कञ्चनपुरमा थारू संग्रहालय खुला गरिँदै

A+ A A-

नेपाल भ्रमण वर्ष २०२० लाई लक्षित गरी कञ्चनपुरको शुक्लाफाँटा नगरपालिका–८, भल्कामा रहेको थारू संग्रहालय आन्तरिक तथा बाह्य पर्यटकका लागि खुला गरिने भएको छ । थारू समुदायको आस्थाको धरोहरका रूपमा रहेको भल्कामा वडा कार्यालयको सहयोगमा संग्रहालयका लागि परम्परागत शैलीको घर निर्माण गरिएको छ ।

आन्तरिक तथा बाह्य पर्यटकको सुविधाका लागि संग्रहालयमा सौय ऊर्जा र शौचालयको व्यवस्था गरिएको छ । संग्रहालय अवलोकनका लागि आउने पर्यटकका लागि थारू समुदायका संस्कृति, रहनसहन र जनजीविकासँग सम्बन्धित वस्तु राख्ने कार्य अगाडि बढाइएको छ ।

थारू समुदायले प्राचीनदेखि वर्तमान समयसम्म परम्परागत रूपमा प्रयोग गर्ने वस्तु राख्नका लागि १२ वटा थारू गाउँका वडघरलाई जिम्मा दिइएको थारू संग्रहालय तदर्थ समितिका सचिव भागीराम चौधरीले बताए ।

उनका अनुसार संग्रहालयमा थारू समुदायले प्रयोग गर्ने हेल्का, डिलिया, छिटुवा, पखै, डेल्वा, बेर्री, पिर्का, पैना, चन्डोल, डोली, ढडिया, खोंगिया, पैवा, खराउ, चटुवा, डपला, मन्द्रा, डफ, बस्या, कुथली, डेहरी, मरुवा, पाता, भाला, बर्सी ढाललगायतका सामान राखिनेछन् ।

यसैगरी, हलो, जुवा, डोक्नी, भोक्टी, भौका, छिटनी, लैया, जबरा, अस्टम्कीलगायतका सामानको जोहो गर्नका लागि थारू समुदायका अगुवालाई परिचालन गरिएको छ ।

भल्का थारू समुदायको परम्परागत धार्मिकस्थलका रूपमा रहेको छ । भल्कामा रहेको कुण्डमा पानीमाथि उफ्रने गर्दछ । कुण्डको पानी गर्मीमा चिसो र चिसोमा गर्मी हुने गर्दछ ।

माघी संक्रान्तिका बेला यस क्षेत्रमा ठूलो मेला लाग्ने गर्दछ । माघीका बेला कुण्डको पानीले नुहाएमा चर्मरोग निको हुने जनविश्वास छ ।

रासस

प्रकाशित मिति: बिहीबार, पुस ३, २०७६ १२:४९