही व्यक्तिको समूहले शनिबार राति १२ बजे अपहरण गरेको अध्यक्ष शाहीलको पारिवारिक स्रोतले जनाएको छ ।

अध्यक्ष शाहीसँगै उनकी पत्नि इला शाही पनिअपहरणमा परेको अध्यक्षका भाइ हस्त शाहीले जानकारी दिए । ठाँटीकाँध गाउँपालिका–२, श्रीपाटामा अध्यक्ष शाहीको घरमा मध्यराति आएका अज्ञात व्यक्तिहरूले सुतिरहेका शाही दम्पत्तीलाई उठाएर सोधपुछका लागि भन्दै अपहरण गरेको भाइ हस्तले जानकारी गराए ।

हस्त शाहीलाई पनि उनीहरूले आधा बाटोसम्म लिएका थिए । ‘सुतिरहेका बेला एक्कासी ढोका ढक्ढक्याए, बाहिर निस्कँदा नकापमा तीन/चार जनाको समूहमा आएका थिए,’ हस्त शाहीले भने, ‘सोधपुछ गर्नु छ भन्दै दाजु, म र भाउजू तीनै जनालाई आफ्नो साथमा लगे । आधा बाटोसम्म पुगेपछि १ बजेतिर मलाई फर्काइदिए । दाजु भाउजूलाई भने उनीहरूले आफ्नै साथमा लिए ।’

मध्यराति अपहरणमा परेका शाही दम्पत्तीको अहिलेसम्म कुनै खबर आएको छैन । प्रहरी, परिवार र प्रशासनले भने विप्लव समूहको नेकपाका कार्यकर्ताले अपहरण गरेको आशंका गरेको छ । जिल्ला प्रशासन कार्यालयका सहायक प्रमुख जिल्ला अधिकारी इन्द्रबहादुर क्षत्रीले अध्यक्ष दम्पत्ती अपहरणमा परेको जानकारी आए पनि विप्लव समूहले नै अपहरण गरेको हो भन्ने पुष्टि भइनसकेको बताए ।

आइतबार(आज) बिहानै जिल्ला सुरक्षा समितिको बैठक बसेर जिल्लाको सुरक्षा व्यवस्था कडा पारिएको छ । गाउँपालिका अध्यक्ष दम्पत्ती अपहरण गर्नेको खोजी भइरहेको सहायक प्रजिअ क्षत्रीले बताए । प्रहरीले जिल्लाबाट ठूलो संख्यामा प्रहरी खटाएको छ । सादा र पोशाकधारी प्रहरी जिल्लाका विभिन्न ठाउँमा खटाइएको जिल्ला प्रहरी कार्यालय दैलेखले जनाएको छ ।