पर्यटन विकास समिति नबन्दा लथालिङ्ग बन्यो खप्तड

A+ A A-

सुदूरपश्चिम प्रदेशको प्रमुख पर्यटकीयस्थल खप्तड क्षेत्र पर्यटन विकास समिति गठन हुन नसक्दा लथालिङ्ग अवस्थामा पुगेको छ ।

खप्तड क्षेत्र पर्यटन विकास समिति दुई वर्षदेखि गठन हुन नसकेकाले विकास निर्माणका काम लथालिङ्ग हुन पुगेको हो । समिति गठन नहुँदा पर्यटन वर्ष २०२० मनाउनमा निकै समस्या उत्पन्न हुने स्थानीयवासीको बुझाइ छ ।

समिति सदस्यविहीन बनेका कारण कसरी पर्यटक भित्र्याउने भन्ने चिन्ता स्थानीयवासीमा छ । पर्यटन वर्ष मनाउने समय नजिकिँदै गर्दासमेत समिति गठन नहुँदा स्थानीय आक्रोशितसमेत बन्न थालेका छन् ।

समितिविहीन भएको दुई वर्ष पुग्दासमेत यहाँको प्रदेश सरकारले अहिलेसम्म समिति विस्तार गर्न सकेको छैन । समिति गठन नभएकै कारण पछिल्लो दुई वर्षयता कार्यालय करिब करिब निष्क्रिय अवस्थामा रहेको छ ।

दुई वर्षदेखि कार्यालयबाट कुनै पनि कामकाज हुन नसकेको स्थानीयवासी बताउँछन् । समिति नबनेका कारण कर्मचारीले गत आर्थिक वर्षयता १३ महिनाको तलबसमेत नपाएको समितिका शाखा अधिकृत प्रेम कुँवरले बताए ।

पछिल्लो समय खप्तड क्षेत्र पर्यटन विकास समितिको कार्यालय तथा गठनसम्बन्धी जिम्मेवारीको अधिकार प्रदेश सरकारलाई प्रत्यायोजन गरेको छ ।

प्रदेश सरकारको गत वर्षको चैत १३ गते बसेको मन्त्रिपरिषद्को निर्णयबाट ‘खप्तड क्षेत्र पर्यटन विकास तथा व्यवस्थापन समिति गठन आदेश–२०७५’ स्वीकृत भए पनि अहिलेसम्म न समिति चयन भएको छ, न त कार्यकारी निर्देशक नै पठाइएको छ ।

समितिको गठन र कार्यकारी निर्देशकको नियुक्ति प्रदेश सरकारले गर्ने व्यवस्था भए पनि प्रदेश सरकारले वास्ता नगरेका कारण खप्तड क्षेत्र पर्यटन विकास समिति लथालिङ्ग अवस्थामा हुन पुगेको सिलगढीका सिद्धराज जोशीले बताए ।

खप्तड पर्यटन विकास समितिका सदस्य तथा निर्देशक चयन नहुँदा पर्यटन भ्रमण वर्ष २०२० मा असर पर्ने देखिएको सुदूरपश्चिम प्रदेशका होटल तथा पर्यटन व्यवसायी समितिका अध्यक्ष दीपकबहादुर खड्काको भनाइ छ ।

त्यस्तै, खप्तड पर्यटन विकास समितिमा करोडौं भ्रष्टाचार भएको भन्दै अहिले व्यापक चर्चा हुन थालेको छ ।

खप्तडको विकासका लागि आएको ५५ करोड रकम कुनै विकासको काममा प्रयोग नगरी भ्रष्टाचारमा सकिएको भन्दै स्थानीयवासीले छानबिन गर्नसमेत माग गरेका छन् ।

प्रकाशित मिति: शुक्रबार, पुस ४, २०७६ १२:२९