वडाध्यक्षका भाइले प्रशासकीय अधिकृत कुटे

वडाध्यक्षका भाइको प्रहारबाट घाइते बनेका प्रशासकीय अधिकृत रामबहादुर केसी

A+ A A-

रुकुम पश्चिममा एक वडाध्यक्षका भाइले नगरपालिकाका प्रमुख प्रशासकीय अधिकृतलाई मरणासन्न हुने गरी कुटेका छन् । बुधबार साँझ कार्यालयबाट कोडातर्फ फर्किँदै गरेका प्रमुख प्रशासकीय अधिकृत रामबहादुर केसीलाई आठबीसकोट नगरपालिका– ३ का अध्यक्ष केशरमान विकका भाइले कुटपिट गरेका हुन् ।

कार्यालयको काम सकेर घर फर्कँदा वडाध्यक्ष विकका भाइ गोपाल विक र हरिश विकले कोठानजिकै धारिलो हतियार प्रहार गरी गम्भीर घाइते बनाएका छन् । वडाध्यक्ष विककै योजनामा ज्यान मार्ने उद्देश्यले प्रहार गरिएको पीडित परिवारको आरोप छ ।

सूचना अधिकारी गणेश चन्द र प्रशासकीय अधिकृत केसी आइतबार साँझ एकैसाथ कार्यालयबाट घर फर्केका थिए । कोठानजिक लुकेर बसेका विक दाजुभाइले सिधै धारिलो हतियार केसीको टाउकोमा प्रहार गरेका थिए ।

वडाध्यक्षका भाइको प्रहारपछि नगरपालिकाका सम्पूर्ण कर्मचारीले असुरक्षित महसुस गरिएको विज्ञप्तिमार्फत जनाएका छन् । उनीहरूले सुनियोजित ढंगले ज्यान मार्ने उद्देश्यले प्रहार भएको भन्दै कर्मचारीको सुरक्षा र दोषीमाथि कारबाहीको माग गरेका छन् । विक दाजुभाइलाई कारबाही नभएसम्म बिहीबारदेखि नगरपालिकाका सम्पूर्ण कामकाज ठप्प पार्ने कर्मचारीहरूले जनाएका छन् ।

नगरपालिकाले पनि एक विज्ञप्ति जारी गर्दै नगरप्रमुख चीन भ्रमणमा रहेकाे बेला भएको उक्त घटनाले दुःखित बनाएको उल्लेख गरेको छ । नगरउपप्रमुख गीता नेपालीले विज्ञप्तिमार्फत विवाद भएको भए पनि आपसमा छलफल गरी सल्टाउनुपर्नेमा सांघातिक हमला गर्नु अमानवीय कार्य भएको भन्दै दोषीमाथि तुरुन्त कारबाही गर्न प्रशासनसँग अनुरोध गरेकी छन् ।

प्रकाशित मिति: बिहीबार, पुस ३, २०७६ ११:१२