समायोजनमा परेका कर्मचारीलाई आफ्नो स्थानमा जान निर्देशन

A+ A A-

कर्मचारी समायोजनको निर्देशनविपरीत सेती प्रादेशिक अस्पतालले समायोजन भएका क्षेत्रमा जान निर्देशन दिएको छ । सामान्य प्रशासन मन्त्रालय तथा स्वास्थ्य जनसंख्या मन्त्रालयले कर्मचारी तत्काल कतै नपठाउन भनी गरेको निर्देशन सेती पारदेशिक अस्पतालले अटेरी गरेको हो ।

समायोजनका क्रममा कर्मचारीका गुनासा बढी आएकाले सो गुनासाको सम्बोधन नहुँदासम्म हाल कार्यरत क्षेत्रमै काम गर्न दिन गत महिना नै भएको निर्देशनलाई अवज्ञा गर्दै सेती प्रादेशिक अस्पतालका मेडिकल सुपरिटेन्डेन्टले कर्मचारीहरूलाई समायोजन भएका क्षेत्रमा जान निर्देशन गरेका छन् ।

स्वास्थ्य तथा जनसंख्या मन्त्रालय र संघीय मामिला तथा सामान्य प्रशासन मन्त्रालयले गत महिना नै कर्मचारी नपठाउन निर्देशन गरेपनि सेती प्रादेशिक अस्पतालका मेडिकल सुपरिटेन्डेन्ट हेमराज पाण्डेयले ३० मंसिरमा समायोजन भएका क्षेत्रमा जान परिपत्र गरेका छन् ।

एक्स–रे, आईसीयूलगायत अत्यावश्यक सेवाका स्वास्थ्यकर्मीको समेत अन्यत्रै समायोजन भएको अस्पतालले जनाएको छ । तर, डाक्टर पाण्डेयले भने कर्मचारीले सो निर्णयको विरोध गरेपछि सबैका लागि परिपत्र नभई रोजाइले जान लागेका कर्मचारीका लागिमात्र परिपत्र जारी गरेको दाबी गरे ।

अस्पतालको विशेषज्ञ सेवामा कार्यरत कर्मचारी तथा अत्यावश्यक सेवाका चिकित्सक बाहिर गएपछि सेवा प्रवाहमा भने समस्या हुनेछ । रेडियो ग्राफर, सूचना अधिकारी, लामो समय काम गरेका अनमीको अन्य क्षेत्रमा समायोजन भएको छ । तर, प्रदेशको सामाजिक विकास मन्त्रालयको भने यसमा फरक धारणा छ । अर्को व्यवस्था नभएसम्म कर्मचारी तथा चिकित्सक समायोजन नहुने र भइहाले पनि प्रदेश सरकारले तत्काल वैकल्पिक बाटोबाट चिकित्सक भर्ना गर्ने सामाजिक विकास मन्त्रालयका सूचना अधिकारी झंकरबहादुर विष्टले बताए ।

अस्पतालको निर्देशनअनुसार रेडियो ग्राफर जयन्त उप्रेती, सूचना अधिकारी दिलीप श्रेष्ठ, अनमी मञ्जु केसी, अनमी यशोदा ढकाल, स्टाफ नर्स हेमन्ती अवस्थी, सिनियर अनमी शुभद्रा कुमारी शाहको अन्य क्षेत्रमा समायोजन भएको छ ।

साथै तीन जना सिनियर अनमी, चार जना सिनियर अहेवको प्रदेशकै विभिन्न स्थानीय तहमा समायोजन भएको छ । समायोजन रोजेका बेला फारम भर्ने समस्यालगायत विविध कारण अन्य क्षेत्रमा रोजिएको भन्दै उनीहरूले समायोजन सच्याउन निवेदनसमेत दिएका छन् ।

निवेदन दिएका कर्मचारीहरूको गुनासा सम्बोधनका लागि सामान्य प्रशासन मन्त्रालयले गृह कार्य गरिरहेको जनाउँदै तत्काल सोही क्षेत्रमा काम गर्न निर्देशन गरेको थियो । तर, मन्त्रालयको निर्देशन नमानी सेती अस्पतालका मेडिकल सुपरिटेण्डेन्टले समायोजन भएका सम्पूर्ण स्वास्थ्यकर्मीलाई आ–आफ्नो स्थानमा जान निर्देशन दिएको हो । १३ जना स्वाथ्यकर्मीलाई अन्यत्र जान निर्देशन दिएपछि उनीहरूले भने असन्तुष्टि जनाएका छन् ।