६ महिनामा सरकारले बाँड्यो ७ करोड

A+ A A-

आर्थिक मितव्ययिता र समृद्धिको नारा दिएर गठन भएको केपी ओली नेतृत्वको सरकारले आर्थिक सहायताको नाममा ६ महिनामा नै राज्यकोषबाट ७ करोड रुपैयाँभन्दा बढी बाढेको छ ।

मन्त्रिपरिषदबाट निर्णय गरेर चालु आर्थिक बर्षको साउनदेखि माघ मसान्तसम्ममा ७ करोड ९ लाख ५३ हजार २ सय ९५ रुपैयाँ आर्थिक सहायता बाढिएको हो । यसमा असोज महिनाको विवरण समावेश छैन ।

अर्थमन्त्रालयले सार्वजनिक गरेको तथ्यांक अनुसार गत साउन महिनामा ९८ लाख ५१ हजार, भदौ महिनामा १ करोड ८० लाख २१ हजार, कात्तिक महिनामा १० लाख, मंसिर महिनामा १ करोड ७ लाख १९ हजार, पुस महिनामा २ करोड ३३ लाख ६४ हजार र माघ महिनामा ७९ लाख ९५ हजार रुपैयाँ रुपैयाँ बाढिएको छ ।

माघमा कसले कति पाए ?
अर्थमन्त्रालयले सार्बजनिक गरेको तथ्यांक अनुसार माघ महिनामा सरकारले राज्यको ढुकुटीबाट ७९ लाख ९५ हजार १ सय ७७ रुपैयाँ बाढेको छ ।

यसमध्ये सर्लाही घटनामा मृत्यू भएका रामनगर गाउँपालिका–४ का राम विलास महतोको परिवारलाई १० लाख रुपैयाँ दिइएको छ ।

यस्तै माघ महिनामा नै पूर्वराष्ट्रपति डा. रामवरण यादवलाई २ लाख रुपैयाँ, धनकुटाका जनार्दन आचार्य, नेपालगञ्जका विन्दु कुवँर, भेरी नपा–४ का मोहन कुमार श्रेष्ठ, थुलुङ दुधकोशी गाउँपालिका –८ का अनुप्रशान्त राइ र यम्घा–३ पाल्पाका केशरी न्यौपाने समेतलाई जनही ५ लाख रुपैयाँका दरले २५ लाख रुपैयाँ दिइएको छ ।

यस्तै माघमै गुल्मीका थानेश्वर ज्ञवालीलाई ५ लाख, कालिकास्थान काठमाडौंका मदनमणि दीक्षितलाई ७ लाख, काठमाडौंकै बसन्तकुमार शर्मालाई ५ लाख र सिरहाका सत्यम शर्मालाई ५ लाख रुपैयाँ दिइएको छ ।

अर्थमन्त्रालयका अनुसार सरकारी कर्मचारीहरु खड्गवहादुर आलेलाई ५ लाख र थानेश्वर ज्ञवालीलाई पनि ५ लाख रुपैयाँ आर्थिक सहायता दिइएको छ ।

प्रतिनिधिसभा तथा प्रदेशसभा निर्वाचनको सिलसिलामा ड्यूटीमा खटिदा वायाँ खुट्टा भाच्चिएका म्यादी प्रहरी पूतली कुमारी वोहरालाई ९५ हजार १ सय ७७ रुपैयाँ आर्थिक सहायता दिइएको छ ।

माघ महिनामा नै शहीद शुक्रराज ट्रफिकल तथा सरुवा रोग अस्पताल टेकूमा कार्यरत कर्मचारी विष्णा जोशीको उपचारको लागि एमएमसी अस्पतालमा उपचार गर्दा लागेको खर्चमध्ये १० लाख रुपैयाँ आर्थिक सहायता दिने निर्णय सरकारले गरेको छ ।

पुसमा कसले कति पाए ?
सरकारले स्वर्गीय प्रमोद साहकी पत्नी लक्ष्मीपूर पत्तारी गाउँपालिका–२ की गीतादेवी साहलाई २ लाख रुपैयाँ आर्थिक सहायता दिएको छ ।

यस्तै कैलालीका जीवन कुमार गौतमलाई ७ लाख, मकवानपूरका बीरबहादुर लामालाई ३ लाख, फिदिमका जर्नबहादुर नेम्वाङलाई २ लाख र प्रधानमन्त्रीको निजी सचिवालयमा कार्यरत धनमाया सुनुवारलाई ३ लाख रुपैयाँ दिइएको छ ।

अर्थमन्त्रालयले सार्वजनिक गरेको तथ्यांक अनुसार खड्गबहादुर कटुवाल सहित १२ जनालाई ७२ लाख, मकवानपूरका बीरबहादुर लामा सहित ११ जनालाई ८० लाख, कानुन ब्यवसायी परिषदको २५औं रजत महोत्सव मनाउन २० लाख र नुवाकोट कुमरीका दामोदर प्रसाद गौतम सहित २३ जनालाई ४४ लाख ६४ हजार ९ सय गरी २ करोड ३३ लाख ६४ हजार ९ सय रुपैयाँ आर्थिक सहायता बाँढेको छ ।

पुस महिनामा सरकारले २ करोड ३३ लाख ६४ हजार ९ सय रुपैयाँ आर्थिक सहायता बाँढेको छ ।

मंसिरमा कसले कति पाए ?
मंसिरमा गण्डकी प्रदेशका सभामुख नेत्रनाथ अधिकारीको उपचार खर्चबापत ७ लाख १९ हजार ७ सय ४९ रुपैयाँ दिइएको छ । यस्तै बलात्कार पछि हत्या भएकी श्रेया विकको परिवारलाई ५ लाख, एसिड प्रहारपछि मृत्यू भएकी सम्झना दास र घाइते सुस्मिता दासको परिवारलाई ५/५ लाख, प्रहरी नियन्त्रणपछि मृत्यू भएका मनोहर यादवको परिवारलाई १० लाख र यातायात हड्तालको क्रममा घाइते भएका अछामका अरविन कुवरलाई १ लाख रुपैयाँ आर्थिक सहयोग दिइएको छ ।

सरकारले तनहूका पूर्व सांसद टुकराज सिग्देललाई १० लाख, झापा विर्तामोडका राजेन्द्रकुमार विमलीलाई १६ लाख, प्रधानमन्त्री तथा मन्त्रिपरिषद कार्यालयका लक्ष्मीबहादुर रोकायालाई ३ लाख, म्याग्दीका अर्जुन प्रसाद सुवेदीलाई २ लाख र कपिलवस्तु घटनामा मृत्यू भएका राजावाबु भनिने दीपेन्द्र चौधरीका परिवारलाई १० लाख रुपैयाँ दिएको छ ।

अर्थमन्त्रालयका अनुसार कपिलवस्तुका मुमाराम आचार्यलाई १० लाख, घैलाडुब्बा झापाका मध्मा वलीलाई ३ लाख, झापा सुरुङ्गाका चानक उप्रेतीलाई ५ लाख र सुनसरी दुहवी घटनामा मृत्यू भएका फिदा हुसेनका परिवारलाई १० लाख रुपैयाँ आर्थिक सहायता दिइएको छ ।

मंसिरमा नै राज्यकोषबाट संघीय मामिला तथा सामान्य प्रशासन मन्त्रालयका लेखापाल बीना पौडेललाई ५ लाख रुपैयाँ उपचार खर्च र दैलेखको आठबीस नगरपालिकाका नासु गणेशमान सिंहको उपचार खर्च ५ लाख रुपैयाँ गरी मंसिर महिनामा १ करोड ७ लाख १९ हजार ७ सय ४९ रुपैयाँ आर्थिक सहायता बाढेको छ ।

कात्तिकमा कसले कति पाए ?
कात्तिक महिनामा राज्यकोषबाट २ जनाले मात्रै आर्थिक सहायता पाएका छन् । अर्थमन्त्रालयका अनुसार बीरगञ्ज भन्सार कार्यालयका नासु संजीब कुमार सिंहलाई ५ लाख रुपैयाँ र जलश्रोत तथा सिंचाई विभागका इन्जिनियर पुरुषोत्तम खरेललाई ५ लाख रुपैयाँ उपचार खर्च दिइएको छ ।

भदौमा कसले कति पाए ?
भदौ महिनामा नेपाली काँग्रेसका केन्द्रीय सदस्य तथा पूर्वमन्त्री नरहरि आचार्यको उपचार खर्च ३३ लाख ६१ हजार ५ सय ४५ रुपैयाँ र रामेछापका भीमबहादुर श्रेष्ठलाई १० लाख रुपैयाँ आर्थिक सहायता दिएको छ ।

यस्तै खैरेनीटारका इन्दिरा तिम्सिनालाई ७ लाख, नुवाकोटका अर्जुन पाण्डेको नजिकका हकवालालाई भन्दै ३ लाख, रुपन्देहीका बेदप्रसाद रेग्मीलाई १ लाख र बर्दियाका गयाप्रसाद चौधरीलाई १ लाख रुपैयाँ आर्थिक सहायता दिएको छ ।

यस्तै दैलेखका हर्क शाहीलाई ३ लाख, लमजुङका डक्बरी बोहोरालाई ५ लाख, नवलपरासीका गोविन्द चौधरीलाई ३ लाख, महोत्तरीका केदारनाथ पाठकलाई ३ लाख, बर्दियाका सुस्मिता नेपालीलाई ५ लाख, मकवानपूरका मदन रिमाललाई ५ लाख र काठमाडौंका राजु नेपालीलाई ५ लाख रुपैयाँ पनि आर्थिक सहयोग दिइएको छ ।

भदौमै प्रतिनिधिसभा तथा प्रदेशसभा निर्वाचनको क्रममा घाइते भएका निर्मला कोइराला समेत २४ जनाको उपचार खर्च वापत २७ लाख ६० हजार २ सय ५५ रुपैयाँ, दक्षिण एशिया गुठी र ‘काठमाडौं युनिभर्सिटी स्कूल अफ ल’को संयुक्त आयोजनामा नेपालको संविधान २०७२ विषयक तीन दिने अन्तराष्ट्रिय सम्मेलन गर्न ३० लाख रुपैयाँ आर्थिक सहायता बाँडिएको छ ।

यस्तै हेटौडाका श्रीचन्द्र शर्माले भदौ महिनामा नै सरकारी कोषबाट १० लाख रुपैयाँ आर्थिक सहायता पाएका छन् । कंचनपूरका मृतक सन्नी खुनाका परिवारलाई १० लाख, बलात्कार पछि हत्या गरिएकी निर्मला पन्तका परिवारलाई १० लाख रुपैयाँ, युवराज खड्कालाई ३ लाख रुपैयाँ र महोत्तरीका हरिशंकर मिश्रलाई ५ लाख रुपैयाँ आर्थिक सहायता दिएको छ ।

भदौ महिनामा सरकारले १ करोड ८० लाख २१ हजार ८ सय रुपैयाँ आर्थिक सहायता बाँडेको हो ।

साउनमा कसले कति पाए ?
सरकारले साउनमा गंगामाया अधिकारीलाई विशेष आर्थिक राहत स्वरुप २० लाख रुपैयाँ, एमाले पर्सा जिल्ला कार्यालयलाई २ लाख ३ हजार सहित विभिन्न ९ जनालाई गरेर २८ लाख ५३ हजार रुपैयाँ बाँडिएको छ ।

यस्तै बाजुराका हस रावतका श्रीमती कौसीदेबी रावतलाई १० लाख रुपैयाँ, काठमाडौं चण्डोलका पिताम्बर आम्बुहाङलाई १० लाख, पूर्वमन्त्री रामकृष्ण ताम्राकारलाई १५ लाख रुपैयाँ आर्थिक सहायता पनि गत साउनमै दिइएको छ ।

यस्तै सरकारले गत साउनमा नै राष्ट्रकवि माधव घिमिरेलाई नेपाल तथा भारतका विभिन्न अस्पतालहरुमा उपचार गराउँदा लागेको १४ लाख ९८ हजार ६ सय ६९ रुपैयाँ पनि दिएको छ । गत साउनमा सरकारले ९८ लाख ५१ हजार ६ सय ६९ रुपैयाँ आर्थिक सहायता बाँडेको थियो ।

प्रकाशित मिति: सोमबार, फागुन २०, २०७५ ०६:४५