देशको प्रतिष्ठा जोगाउन जोखिम मोलेरै काम गर्‍यौंः मन्त्री विश्वकर्मा

A+ A A-

भूतपूर्व खेलाडी मञ्च नेपालले आयोजना गरेको भेटघाट कार्यक्रममा युवा तथा खेलकुद मन्त्री जगतबहादुर विश्वकर्माले १३औं दक्षिण एसियाली खेलकुद (साग) विभिन्न वाधा व्यवधानका बाबजुद सफल भएको बताएका छन् । उनले बजेट र समय दुवैको अभाव रहँदा पनि देशको इज्जत र प्रतिष्ठा जोगाउन जोखिम मोलेरै काम गरेको जिकिर गरे ।

‘बजेट र समय दुवै पर्याप्त थिएन । निर्माण गर्नुपर्ने पूर्वाधार धेरै थिए । तर, देशको इज्जत र प्रतिष्ठा जोगाउन जोखिम मोल्यौं । रातारात काम गरेर समयमै काम सक्यौं । खेलकुदमा धेरै समस्या छन्, क्रमशः सबैको सम्बोधन गर्दै जानेछौं,’ मन्त्री विश्वकर्माले बताए ।

१३औं सागले नेपाली खेलकुदमा सकारात्मक सन्देश दिएको पनि उनले विश्वास व्यक्त गरे । पोखरामा सागका ८ खेल हुँदा नवौं राष्ट्रिय खेलकुद आयोजनामा सहज हुने पनि उनले धारणा राखे । नवौं राष्ट्रिय खेलकुदका लागि आवश्यक थप संरचना पनि समयमै निर्माण गरिने उनले प्रतिबद्धता व्यक्त गरे ।

साथै, मन्त्री विश्वकर्माले पोखरामा वार्षिक रुपमा आयोजना हुँदै आएको ‘अन्तर्राष्ट्रिय पोखरा म्याराथन’लाई सफल बनाउन आफ्नो क्षेत्रबाट आवश्यक सहयोग गर्ने प्रतिबद्धत्ता समेत व्यक्त गरे । आगामी ३ फागुनबाट पोखरामा हुने १४औं संस्करणको म्याराथन सफलतापूर्वक सम्पन्न गर्न आवश्यक बजेटको व्यवस्थापन गर्नका लागि सम्बन्धित मन्त्रालयमा समन्वय गर्ने मन्त्री विश्वकर्माले आश्वासन दिए ।

भूतपुर्व खेलाडी मञ्चका अध्यक्ष तेज गुरुङले पोखरा म्याराथनलाई पोखराको ठुलो इभेन्टका रुपमा स्थापित गर्ने लक्ष्य रहेको बताए । स्वदेश तथा विदेशमा रहेका विभिन्न व्यक्ति तथा संघसंस्थाको साथ सहयोगले १४ औं पोखरा म्याराथन सफलतापूर्वक सम्पन्न हुने उनले विश्वास व्यक्त गरे ।

१४औं म्याराथनमा ७ हजार धावक सहभागी गराउने गृहकार्य भइरहेको पनि गुरुङले बताए । विजेता खेलाडीलाई प्रदान गरिने पुरस्कार राशी समेत वृद्धि गर्ने योजना रहेको उनले जानकारी दिए ।

‘म्याराथनको १४औं संस्करणमा ७ हजार खेलाडी समेटेर पुरस्कार राशी पनि बढाउने योजना छ । दाताको खोजी गर्दैछौं,’ गुरुङले बताए ।

यसअघि म्याराथनका विजेतालाई १ लाख नगद पुरस्कार दिँदै आइएको थियो । ‘दौडौं स्वास्थ्यका लागि, दौडौं पोखराका लागि’ भन्ने नाराका साथ आयोजना हुने म्याराथनमा विदेशी धावकहरुको पनि सहभागिता गराउने तयारी भइरहेको प्रथम उपाध्यक्ष हरिप्रसाद पराजुलीले बताए ।

प्रतियोगितामा ४२.९२ किलोमिटर म्याराथन दौडसहित १० किलोमिटर महिला दौड, ५ किलोमिटर छात्रछात्रा दौड तथा अपाङ्गता भएका व्यक्तिहरुका लागि १ सय मिटर ह्विलचेयर रेस समेत हुनेछ ।

प्रकाशित मिति: बुधबार, पुस २, २०७६ १९:३२